Read Dagbani Jɔshua 18 Bible Online

Jɔshua 18 - Dagbani bible

Jɔshua 18

¹Ka Izraɛlnim’ zaa daa ti laɣim Shilo n-zaŋ Naawuni jɛmbu tanti suɣili la kpa nimaani; ka bɛ ni daa tuhi deei tiŋgbɔn shɛli maa kul doya ka bɛ lihiri li.

²Ka bɛ zuliya ayopɔin daa kpalim ka na bi deei bɛ tiŋgbana tarili.

³Ka Jɔshua daa bɔhi Izraɛlnima, “Bɔ n-niŋ ka yi zaŋ Yawɛ ŋun nyɛ yi yaannim’ Naawuni ŋɔ ni zaŋ tiŋgbɔn shɛli tin ya la deebu niŋ yi baɣaka hal ni wayo?

⁴Piimiya zuliya shɛb’ bɛn kpalim maa zuliya kam puuni niriba atata ti ma, ka n tim ba ka bɛ chaŋ ti chaŋchaŋ gili tiŋgbɔŋ maa m-buɣisi li nya, ka sab’ wuhi di yɛla ni nyɛ shɛm zaa zaŋ chaŋ bɛ ni bɔri ni bɛ su yaɣ’ shɛŋa yɛla zaa na ti ti ma.

⁵Bɛ pirigim’ tiŋgbɔŋ maa ʒii buyopɔin. Juda zuliya niriba la kul ni be o tiŋgbani din be nudirigu polo la ni, ka Yisifu zuliya niriba mi kul be o tiŋgbani din be nuzaa polo la ni.

⁶Bɛ pirigim’ tiŋgbɔŋ maa ʒii buyopɔin ka sab’ wuhi di ni nyɛ shɛm na ti ti ma, ka m bo kuɣa sɔŋ Yawɛ ŋun nyɛ ti Naawuni ŋɔ tooni n-lihi nya.

⁷Lɛvinim’ bɛn’ ku mali tiŋgbana maa tarili. Bɛ maligumaanitali tuma maa n-nyɛ bɛ tarili. Ka Gaad mini Rubin zuliya niriba ni Manaasa zuliya niriba pirigili bɛn be Jɔɔdɛn Mɔɣili duli wulimpuhili polo la gba pun mali bɛ tiŋgbana tarili din nyɛ Yawɛ dabili Musa ni daa pun zaŋ shɛli n-ti ba la.”

⁸Ka Jɔshua daa yɛli niriba bɛn yɛn chaŋ ti sab’ tiŋgbɔŋ maa yɛla ni nyɛ shɛm na maa, “Chamiya ti chaŋchaŋ gili tiŋgbɔŋ maa, ka sab’ tiŋgbɔŋ maa yɛla ni nyɛ shɛm ka labina; ka m bo kuɣa sɔŋ Yawɛ tooni Shilo kpe n-lihi nya n-tin ya.” Ka bɛ daa yiɣisi gbaai soli.

⁹Ka tuumba maa daa chaŋ ti kpe tiŋgbɔŋ maa ni chaŋchaŋ gil’ li, ka sab’ di yɛla ni nyɛ shɛm niŋ litaafi ni, ka lan pirigi di fɔndi ʒii buyopɔin zuɣu n-zaŋ labi ti ti Jɔshua Shilo sansani maa ni.

¹⁰Ka Jɔshua daa bo kuɣa sɔŋ Yawɛ tooni Shilo n-lihi nya, ka daa piri tiŋgbɔŋ maa ti Izraɛlnim’ kaman di ni daa simdi ni bɛ zuliya kam deei shɛm.

¹¹Bɛnjamin zuliya ka bɛ daa daŋ tiŋgbani tibu kaman bɛ daŋ niriba ni nyɛ shɛm. Bɛ tiŋgbani maa daa dola Juda mini Yisifu zuliya niriba tiŋgbana sunsuuni.

