Read Dagbani Jɔshua 21 Bible Online

Jɔshua 21 - Dagbani bible

Jɔshua 21

¹ Izraɛlnim’ ni daa be Shilo Keenan tiŋgbɔŋ ni saha shɛli, ka Lɛvinim’ kpamba daa ka Maligumaana Ɛliɛza mini Nan bia Jɔshua ni Izraɛl zuliya kpamba sanna ti yɛli ba, “Yawɛ daa yɛli Musa ni o tim ti tin’ shɛŋa din mali biŋkɔbiri mɔri ŋubbu shee ka ti ʒini, ka ti biŋkɔbiri ŋubiri mɔri nimaani.”

³Dinzuɣu ka Izraɛlnim’ daa pii fɔntinsi ŋɔ mini di biŋkɔbiri mɔri ŋubbu shee bɛmaŋmaŋ’ tiŋgbana ni ti Lɛvinima kaman Yawɛ ni daa zali ba shɛm.

⁴Kɔhat daŋ niriba n-daa nyɛ bɛ ni daŋ shɛb’ tinsi tibu. Bɛ daa piila fɔntinsi pinaata Juda mini Simiɔn ni Bɛnjamin zuliya niriba tiŋgbana ni ti Aduna ŋun daa nyɛ Maligumaana la daŋ niriba.

⁵Ka bɛ daa lan pii fɔntinsi pia Ifriim mini Dan ni Manaasa zuliya niriba pirigili la tiŋgbana ni ti Kɔhat daŋ niriba bɛn kpalim la.

⁶Ka bɛ daa pii fɔntinsi pinaata Isaka mini Asha ni Naftali ni Manaasa zuliya niriba pirigili bɛn be Bashan la tiŋgbana ni ti Gɛrishɔn daŋ niriba.

⁷Ka bɛ daa pii fɔntinsi pinaayi Rubin mini Gaad ni Zɛbulɔn zuliya niriba tiŋgbana ni ti Mɛrari daŋ niriba.

⁸Ka Izraɛlnim’ daa pihi kuɣa sɔŋ lihi nya, ka zaŋ fɔntinsi ŋɔ mini di tiŋkpansi m-pahi di biŋkɔbiri mɔri ŋubbu shee ti Lɛvinim’ kaman Yawɛ ni daa pun yɛli Musa shɛm la.

⁹Ka bɛ daa pii tiŋ’ shɛŋa din yuya dolina ŋɔ Juda mini Simiɔn zuliya niriba tiŋgbana ni ti

¹⁰Aduna daŋ niriba, di ni daa wuhi ni bɛ tarili n-daŋ tooni la zuɣu. Aduna daa nyɛla Kɔhat daŋ nira, ka Kɔhat mi nyɛ Lɛvi zuliya nira.

¹¹Bɛ daa zaŋla Kiriatariba mini di biŋkɔbiri mɔri ŋubbu shee ti ba pahi. (Ariba daa nyɛla Anaki ba). Bɛ booni li la Hiburɔn pumpɔŋɔ, ka di be Juda zuliya niriba tiŋgban’ ni zoya ni.

¹²Amaa bɛ daa pun zaŋ fɔntinsi maa kɔbu paliti mini di tiŋkpansi tila Jɛfune bia Kalɛb ka di leeg’ o dini.

¹³Ka bɛ daa zaŋ Hiburɔn din nyɛ nir’ ni daa yi ku o kpee ka zo n-kuli tin’ shɛli n-tiligiri la mini di biŋkɔbiri mɔri ŋubbu shee ti Aduna ŋun daa nyɛ maligumaana la daŋ niriba. Ka bɛ daa lan zaŋ Libina

¹⁴mini Jatir ni Ɛshitɛmɔa,

¹⁵ni Holɔn ni Dɛbir

¹⁶ni Ain ni Juta ni Bɛtishɛmɛshi ni di biŋkɔbiri mɔri ŋubbu shee ti ba. Fɔntiŋ’ kara awɛi ka bɛ daa yihi Juda mini Simiɔn zuliya niriba tiŋgbani maa ni.

¹⁷Bɛnjamin zuliya niriba tiŋgbɔŋ ni, fɔntins’ anahi m-pahi di biŋkɔbiri mɔri ŋubbu shee zuɣu ka bɛ daa zaŋ ti ba. Dina n-nyɛ: Gibiɔn mini Gɛba

¹⁸ni Anatɔt ni Alimɔn.

¹⁹Fɔntiŋ’ kara pinaata ni di biŋkɔbiri mɔri ŋubbu shee ka bɛ daa zaŋ ti maligumaaniba bɛn nyɛ Aduna zuliya niriba.

²⁰Ka bɛ daa lan pii fɔntin’ shɛŋa Ifriim zuliya niriba tiŋgban’ ni ti Kɔhat daŋ niriba bɛn nyɛ Lɛvi zuliya niriba la.

²¹Fɔŋ kara anahi ka bɛ daa zaŋ ti ba. Dina n-nyɛ: Shɛkɛm din nyɛ ninvuɣ’ so ŋun ku o kpee ni zɔri kuni tin shɛli tiligiri la mini di biŋkɔbiri mɔri ŋubbu shee din be Ifriim zuliya niriba tiŋgban’ ni zoya zuɣu la ni Gɛza

²²ni Kibizaim ni Bɛtihɔrɔn mini di biŋkɔbiri mɔri ŋubbu shee.

