Read Dagbani Jɔshua 22 Bible Online

Jɔshua 22 - Dagbani bible

Jɔshua 22

¹Dimbɔŋɔ nyaaŋa ka Jɔshua daa boli Rubin mini Gaad ni Manaasa zuliya pirigili la daŋ niriba na

² nti yɛli ba, “Yi niŋ Yawɛ dabili Musa ni daa zali ya ni yi niŋ shɛlikam la zaa. Yi lan niŋ n gba ni zali ya ni yi niŋ shɛlikam zaa.

³Yi mi bi chɛ yi mabihi ŋɔ bahi di saha maa hal ni zuŋɔ, amaa ka kul doli Yawɛ ŋun nyɛ yi Naawuni ŋɔ zaligunima.

⁴Ka pumpɔŋɔ, Yawɛ ŋun nyɛ yi Naawuni ŋɔ ti yi mabihi maa vuhim kaman o ni daa pun lo ba alikauli shɛm la, dinzuɣu labimiya kuli yi biɛhigu shee din be Jɔɔdɛn Mɔɣili duli polo, ka nyɛ Yawɛ dabili Musa ni daa pun zaŋ luɣ’ shɛli tin ya la.

⁵Kpaŋmiya yimaŋ’ doli Yawɛ zaligu shɛŋa o ni daa chɛ ka o dabili Musa zali ya la. Dina n-nyɛ: Yumiya Yawɛ ŋun nyɛ yi Naawuni ŋɔ ka tumm’ o yubu, ka dol’ o zaligunima, ka zaŋ yimaŋ’ tabil’ o, ka kul jɛmm’ o ni yi suhuri zaa ni yi shia zaa.”

⁶Ka Jɔshua daa suhi alibarika niŋ bɛ ni ka chɛ ka bɛ kuli.

⁷Musa daa pun tila Manaasa zuliya pirigili daŋ niriba la tiŋgbani Bashan, ka Jɔshua mi daa ti bɛ mabihi bɛn kpalim la tiŋgbani Jɔɔdɛn Mɔɣili wulinluhili polo la. Jɔshua ni daa suhi alibarika niŋ bɛ ni ka bahi ba ni bɛ kuli maa, ka o daa lan yɛli ba,

⁸“Zaŋmiya yi ni tuhi yi dimnim’ ka di azichi nɛma pam din nyɛ niɣi mini anzinfa ni salima ni daanya ni kuriti ni situra pam ŋɔ kuli yi tiŋgban’ ni nti pii ti yi mabihi.”

⁹Di saha ka Rubin mini Gaad ni Manaasa zuliya pirigili maa daa chɛ Izraɛlnim’ shɛb’ bɛn be Shilo din be Keenan tiŋgbɔŋ ni la, ka kuli Giliad tiŋgbɔŋ ni din nyɛ Yawɛ ni daa chɛ ka Musa zaŋ tiŋgban’ shɛli ti ba, ka di leei bɛ din’ la ni.

¹⁰Rubin mini Gaad ni Manaasa zuliya pirigili maa ni daa mali ti paai Jɔɔdɛn Mɔɣili duli din bɛ Keenan tiŋgbɔŋ ni la, bɛ daa mɛla sara maligu bimbin’ titali zali nimaani.

¹¹Ka so daa yɛli bɛ tab’ Izraɛlnim’ la, “Nyamiya, Rubin mini Gaad ni Manaasa zuliya pirigili la mɛla sara maligu bimbini zali Gɛlilɔt Jɔɔdɛn Mɔɣili polo na din nyɛ Izraɛlnim’ ni su luɣ’ shɛl’ la.”

¹²Izraɛlnim’ maa ni daa wum yɛlli maa, ka bɛ zaa daa laɣim Shilo na ni bɛ ti lo tɔbu chaŋ ti tuhi ba.

¹³Di saha ka Izraɛlnim’ maa daa pii maligumaana Ɛliɛza bia Finɛhas m-pahi bɛ daŋ kam ni dɔɣirikpamba pia zuɣu n-tim ba Rubin mini Gaad ni Manaasa zuliya pirigili maa sani Giliad tiŋgbɔŋ ni.

