Read Dagbani Jɔshua 8 Bible Online

Jɔshua 8 - Dagbani bible

Jɔshua 8

¹Ka Yawɛ daa yɛli Jɔshua, “Di chɛ ka dabiɛm mal’ a bee n-chɛ ka a suhu zɔhira. Zaŋm’ tɔbbihi zaa yiɣisi chaŋ Ai; nyama, n zaŋ Ai naa min’ o niriba ni o tiŋ’ maa ni o tiŋgbɔŋ maa niŋ yi nuu ni;

²ka yi ni niŋ di mini di naa kaman yi ni daa niŋ Jɛriko mini di naa shɛm la. Amaa dimbɔŋɔ ni dina, dimiya tiŋ’ maa nɛma zaŋ tabili di biŋkɔbiri. Chamiya ti sɔɣi dɔni tiŋ’ maa gulinyaaŋa polo.”

³Ka Jɔshua mini tɔbbihi maa zaa daa yiɣisi ni bɛ chaŋ Ai, ka Jɔshua daa pii tɔbutuhiri’ biinsi tuhi’ pihita n-chɛ ka bɛ chaŋ Ai yuŋ.

⁴O daa yɛli ba, “Nyamiya, yi yi chaŋ yin’ chamiya ti sɔɣi dɔni tiŋ’ maa gulinyaaŋa; di kaɣiya ti do katiŋa ka chɛ tiŋ’ maa, ka maliya shili viɛnyɛliŋga gu;

⁵ka m mini tɔbbi’ shɛb’ bɛn be n sani ni chaŋ ti liri ba. Ka bɛ yi ti yina ni ti mini ba zaŋ nya taba, ti ni ŋmaligi guui kaman ti ni daa pun niŋ shɛm la.

⁶Bɛ ni yi bɛ tiŋ’ maa ni na n-kari dol’ ti hal ka ti ti zaŋ ba yi kpaŋ’ ha ka chɛ bɛ tiŋ’ maa; dama bɛ ni yɛli, ‘Bɛ yaai ŋmaligi guuri kaman bɛ ni daa pun niŋ shɛm la.’ Ka ti yi ti ŋmaligi guui ka bɛ kariti dol’ ti, di saha maa yin’ yiɣisimiya yi sɔɣibu maa shee

⁷n-kpe bɛ tiŋ’ maa ni ti ŋme n-deei li; dama yi Duuma NAAWUNI ni zaŋ li niŋ yi nuu ni.

⁸Ka yi yi ŋme n-deei tiŋ’ maa, yin’ nyomiya li buɣim kaman Naawuni ni zali ya shɛm. N ni wuhi ya ni yi niŋ shɛm m-bala.”

⁹Ka Jɔshua daa bahi ba noli ni bɛ chama, ka bɛ daa chaŋ ti dɔni bɛ sɔɣibu shee din daa be Bɛtɛl mini Ai sunsuuni zaŋ kpa Ai wulinluhili polo la; amaa ka Jɔshua ŋun’ daa kpalim gbe niriba maa sani.

¹⁰Ka Jɔshua daa ti daŋ yiɣisibu asibaasi n-laɣim tɔbbihi pahi Izraɛlnim’ kpamba zuɣu ka bɛ chaŋ Ai.

¹¹Ka tɔbbihi bɛn zaa daa be o sani chaŋ ti dɔni Ai nuzaa polo m-miri li, ka vinvamli do bɛ mini Ai sunsuuni.

¹²Ka o daa chɛ ka tɔbbihi tusaanu laasabu chaŋ ti dɔni Ai wulinluhili polo luɣ’ shɛli din be Bɛtɛl mini Ai sunsuuni.

¹³Lala ka bɛ daa piri tɔbbihi maa sɔŋ n-gu tɔbu maa. Bɛ daa chɛ ka tɔbbihi bɛn galisi pam dola tiŋ’ maa nuzaa polo, ka chɛ ka bɛn kpalim mi do tiŋ’ maa wulinluhili polo. Amaa ka’ Jɔshua daa gbe vinvamli maa ni.

