Read Dagbani Jɔshua 6 Bible Online

Jɔshua 6 - Dagbani bible

Jɔshua 6

¹Jɛrikɔnim’ daa kparila Jɛriko goondaa dunoya Izraɛlnim’ zuɣu; ka so ku tooi gari yi bee n-gari kpe di ni.

²Ka Yawɛ daa yɛli Jɔshua, “Nyama, n zaŋ Jɛriko mini di naa ni di tɔbbi’ biinsi niŋ yi nuu ni.

³A mini Izraɛl tɔbbihi zaa cham’ gilimi Jɛriko goondaa maa napɔŋ yim dahin yini kam n-niŋ lala hal ti paai daba ayɔbu.

⁴Chɛ ka maligumaaniba ayopɔin gbib’ piɛla’ yila kikah’ ayopɔin m-be Alikauli Adaka la tooni. Ka dabisi’ shɛli din ti pahir’ ayopɔin dali, nyin’ chɛ ka maligumaaniba maa zaŋ kikahi m-piɛbira, ka yi chaŋ gili Jɛriko maa napɔŋ buyopɔin.

⁵Ka yi yi ti wum ka bɛ piɛbiri piɛla’ yila kikahi maa ka di kumdi yuui, yinim’ bɛn nyɛ tɔbbihi maa zaa yin’ duhimi yi yee n-kul tahiri pampam, di saha tiŋ’ maa goondaa maa ni kab’ lu, ka yi zaa kab’ ti kpe di ni.”

⁶Ka Nan bia Jɔshua maa daa boli maligumaaniba na nti yɛli ba, “Kpuɣimiya Alikauli Adaka la, ka chɛ ka maligumaaniba ayopɔin gbibi piɛla’ yila kikah’ ayopɔin be Alikauli Adaka maa tooni.”

⁷O daa lan yɛli niriba maa, “Chɛliya ka bɛn gbib’ bidibbina be Yawɛ Daalikauli Adaka maa tooni ka yi chaŋ gili tiŋ’ maa.”

⁸Jɔshua ni daa pun wuhi niriba maa shɛm la zuɣu, maligumaaniba ayopɔin bɛn gbibi piɛla’ yila kikah’ ayopɔin n-ʒe Yawɛ tooni la n-daa gari tooni chani ka piɛbiri kikahi maa, ka bɛn ʒiri Yawɛ Alikauli Adaka maa doli ba.

⁹Ka tɔbbihi bɛn gbibi bidibbina be maligumaaniba bɛn daa piɛbiri kikahi maa tooni, ka tɔbbi’ shɛb’ bɛn lan gbibi bidibbina doli bɛ nyaaŋa, ka bɛ kul piɛbiri kikahi maa.

¹⁰Amaa ka Jɔshua daa lan yɛli niriba maa, “Miriya ka yi tahi bee n-chɛ ka so wum yi kukoya vuri bee n-chɛ ka yɛtɔɣ’ shɛli yi yi nol’ ni na; naɣila dahin’ shɛli n yi ti bahi ya noli ni yi tahima.”

¹¹Dinzuɣu ka o daa chɛ ka bɛ zaŋ Yawɛ Daalikauli Adaka maa n-chaŋ gili tiŋ’ maa napɔŋ yim, ka zaŋ li lab’ bɛ sansani maa ni ti gbe.

¹²Ka Jɔshua daa daŋ yiɣisibu asiba ni o mini maligumaaniba ni tɔbbihi chaŋ gili tiŋ’ maa m-pahi napɔŋ buyi dindali maa kaman bɛ ni daa pun niŋ shɛm la. Ka tɔbbihi bɛn gbibi bidibbina daa be tooni, ka maligumaaniba ayopɔin bɛn gbibi piɛla’ yila kikah’ ayopɔin m-pie tab’ pa bɛ zuɣu; ka maligumaaniba bɛn ʒiri Yawɛ Daalikauli Adaka la paya, ka tɔbbi’ shɛb’ bɛn lan gbibi bidibbina doli bɛ nyaaŋa. Ka bɛ kul piɛbiri kikahi maa.

¹⁴Dabisi’ shɛli din daa pahiri daba ayi maa dali, bɛ daa chaŋ gili tiŋ’ maa la napɔŋ yim ko, ka lan lab’ bɛ sansani maa ni yaha. Bɛ daa niŋ lala la daba ayɔbu.

