Read Dagbani 1 Timoti 1 Bible Online

1 Timoti 1 - Dagbani bible

1 Timoti 1

¹Man’ Pool ŋun nyɛ Yisa Masia tumo Naawuni ŋun nyɛ ti Tiligira ŋɔ mini Yisa Masia ŋun nyɛ ti tahima la ni zal’ li shɛm la puuni n-sabiri gbaŋ ŋɔ

² tiri Timoti ŋun nyɛ m bi’ maŋli ti daadiini soli yɛda niŋbu ni la. Ti Ba Naawuni mini ti Duuma Yisa Masia zom’ a nambɔɣu, ka niŋ alibarika niŋ a ni, ka ti a suhudoo!

³N kpamd’ a jaande ni a kul kpalimmi be Ɛfɛsus kaman n ni daa gariti chani Masidɔnia ka yɛl’ a shɛm la, ka di chɛ ka a kpahi ninvuɣ’ shɛb’ bɛn wuhiri ʒiri wuhibu la zuɣu ni ka bɛ chɛ li.

⁴Yɛlim’ ba ni bɛ chɛli kurimbuni ha lahibal’ shɛŋa din pa yɛlimaŋli mini dɔɣirikpamba yuya din ka tariga la yɛla bɔhimbu, dama di nyɛla din kul tahiri yɛla zaŋ buɣisi tab’ na kɔŋko, ka pa ni Naawuni ni zali wuhibu maŋli shɛli din kpaŋsiri adiini soli yɛda niŋbu la.

⁵Ti ni tɔɣisiri zuɣu ni kpahibu yɛl’ shɛŋa yɛla ŋɔ daliri nyɛla ni di kpaŋsi yurilim din yiri suhu din ka daɣiri mini suhu ni tɛha din ka galimi ni yɛda niŋbu maŋli ni na.

⁶Ninvuɣ’ shɛb’ bɛn ŋmaligi ka chɛ dimbɔŋɔnim’ leela bɛn birigi yɛtɔɣ’ chɔɣima tɔɣisibu puuni.

⁷Bɛ suhuri kul yɛmi ni bɛ leei Naawuni zaligu karimbanima, amaa ka lee bi baŋdi bɛ ni mali yɛtɔɣ’ shɛŋa n-tɔɣisiri maa gbinni bee m-mi bɛ ni niŋ binshɛŋa naani ka tɔɣisiri di yɛla maa ni nyɛ shɛli.

⁸Ti mi ni Naawuni fukumsi zaligu nyɛla zaɣ’ viɛlli, nir’ yi dol’ li n-tum di ni wuhi shɛm.

⁹Ka di niŋ kamaata ni ti baŋ ni Naawuni bi zali o zaligunim’ la ninvuɣ’ shɛb’ bɛn tumdi din tuhi zuɣu, amaa o zal’ li la zaliguzaɣisiriba mini tipawumlinima ni bɛn bi luri Naawuni sizuura ni alahichinim’ zuɣu. O lan zal’ li la bɛn biɛhigu bi be kasi ka bɛ baɣa ka Naawuni yɛla ni la mini bɛn kuri bɛ banima bee bɛ manim’ la ni ninvuɣ’ kuriba

¹⁰zaŋ tabili bɛn tumdi niŋgbuŋ kɔre tuma mini dɔbba bɛn gɔndi bɛ dɔtaba bee paɣiba bɛn gɔndi bɛ paɣitaba ni bɛn zaŋdi muɣisigu gbahiri niriba ni ʒiŋmariba ni bɛn zaa niŋdi din chihiri wuhibu maŋa la zuɣu.

¹¹Wuhibu maa bela lahibal’ sun shɛli Naawuni ŋun nyɛ jilimalana mini alibarikalan’ ŋɔ ni zaŋ niŋ n nuu ni ni m mol’ li la puuni.

¹²M paɣiri ti Duuma Yisa Masia ŋun ti ma yaa ni n tum ŋɔ. M paɣir’ o o ni lihi ma ka n simdi ni o pii ma ka n tum o tuma,

¹³ hal n ni nyɛla ŋun daa yɛr’ o zilima ka niŋd’ o alaka ka tur’ o la zaa yoli. Amaa Naawuni daa zo ma nambɔɣu, dama n daa niŋ li la ʒilinsi ni n ni daa na bi niŋ yɛda la zuɣu.

¹⁴Di saha maa ka ti Duuma daa niŋ anfaani din galisi pam niŋ n ni, ka ti ma yɛda mini yurilim din be Yisa Masia ni la.

¹⁵Yɛtɔɣili ŋɔ nyɛla yɛlimaŋli, ka simdi ni nir’ dee’ li zaa. Dina n-nyɛ: Yisa Masia daa ka dunia ŋɔ ni na ni o ti tiligila alahichinima; mani mi n-nyɛ alahichilana n-gari sokam.

¹⁶Amaa Naawuni daa zo ma nambɔɣu ni di chɛ ka Yisa Masia wuh’ o suɣilɔdibo zaa ni nyɛ shɛm man’ ŋun nyɛ alahichilana n-gari sokam zaa ŋɔ sani; ka di leei ninvuɣ’ shɛb’ bɛn na yɛn niŋ o yɛda n-nya nyɛvili din ka bahigu la ni ni doli so’ shɛli.

¹⁷Paɣimiya Naawuni ŋun nyɛ ʒiɛmani kam Naa, ka nyɛ ŋun kul be, ka nyɛ ninsalinim’ nini ni ku tooi nya so, ka lan nyɛ ŋun kɔŋko kul nyɛ Naawuni, ka simdi tibigibu mini jilima tibu ŋɔ hal ni saha din ka bahigu! Ami!

¹⁸M bia Timoti, n zaŋ niriba zuɣu ni kpahibu yɛla ŋɔ niŋ a nuu ni. Di nyɛla anabitali yɛtɔɣa ni yɛli shɛm zaŋ chaŋ a polo. Chɛ ka di yɛtɔɣa maa leeg’ a bidibbina ka a zaŋ li tuhi tuhiri suŋ.

¹⁹Gbib’ a yɛda niŋbu min’ a suhu ni tɛha ka di ku mali galimi. Ninvuɣ’ shɛb’ ni bi doli suhu ni tɛha ŋɔ tatabo ni wuhi shɛm zuɣu chɛ ka bɛ yɛda niŋbu saɣim.

²⁰Bɛ ni shɛba n-nyɛ Haimɛnaius mini Alikizanda bɛn nyɛ n ni zaŋ shɛb’ niŋ Sintani nuu ni bɛmaŋmaŋ’ sɔŋsim nyabu zuɣu ni di chɛ ka bɛ baŋ ni di bi simdi ni bɛ mo Naawuni la.