¹⁴Ka Ai naa ni daa nya Izraɛl tɔbbihi maa, o min’ o tiŋ’ maa ni niriba zaa daa niŋla yomyom n-daŋ yibu asibaasi n-kab’ sirigi Araba zolɔŋni ni bɛ mini Izraɛlnim’ ti tuhi. Amaa bɛ daa bi mi ni tɔbbihi sɔɣ’ do bɛ tiŋ’ maa gulinyaaŋa.

¹⁵Ka Jɔshua mini tɔbbi’ shɛb’ bɛn daa be o sani zaa ŋmaligi guui n-niŋ kaman Ainim’ nyaŋ ba mi la n-zo n-kpa mɔɣu polo.

¹⁶Dinzuɣu ka bɛ daa chɛ ka niriba bɛn zaa be bɛ tiŋ’ maa ni laɣim yi n-kari doli Jɔshua min’ o tɔbbihi maa. Bɛ ni daa kariti doli Jɔshua min’ o tɔbbihi maa, ka bɛ daa zaŋ Ainim’ maa n-yi kpaŋ’ ka chɛ bɛ tin’ maa.

¹⁷Doo daa bi lan kpalim Ai bee Bɛtɛl. Bɛ daa yimi kari doli Izraɛlnima, ka chɛ bɛ tiŋ’ maa dunoli yali.

¹⁸Di saha ka Yawɛ daa yɛli Jɔshua, “Zaŋmi kpani din be a nuu ni ŋɔ tiri Ai; n ni zaŋ li niŋ a nuu ni.” Ka Jɔshua daa zaŋ kpani din be o nuu ni maa tiri.

¹⁹O ni daa kul kpuɣ’ o nuu maa tiri saha shɛli maa, ka Izraɛl tɔbbihi bɛn daa sɔɣ’ doya la dii vaai yiɣisi bɛ dooshee ti kpe tiŋ’ maa ni n-deei li ka niŋ buɣim nyo li yomyom bahi.

²⁰Ainim’ ni daa ŋmaligi lihi bɛ nyaaŋa nya ka buɣim diri ka di nyɔhi kpuɣi du zuɣusaa bɛ tiŋ’ maa ni, bɛ daa bi lan mi bɛ ni yɛn zo n-kpa shɛli polo tiligi; dama tɔbbihi bɛn daa guuri kpɛri mɔɣu ka bɛ doli ba la daa ŋmaligimina lu bɛna bɛn daa kariti doli ba maa zuɣu.

²¹Jɔshua mini Izraɛlnim’ zaa ni daa nya ka bɛ tɔbbi’ shɛb’ bɛn daa sɔɣ’ doya la deei tiŋ’ maa, ka di nyɔhi kpuɣi du zuɣusaa maa, ka bɛ daa ŋmaligina n-lu Ainim’ maa zuɣu n-dii ŋmɛri kuri ba.

²²Ka Izraɛl tɔbbi’ shɛb’ bɛn daa be Ai tiŋ’ puuni la daa kana ti pahi bɛ tab’ maa zuɣu ka bɛ gili Ainim’ maa niŋ sunsuuni, ka shɛb’ be yaɣ’ yini polo, ka bɛn kpalim mi be yaɣ’ din’ la polo. Ka Izraɛlnim’ daa ku Ainim’ maa hal ka bɛ ni yino gba ti bi kpalim bee n-zo n-tiligi.

²³Amaa bɛ daa gbaala Ai naa zaɣ’ nɛɔŋ n-zaŋ o ti ti Jɔshua.

²⁴Izraɛlnim’ ni daa zaŋ takɔbiri ku Ainim’ maa zaa naai bɛ ni daa kari ba ti zali mɔɣu ni luɣ’ shɛl’ la, bɛ zaa daa labila Ai tiŋ’ puuni nti zaŋ takɔbiri ku ninvuɣ’ shɛb’ bɛn be di ni zaa.

