Read Dagbani Jɔshua 23 Bible Online

Jɔshua 23 - Dagbani bible

Jɔshua 23

¹Yawɛ ni daa ti Izraɛlnim’ vuhim ka bɛ dimnim’ bɛn gili ba niŋ sunsuuni bi tooi niŋ ba shɛli ka di yuui pam la nyaaŋa, Jɔshua gba daa kurigiya pam di saha maa.

²Dinzuɣu ka o daa boli Izraɛlnim’ zaa mini bɛ kpamba ni bɛ zuɣulaannim’ ni bɛ sariakaritiba ni bɛ tuma kpamba na nti yɛli ba, “N kurigiya pam pumpɔŋɔ.

³Ka yi mi nini nya Yawɛ ŋun nyɛ yi Naawuni ŋɔ ni niŋ zuliya shɛba shɛlikam zaa yi zuɣu la; dama Yawɛ ŋun nyɛ yi Naawuni ŋɔ n-nyɛ ŋun daa tuhi ba tin ya.

⁴Nyamiya, n zaŋ zuliya shɛb’ bɛn na kpalim la tiŋgbana tin ya ni di leei yi dini m-pahi n ni pun nyaŋ zuliya shɛba Jɔɔdɛn Mɔɣili wulimpuhili polo zaŋ hal ti paai Mɛditirɛniɛn Teeku wulinluhili polo la.

⁵Yawɛ ŋun nyɛ yi Naawuni ŋɔ ni chɛ ka bɛ ŋmaligi yi tooni guui, ka kari ba ka bɛ zo ka chɛn ya. Ka yi deei bɛ tiŋgbana maa su kaman Yawɛ ŋun nyɛ yi Naawuni ŋɔ ni daa pun lɔn ya alikauli shɛm la.

⁶Dinzuɣu lomiya ania n-doli dinkam sabi Musa zaligu ni la, ka miriya ka yi ŋmaligi kpa nudirigu polo bee nuzaa polo ka chɛ li.

⁷Yi mi di zaŋya yimaŋ’ tabili zuliya shɛb’ bɛn na kpalim be yi ni la bee m-boli bɛ buɣa la yuya bee m-po ba bee n-jɛm ba bee n-damdi di tooni.

⁸Amaa kul ʒiɛnya Yawɛ ŋun nyɛ yi Naawuni ŋɔ yim kaman yi ni pun niŋdi shɛm hal ni zuŋɔ la.

⁹Dama Yawɛ pun kari zuliya shɛb’ bɛn galisi ka mali kpiɔŋ pam bahi ka chɛn ya, ka so na bi tooi zani yi tooni hal ni zuŋɔ.

¹⁰ Ka yi ninvuɣ’ yino kam karitimi doli ninvuɣ’ tuhili ka bɛ ŋmaligiri guura, Yawɛ ŋun nyɛ yi Naawuni ŋɔ ni tuhiri ba tiri ya kaman o ni daa pun lɔn ya alikauli shɛm la zuɣu.

¹¹Dinzuɣu lomiya ania n-yuri Yawɛ ŋun nyɛ yi Naawuni ŋɔ.

¹²Dama yi yi zaɣisi ka zaŋ yimaŋa n-tabili zuliya shɛb’ bɛn na kpalim be yi ni ŋɔ, ka kpuɣiri bɛ bipuɣinsi n-niŋdi yi paɣiba ka bɛ gba kpuɣiri yi bipuɣinsi n-niŋdi bɛ paɣiba,

¹³dindina yin’ baŋmiya ni yi yi lan kariti doli zuliya shɛb’ bɛn na kpalim be yi ni maa, Yawɛ ŋun nyɛ yi Naawuni ŋɔ ku lan kari ba bahi tin ya. Amaa ka bɛ ni be kaman zana bee tɔna la n-gbahi ya; ka be kaman fiɛb’ shɛli din fiɛb’ yi puluɣa ni bee go’ shɛŋa din kuhiri yi ninni hal ka yi ti bahi yoli zaa tiŋgbɔn viɛl’ shɛli Yawɛ ŋun nyɛ yi Naawuni ŋɔ ni zaŋ tin ya ŋɔ ni.

¹⁴“Pumpɔŋɔ, di kpalim biɛla ka n doli so shɛli sokam zaa ni dol’ la, ka yi zaa mi yi suhuri ni mini yi shihi ni ni Yawɛ ŋun nyɛ yi Naawuni ŋɔ ni lɔn ya bin sun’ shɛŋa zaa alikauli la zaɣ’ yini gba bi kɔŋ palibu. O chɛ ka di zaa niŋ pali hal ka di zaɣ’ yini gba bi kɔŋ palibu.

¹⁵Amaa o ni chɛ ka o ni lɔn ya bin’ sun’ shɛlikam zaa alikauli la niŋ pali zaŋ chaŋ yi sani shɛm la, yi yi zaɣis’ o noli, lala ka o ni lan chɛ ka yɛl’ biɛri balibu kam zaa lu yi zuɣu hal ka o ti bahi ya yoli zaa tiŋgbɔn sun shɛli ŋun’ Yawɛ ŋun nyɛ yi Naawuni ŋɔ ni zaŋ tin ya ŋɔ ni.

¹⁶Ka yi mi yi bi gbibi Yawɛ ŋun nyɛ yi Naawuni ŋɔ daalikauli shɛli o ni lɔn ya maa, ka damdi buɣa tooni jɛm li, dindina Yawɛ suhu ni yiɣisi pam bahi yi zuɣu, ka yi bahi yoli yomyom tiŋgbɔn sun shɛli o ni zaŋ tin ya ŋɔ ni.”