¹²Zaŋ lab’ nuzaa polo, bɛ tiŋgbani maa daa piligila Jɔɔdɛn Mɔɣili ni n-zaŋ hal ti du Jɛriko nuzaa polo kuŋkuni n-zaŋ kpa wulinluhili polo ti du zoya zuɣu m-mali hal ti paai di tariga Bɛtavɛn yɔɣu ni.

¹³Ka bɛ tintariga bɔbili maa daa yi nimaani n-zaŋ hal ti sirigi Luz nudirigu polo (bɛ ni lan booni shɛli Bɛtɛl la) n-zaŋ hal ti paai Atarɔtada Zoli din daa be Bɛtihɔrɔn din be naɣiliŋga ni nudirigu polo la.

¹⁴Ka di tintariga bɔbili maa daa lan zaŋ nimaani n-kpa shɛli polo yaha nti ŋmaligi wulinluhili polo zoli gbini n-zaŋ kpa nudirigu polo hal ti paai Kiriatibaal (bɛ ni lan booni shɛli Kiriatijiarim la).

¹⁵Ka nudirigu polo tintariga mi kpuɣi Kiriatijiarim tintariga n-zaŋ hal ti paai Ɛfurɔn m-mali hal ti paai Nɛfitɔa kulibɔŋ ni,

¹⁶ka lan zaŋ nimaani hal ti paai zo’ shɛli din doya miri Hinnom Bidibisi Vinvamli din do Rɛfaim Vinvamli nuzaa polo ni, ka lan zaŋ nimaani hal ni Hinnom Vinvamli din be Jɛbusi nudirigu polo kuŋkuni zuɣu la m-mali lala hal ti sirigi Ɛnrɔgɛl polo ha.

¹⁷Di daa lan ŋmaligi kpala nuzaa polo n-chaŋ hal ti paai Ɛnshɛmɛsh n-yi nimaani zaŋ hal ni Gɛlilɔt din be Adumim bimbini tooni la. Ka daa lan zaŋ nimaani hal ni Rubin bia Bɔhan kuɣili la gbini

¹⁸n-lan yi nimaani zaŋ kpa nuzaa polo ti du Bɛtaraba Zoli m-mali lala hal ti siɣi Araba.

¹⁹Ka di tintariga maa lan zaŋ nimaani kpa nuzaa polo m-mali ti du Bɛtihɔgila kuŋkuni, ka di tintariga maa daa zaŋ hal ti paai di tariga Yalim Teeku duli nuzaa polo zaŋ lab’ Jɔɔdɛn Mɔɣili nudirigu polo. Di nudirigu polo tintariga n-daa bala.

²⁰Jɔɔdɛn Mɔɣili ni ka di wulimpuhili polo tintariga daa kpuɣi chaŋ. Bɛnjamin zuliya niriba ni daa deei tiŋgban’ shɛli ka di leei bɛ dini maa, ka tintarisi ŋɔ zaa daa gili niŋ sunsuuni.

²¹Fɔŋ kara din daa nyɛ Bɛnjamin daŋ niriba tinsi n-nyɛ: Jɛriko mini Bɛtihɔgila ni Ɛmɛkɛziiz

²²ni Bɛtaraba ni Zɛmaraim ni Bɛtɛl

²³ni Avim ni Para ni Ofira

²⁴ni Chɛfaramɔni ni Ofini ni Gɛba: ka di zaa kalinli yiɣisi fɔŋ kara pinaayi m-pahi di tiŋkpansi zuɣu.

²⁵Ka fɔŋ kar’ shɛŋa din yuya dolina ŋɔ gba daa beni. Dina n-nyɛ: Gibiɔn mini Rama ni Bɛrɔt

²⁶ni Mizipa ni Chɛfira ni Mɔza

²⁷ni Rɛkɛm ni Iripiil ni Tarala

²⁸ni Zɛla ni Hailɛf ni Jɛbusi; (bee Jɛrusalɛm) ni Gibia ni Kiriatijiarim: ka di zaa kalinli yiɣisi fɔŋ kara pinaanahi m-pahi di tiŋkpansi zuɣu. Bɛnjamin zuliya niriba ni daa deei tiŋgban’ shɛli ka di leei bɛ dini m-bala.