¹⁵Ka dabisi’ shɛli din pahir’ ayopɔin dali biɛɣu daa ti neerina ka bɛ daŋ yibu ti chaŋ gili tiŋ’ maa kaman bɛ ni daa yi pun gindi li shɛm la napɔŋ buyopɔin. Kulla dindali maa kɔŋko ka bɛ daa gil’ li napɔŋ buyopɔin maa.

¹⁶Bɛ ni daa gindi napɔŋ din pahir’ ayopɔin maa ka maligumaaniba piɛbiri kikahi saha shɛli, ka Jɔshua daa yɛli niriba maa, “Tahimiya! Dama Yawɛ zaŋ tiŋ’ maa niŋ yi nuu ni.

¹⁷Tiŋ’ maa mini binshɛɣukam zaa din be di ni leela yi ni yɛn saɣim shɛli ti Yawɛ. Kulla Reehab ŋun nyɛ pagɔrili la mini ninvuɣ’ shɛb’ bɛn be o yiŋ’ kɔŋko ka di simdi ni yi tiligi, o ni daa zaŋ ti tuumba la sɔɣi la zuɣu.

¹⁸Amaa miriya ka yi kpuɣi di ni wuhi ni yi saɣimmi binshɛɣukam maa ni binshɛli, dama yi yi niŋ lala, yi ni bo yɛla ti Izraɛlnima, ka di bahi ba yoli bɛ sansan’ ni.

¹⁹Amaa bɛ ni zaŋ anzinfa mini salima m-mali binshɛŋa ni daanya lahi ni kuriti binyara din’ nyɛla binshɛŋa din be kasi Yawɛ sani. Ti ni zaŋ dina nti niŋ Yawɛ jɛmbu duu.”

²⁰ Ka bɛ daa piɛbi kikahi; ka niriba maa tahira. Niriba maa ni daa kul wum kikahi maa kumsi; bɛ daa duhila bɛ yee tahiri pampam, ka tiŋ’ maa goondaa maa dii kabi ti lu tiŋa; ka niriba maa dii zɔri tuhi bɛ tooni dɛde n-kab’ kpe tiŋ’ maa ni ti ŋme n-deei li.

²¹Ka bɛ daa zaŋ takɔbi n-ku dɔbba mini paɣiba ni bipola ni ninkura ni niɣi ni piɛri ni bunsi; ka saɣim binshɛɣukam din be tiŋ’ maa ni zaa.

²²Ka Jɔshua daa yɛli niriba ayi shɛba o ni daa tim ka bɛ chaŋ ti puɣisi kaai Jɛriko la, “Chamiya pagɔrili la yiŋa nti yih’ o mini ninvuɣ’ shɛb’ bɛn be o yiŋ’ na kaman yi ni daa pun po ni yi ni niŋ shɛm la.”

²³Ka nachimba maa daa chaŋ nti yihi Reehab min’ o ba ni o ma ni o tizɔdɔbba ni o dɔɣiriba zaa n-zaŋ ba ti ʒili kpaŋ’ ha miri Izraɛlnim’ sansani.

²⁴Ka bɛ daa niŋ buɣim dabi tiŋ’ maa, ka di di tiŋ’ maa mini binshɛɣukam din be di ni, naɣila anzinfa mini salima ni daanya kuriti la kɔŋko ka bɛ daa zaŋ ti niŋ Yawɛ jɛmbu duu nɛma biɛhigu shee.

²⁵ Amaa Jɔshua daa tiligi Reehab ŋun daa nyɛ pagɔrili la min’ o dɔɣiriba zaa; o ni daa zaŋ tuumba shɛb’ Jɔshua ni daa tim ni bɛ ti puɣisi kaai Jɛriko n-sɔɣ’ la zuɣu. Ka Reehab zuliya na kul be Izraɛl tiŋgbɔŋ ni hal ni zuŋɔ.

²⁶ Ka Jɔshua daa po pɔri di saha maa ha yɛli, “Ŋunkam ti yiɣisi ni o lab’ me Jɛriko zali, Yawɛ ŋun’ yɛlim’ noli ti o ka di di o.” Ŋunkam ti zali di tanzaa, o bidib’ kpɛm’ ni kpi; Ŋunkam mi ti mali di duno’ yɔriti, o bidibiga ŋun nyɛ biasani ni kpi.

²⁷Ka Yawɛ daa be Jɔshua sani; ka o yuli daa du pam bɛ tiŋgbɔŋ maa zaa ni.