Read Dagbani 2 Tɛsalɔnikanima 2 Bible Online

2 Tɛsalɔnikanima 2 - Dagbani bible

2 Tɛsalɔnikanima 2

¹ Ti mabihi, zaŋ chaŋ ti Duuma Yisa Masia labbuna mini ti ni ti yɛn laɣim tuh’ o sol’ la yɛla polo, ti suhiri ya

²ni yi di chɛ ka yi suhuri zɔhira bee n-jiɣiri yi ni wum ni ti Duuma labbuna dabisili la dali pun gari la zuɣu. Di pa shɛli so n-tɔɣisi anabitali yɛtɔɣa bee n-yihi waazu yɛl’ lala bee ŋ-ŋɔ so n-yɛli ni tinima n-sabi gbaŋ puuni yɛl’ lala.

³Di chɛliya ka so yɔhim ya baabiɛla, dama di dabisili maa ku kana faashee Naawuni zaɣisibu din bahindi nyaaŋa la ti niŋ, ka Zaliguzaɣisir’ so Naawuni ni pun lo ni o bah’ o yol’ la gba ti yi zahira.

⁴ O ni ti zaɣisi binshɛɣukam ninsalinim’ ni jɛmdi mini ninsalinim’ ni lihi so Naawuni la; o ni ti duh’ omaŋ’ gari dimbɔŋɔnim’ zaa ha; hal o ni ti kpe Naawuni jɛmbu duu ti ʒini, ka yɛri ni o nyɛla Naawuni.

⁵Yi bi teei ni n ni daa be yi san’ la, n daa pun yɛli ya dimbɔŋɔ yɛla?

⁶Ka yi mi din na taɣi di niŋbu zali. Dina n-nyɛ ni di chɛ ka Zaliguzaɣisira la ti yi zahira o saha dɛde.

⁷Zaliguzaɣisibutali pun be di tuma tumbu ni, amaa din yɛn niŋ maa na ku niŋ faashee Naawuni ti vuui ŋun taɣi di niŋbu zali maa.

⁸ Di saha maa ka Zaliguzaɣisira maa ni ti yi zahira, ka ti Duuma Yisa ni ti zaŋ o vuhim pɔhim din yir’ o nol’ ni na ku o ka bah’ o yoli, ŋun’ Yisa palo yibu dali o labbuna saha.

⁹ Zaliguzaɣisira maa ni ti yi zahira Sintani yiko ni, ka mali yiko pam din ni tum alahiziba tuma balibu kam ka wuhi shihira, ka tum alahiziba tumtumsa din nyɛ yɔhiŋgu.

¹⁰Ka o ni ti zaŋ yɔhiŋgu maa n-yɔhim ninvuɣ’ shɛb’ bɛn ti yɛn bahi yol’ la. Din chɛ ka bɛ ti yɛn bahi yoli maa nyɛla bɛ ni zaɣisi ni bɛ yu yɛlimaŋli ka tiligi la zuɣu.

¹¹Daliri ŋɔ zuɣu ka Naawuni chɛ ka biriginsim yiko kpe bɛ ni birigi ba, ka bɛ doli ʒiri soli.

¹²Ka din beni nyɛla ninvuɣ’ shɛb’ bɛn zaa bi niŋ yɛlimaŋli la yɛda, amaa ka chɛ ka bɛ suhuri kul yɛla alahichi tumbu nyaɣisim zuɣu la ni ti nya saria karibu.

¹³Ti mabihi bɛn nyɛ ti Duuma ni yuri shɛb’ la, di kpala talahi ni ti kul paɣiri Naawuni yi zuɣu sahakam, dama piligu ni ha ka Naawuni daa zali ya ni yi nya tiliginsim, yi ni niŋ yɛlimaŋli la yɛda ka Naawuni Shia Kasi mali ya ka yi be kasi la zuɣu.

¹⁴Ti ni daa zaŋ lahibal’ suŋ waazu yihi tin ya la zuɣu ka Naawuni boli ya ni yi mini ti Duuma Yisa Masia ti laɣim nya o jilima.

¹⁵Dinzuɣu ti mabihi, ʒiɛnya viɛnyɛliŋga, ka gbibiya wuhibu shɛŋa ti ni pun wuhi ya ti waazu yihibu ni mini ti ni sab’ gban’ shɛŋa tin ya la puuni la.

¹⁶Ti suhiri ti Duuma Yisa Masia maŋmaŋa mini Naawuni ŋun nyɛ ti Ba ka yuri ti, ka nyɛ ŋun ti ti suhukpaŋsibo din ka bahigu mini tahima suŋ o daanfaani puuni la

¹⁷ni o kpaŋsi yi suhuri zaa, ka chɛ ka yi mali kpiɔŋ yi zaɣ’ suŋ kam tumbu mini yi yɛtɔɣ’ suŋ kam tɔɣisibu ni.