¹⁵Ka bɛ daa chaŋ Rubin mini Gaad ni Manaasa zuliya pirigili maa sani Giliad tiŋgbɔŋ maa ni

¹⁶ nti yɛli ba, “Yawɛ niriba Izraɛlnim’ zaa ni bɔhiri ya bɔhigu shɛli m-bɔŋɔ. ‘Tuumbiɛ’ bɔ ka yi lee tum zaŋ chaŋ Izraɛl Naawuni polo, din nyɛ yi ni me yimaŋmaŋ’ sara maligu bimbini zali, ka ŋmaligi ka chɛ Yawɛ dolibu zuŋɔ dabisili ŋɔ la? Yi yila Yawɛ nyaaŋa maa.

¹⁷ Ti ni daa tum alahichi shɛli Pɛɔr ka alɔbo lu ti zuɣu, ka ti na kul diri di wahala la bi galisi nyaŋ ti?

¹⁸Ka yi mi ti lan ŋmaligi ka chɛ Yawɛ jɛmbu zuŋɔ dabisili ŋɔ? Ka yi yi yi Yawɛ nyaaŋa zuŋɔ dabisili ŋɔ, o suhu sa ni yiɣisi bahi tinim’ Izraɛlnim’ zaa zuɣu biɛɣuni.

¹⁹Ka yi tiŋgbɔŋ maa yi bi bela nyam yin’ yiɣisimiya nimaani du tiŋgbɔn shɛli din nyɛ Yawɛ tiŋgbɔŋ ka o jɛmbu duu ʒe di ni ŋɔ na nti pii tiŋgbana ti sani ʒini. Amaa lee miriya ka yi yi Yawɛ nyaaŋa yi ni me yimaŋmaŋ’ sara maligu bimbini, ka chɛ Yawɛ ŋun nyɛ ti Naawuni ŋɔ sara maligu bimbin’ la zuɣu, ka zaŋ ti gba leeg’ o nyaanyiriba.

²⁰ Zɛra yaaŋa Ɛkan ni daa zaɣisi Naawuni noli ka kpuɣi binshɛŋa bɛ ni daa zaŋ ti Naawuni la, yi bi teei Naawuni suhu ni daa yiɣisi bahi Izraɛlnim’ zaa zuɣu shɛm la yɛla? Ka di pala Ɛkan kɔŋko n-daa kpi o daalahichi maa tumbu zuɣu.’ ”

²¹Di saha ka Rubin mini Gaad ni Manaasa zuliya pirigili la daŋ niriba maa daa garigi yɛli Izraɛlnim’ daŋ kam ni dɔɣirikpamba maa,

²²“Yawɛ nyɛla ŋun gari wuna zaa, Yawɛ nyɛla Naawuni ŋun gari wuna zaa! O mi daliri din chɛ ka ti me sara maligu bimbini maa, ka ti bɔri ni ti chɛ ka yinim’ Izraɛlnim’ gba baŋ di daliri maa. Ti yi nyɛla nyaanyiriba ka me sara maligu bimbini ŋɔ bee ti yi lomi ni ti zaɣisi Yawɛ dolibu, yin’ di lan chɛ ka ti beni zuŋɔ dabisili ŋɔ.

²³Ka ti yi zaɣisila Yawɛ ka me sara maligu bimbini ŋɔ ni ti zaŋdi biŋkɔbiri maani sara pari di zuɣu nyɔri buɣim bee n-zaŋdi bindira sara bee suhudoo sara pari di zuɣu, ŋun’ Yawɛ maŋmaŋ’ ŋun’ darigim’ ti tibili.

²⁴Din chɛ ka ti niŋ lala maa nyɛla, ti jɛmi ni yi yaansi ti bɔhi ti yaansi dahin’ shɛli ha, ‘Yi mi nuu lee yi wula ti be Yawɛ ŋun nyɛ Izraɛl Naawuni ŋɔ yɛla ni?

²⁵Dama Yawɛ m-pun zaŋ Jɔɔdɛn Mɔɣili n-sɔŋ ti mini yinim’ Rubin mini Gaad zuliya niriba ŋɔ sunsuuni wuhi ti tintarisi ni nyɛ shɛm, dinzuɣu yi ka tarili Yawɛ sani.’ Di saha, di pa shɛli ka yi yaansi ti chɛ ka ti yaansi chɛ Yawɛ jɛmbu.