²⁵Ka bɛ daa ku Ainim’ bɛn nyɛ dɔbba mini paɣiba zaa dindali maa, ka bɛ kalinli daa yiɣisi tuhi’ pinaayi.

²⁶Jɔshua ni daa kul zaŋ kpan’ la tiri Ai, o daa bi zaŋ o nuu siɣisi tiŋ’ hal ka bɛ ti ku Ainim’ maa zaa.

²⁷Ka Izraɛlnim’ daa di tiŋ’ maa ni nɛma, ka gbahi niɣi pahi kaman Yawɛ ni daa pun yɛli Jɔshua shɛm.

²⁸Ka Jɔshua daa chɛ ka bɛ nyo Ai buɣim, ka di di n-kab’ lu n-duhiduhi doya; ka na kul doya lala hal ni zuŋɔ.

²⁹Ka Jɔshua daa chɛ ka bɛ zaŋ Ai naa yili tia n-chɛ o yili tia maa zuɣu hal ni zaawuni. Ka wuntaŋ’ daa ti yɛn lu ka o chɛ ka bɛ yilig’ o tia maa zuɣu na n-zaŋ o ti bahi bɛ tiŋ’ maa dunoli shee n-kahi kuɣa pa o zuɣu hal nti duhi li zaɣ’ du’ titali sɔŋ, ka di na kul do nimaani lala hal ni zuŋɔ.

³⁰Ka Jɔshua daa chɛ ka bɛ me bimbini tam Ɛbal Zol’ zuɣu ti Yawɛ ŋun nyɛ Izraɛlnim’ Naawuni ŋɔ.

³¹ O daa chɛ ka bɛ me li mi kaman Yawɛ dabili Musa ni daa wuhi Izraɛlnim’ ni bɛ mɛm’ li kaman di ni sab’ Musa zaligu litaafi ni wuhi shɛm la. Dina n-nyɛ: Zaŋmiya kuɣ’ shɛŋa bɛ ni bi kpe ka di nyɛ so ni na bi zaŋ kur’ bini shihi shɛli m-me bimbini. Ka bɛ daa mali sara shɛli bɛ ni zaŋdi nyɔri buɣim la bimbini maa zuɣu ti Yawɛ ka daa mali suhudoo sara maligunim’ gba.

³² Ka Jɔshua daa sabi zaligu shɛli Musa ni daa pun sab’ zal’ la pa kuɣa maa zuɣu Izraɛlnim’ ninni.

³³Ka Izraɛlnim’ zaa mini tinzunnim’ ni bɛ ni dɔɣi shɛb’ nimaani ni bɛ kpamba ni bɛ tuma zuɣulaannima ni bɛ sariakaritiba daa zani Alikauli Adaka la yaɣa ayi, ka bɛ nina kpa Lɛvinim’ bɛn daa nyɛ maligumaaniba bɛn ʒiri Yawɛ Alikauli Adaka maa la. Bɛ pirigili daa ʒiɛla Gɛrizim Zoli tooni, ka bɛ pirigili bɛn kpalim mi ʒe Ɛbal Zoli tooni kaman Yawɛ dabili Musa ni daa pun yɛli ba ni bɛ niŋm’ shɛm bɛ yi ti yɛn niŋ alibarika niŋ Izraɛlnim’ ni la.

³⁴Di nyaaŋa ka Jɔshua daa karim yɛtɔɣ’ shɛlikam din daa be zaligu kundi la ni. O daa karim alibarika mini noli yɛlibu yɛla kaman di zaa ni daa sabi zaligu kundi maa ni shɛm.

³⁵ Jɔshua daa karim Musa ni daa zali zaligu shɛŋa maa zaa wuhi Izraɛlnim’ laɣiŋgu maa zaa zaŋ tabili paɣiba ni bihi ni tinzunnim’ bɛn daa be bɛ ni.