²³Ka bɛ daa lan pii fɔntins’ anahi Dan zuliya niriba tiŋgban’ ni. Dina n-nyɛ: Ɛlitɛke mini Gibɛtɔn

²⁴ni Aijalɔn ni Gatirimɔn ni di zaa biŋkɔbiri mɔri ŋubbu shee.

²⁵Ka bɛ daa lan yihi fɔntins’ ayi Manaasa zuliya niriba pirigili la tiŋgban’ ni. Dina n-nyɛ: Taanak mini Gatirimɔn ni di zaa ha biŋkɔbiri mɔri ŋubbu shee.

²⁶Kɔhat daŋ niriba maa ni daa deei fɔntin’ shɛŋa zaa kalinli daa yiɣisila tinsi pia ni di zaa ha biŋkɔbiri mɔri ŋubbu shee.

²⁷Ka bɛ daa pii fɔntins’ ayi Jɔɔdɛn Mɔɣili wulimpuhili polo Manaasa zuliya niriba pirigili bɛn’ la tiŋgban’ ni ti Lɛvinim’ shɛb’ bɛn nyɛ Gɛrishɔn zuliya la. Tinsi maa n-nyɛ: Golan din be Bashan, ka nyɛ ninvuɣ’ so ŋun ku o kpee ni zɔri kuni tin’ shɛli tiligiri la mini Biishitɛra ni di zaa biŋkɔbiri mɔri ŋubbu shee.

²⁸Ka bɛ daa lan pii fɔntins’ anahi Isaka zuliya niriba tiŋgban’ ni ti ba. Tinsi maa n-nyɛ: Kishiɔn mini Dɛbɛrat

²⁹ni Jarimut ni Ɛnganim ni di zaa biŋkɔbiri mɔri ŋubbu shee.

³⁰Ka bɛ daa lan pii fɔntins’ anahi Asha zuliya niriba tiŋgban’ ni ti ba. Tinsi maa n-nyɛ: Mishal mini Abidɔn

³¹ni Hɛlikat ni Rɛhɔb ni di zaa ha biŋkɔbiri mɔri ŋubbu shee.

³²Ka bɛ daa lan pii fɔntins’ ata Naftali zuliya niriba tiŋgban’ ni ti ba. Tinsi maa n-nyɛ: Kɛdɛshi din be Galili, ka nyɛ ninvuɣ’ so ŋun ku o kpee ni zɔri kuni tiligiri la mini Hamɔtidɔr ni Karitan m-pahi di zaa biŋkɔbiri mɔri ŋubbu shee zuɣu.

³³Gɛrishɔn daŋ niriba ni daa deei fɔntin’ shɛŋa zaa kalinli daa yiɣisila tinsi pinaata m-pahi di zaa biŋkɔbiri mɔri ŋubbu shee zuɣu.

³⁴Lɛvinim’ shɛb’ bɛn kpalim puuni, bɛ daa pii fɔntins’ anahi Zɛbulɔn zuliya niriba tiŋgban’ ni ti Mɛrari daŋ niriba. Tinsi maa n-nyɛ: Jokiniam mini Karita

³⁵ni Dimna ni Nahalal ni di zaa biŋkɔbiri mɔri ŋubbu shee.

³⁶Ka bɛ daa lan pii fɔntins’ anahi Rubin zuliya niriba tiŋgban’ ni ti ba. Tinsi maa n-nyɛ: Bɛza mini Jahaz

³⁷ni Kɛdɛmɔt ni Mɛfaat ni di zaa ha biŋkɔbiri mɔri ŋubbu shee.

³⁸Ka bɛ daa lan pii fɔntins’ anahi Gaad zuliya niriba tiŋgban’ ni ti ba. Tinsi maa n-nyɛ: Ramɔt din be Giliad, ka nyɛ ninvuɣ’ so ŋun ku o kpee ni zɔri kuni tin’ shɛli tiligiri la mini Mahanaim

³⁹ni Hɛshibɔn ni Jaza ni di zaa biŋkɔbiri mɔri ŋubbu shee.

⁴⁰Dinzuɣu Mɛrari daŋ niriba bɛn nyɛ Lɛvinim’ bɛn daa kpalim la ni daa deei fɔntin’ shɛŋa zaa kalinli daa yiɣisila tinsi pinaayi.

⁴¹Bɛ daa zaŋla tiŋgbana pihinuayika din be Izraɛl tiŋgbɔŋ ni mini di biŋkɔbiri mɔri ŋubbu shee ti Lɛvinima.

⁴²Tiŋ’ kam daa malila di biŋkɔbiri mɔri ŋubbu shee ka di gil’ li. Lala n-daa nyɛ di tinsi maa zaa.

⁴³Lala ka Yawɛ daa zaŋ tiŋgbɔŋ maa ti Izraɛlnima kaman o ni daa pun lo bɛ yaannim’ alikauli shɛm la. Bɛ ni daa deei li naai, bɛ daa ʒinila di ni.

⁴⁴Ka Yawɛ daa ti ba vuhim bɛ tiŋgbɔŋ maa zaa ni kaman o ni daa pun lo bɛ yaannim’ alikauli shɛm la. Ka bɛ dimnim’ zaa puuni ninvuɣ’ yino gba daa bi tooi zani bɛ tooni, dama Yawɛ n-daa chɛ ka bɛ nyaŋ bɛ dimnim’ maa zaa.

⁴⁵Yawɛ daa chɛ ka o ni lo Izraɛlnim’ alikauli sun’ shɛŋa la zaa zaɣ’ yini gba bi yiɣisi. O daa chɛ ka di zaa niŋ pali.