²⁶Dinzuɣu ka ti yɛli, ‘Chɛliya ka ti me sara maligu bimbini zali, ka di pala ti yɛn zaŋdila biŋkɔbiri m-maani sara pari di zuɣu nyɔri buɣim bee m-maani sara shɛli di zuɣu.

²⁷Amaa ti bɔrimi ni di nyɛ shɛhira bini ti mini ya ni yi yaansi ni ti gba yaansi sunsuuni n-wuhi ni ti gba nyɛla bɛn be Yawɛ tooni jɛmd’ o, ka zaŋdi biŋkɔbiri maani sara m-mali ba nyɔri buɣim, ka mali bindira maani sara m-pahi suhudoo sara zuɣu. Di yi pa lala, yi yaansi ni ti yɛli ti yaansi dahin’ shɛli ha ni bɛ ka tarili Yawɛ sani.’ ”

²⁸Ka ti tɛha nyɛla ni yi yi ni yɛli ti lala bee yi yaansi yi ni ti yɛli ti gba yaansi lala dahin’ shɛli ha, bɛ ni ti tooi yɛli, ‘Nyamiya, ti yaannim’ gba daa me sara maligu bimbin’ shɛli zali, ka di be kaman Yawɛ sara maligu bimbini ŋɔ, amaa ka di pala bɛ zaŋdila biŋkɔbiri m-maani sara pari di zuɣu nyɔri buɣim bee n-zaŋdi sar’ shɛŋa din pahi na nti maani di zuɣu, amaa di yɛn nyɛla shɛhira bini ti mini ya sunsuuni.’

²⁹Di ka ti tɛha puuni ni ti yi Yawɛ nyaaŋa ŋ-ŋmaligi ka chɛ o dolibu zuŋɔ dabisili ŋɔ, ka me sara maligu bimbini ni ti zaŋdi biŋkɔbiri maani sara pari di zuɣu nyɔri buɣim, ka mali bindira maani sara di zuɣu ni sar’ shɛŋa din pahi, ka pa ni Yawɛ ŋun nyɛ ti Naawuni ŋɔ sara maligu bimbini din ʒe o jɛmbu duu tooni la!”

³⁰Ka maligumaana Finɛhas mini Izraɛlnim’ daŋ kam ni dɔɣirikpamba bɛn daa pah’ o zuɣu maa ni daa wum Rubin mini Gaad ni Manaasa zuliya pirigili maa ni yɛli shɛm maa, ka di niŋ ba nyaɣisim pam.

³¹Ka maligumaana Ɛliɛza bia Finɛhas daa yɛli Rubin mini Gaad ni Manaasa zuliya pirigili daŋ niriba maa, “Zuŋɔ ti baŋya ni Yawɛ be ti sani, dama yi bi tum tuumbiɛɣu zaŋ chaŋ Yawɛ sani. Yi fa Izraɛlnim’ Yawɛ nuu ni bahi.”

³²Di saha ka maligumaana Ɛliɛza bia Finɛhas mini Izraɛlnim’ daŋ kam ni dɔɣirikpamba maa daa yi Rubin mini Gaad zuliya niriba maa sani Giliad tiŋgbɔŋ ni n-zaŋ bɛ zilinkom lab’ Izraɛlnim’ maa sani Keenan tiŋgbɔŋ ni ti yɛli ba.

³³Ka bɛ ni daa lab’ ti yɛli shɛm maa tiɣi Izraɛlnim’ maa nini, ka bɛ paɣi Naawuni, ka bi lan yɛli tɔbu lo n-chaŋ ti tuhi ba, ka saɣim Rubin mini Gaad zuliya niriba ni daa ʒi tiŋgbɔn shɛl’ ni maa yɛla.

³⁴Ka Rubin mini Gaad zuliya niriba maa daa yɛli, “Sara maligu bimbini ŋɔ nyɛla shɛhira bini ti mini ya sunsuuni ni Yawɛ n-nyɛ Naawuni.” Ka bɛ daa boli sara maligu bimbini maa yuli, “Shɛhira.”