Read Dagbani 1 Timoti 4 Bible Online

1 Timoti 4 - Dagbani bible

1 Timoti 4

¹Naawuni Shia Kasi yihi yɛli ni ʒiɛmana din bahindi nyaaŋa puuni, ninvuɣ’ shɛb’ ni ti chɛ yɛda niŋbu soli dolibu ka wumdi tirila shi’ biɛri bɛn yɔhindi niriba la ka ni dolila alizin’ biɛri wuhibu.

²Wuhibunim’ ŋɔ yirila ninvuɣ’ yɔhindiba bɛn nyɛ ʒirinima, ka bɛ suhuri ni tɛha diɣilim kaman kur’ tulli n-tabili li n-di li la sanna.

³Niriba ŋɔ tatabo wuhiri ni di bi tuhi ni nir’ kpuɣ’ paɣa bee n-diri bindira balibu shɛŋa Naawuni ni nam ti salinima ni bɛn niŋ yɛda ka baŋ yɛlimaŋli la diri li ka paɣiri ŋun’ Naawuni di zuɣu la.

⁴Naawuni ni nam binshɛɣukam nyɛla din viɛla, ka di bi simdi ni ti siŋ li, tinim’ dee yi di li ni Naawuni paɣibu,

⁵dama Naawuni yɛligu mini wunsuhigu nyɛla din chɛ ka di leeri din be kasi Naawuni sani.

⁶A yi zaŋ n ni wuh’ a shɛli ŋɔ wuhi ti mabihi la, a ni niŋ Yisa Masia tumtumdi’ suŋ, a ni zaŋ yɛda niŋbu yɛtɔɣa mini wuhibu suŋ shɛli a ni pun dol’ la n-dih’ amaŋ’ la zuɣu.

⁷Di chɛ ka a baɣa be kurimbuni lahibaya din bi luri Naawuni sizuura ka nyɛ din pa yɛlimaŋli la ni. Kul zaŋm’ amaŋ’ niŋla wuntia soli yɛla bɔhimbu ni.

⁸Niŋgbuŋ maŋdahimbu mali nyɔri shɛli di ni, amaa wuntia soli puuni maŋdahimbu malila nyɔri shɛlikam ni, dama di lo ti nyɛvili alikauli ʒiɛmani ŋɔ ni zaŋ tabili saha din ka bahigu puuni.

⁹Yɛtɔɣili ŋɔ nyɛla yɛlimaŋli, ka simdi deebu zaa.

¹⁰Dimbɔŋɔ zuɣu ka ti diri wahala ka tumdi ti yaa tariga, dama ti zaŋ ti tahima zaa niŋla Naawuni ŋun be ŋɔ ni. Ŋuna n-nyɛ sokam zaa Tiligira, di bahi bamdi bɛn niŋ o yɛda la.

¹¹Zaŋm’ dimbɔŋɔnim’ wuhimi niriba, ka zali ba ni bɛ dol’ li.

¹²Di saɣi ka so ʒiɛm a a bipalitali zuɣu, amaa chɛ ka a yɛtɔɣa min’ a ni niŋdi shɛm ni a yurilim ni a yɛda niŋbu ni a biɛr’ kasi wuhi ni a biɛhigu nyɛla yɛdaniŋdiba ni ni dol’ shɛli naba.

¹³Zaŋ chaŋ n ti yɛn kana, kpaŋm’ amaŋ’ karimmi Naawuni Kundi niriba ni, ka yihimi waazu, ka wuhimi niriba.

¹⁴Toondaannim’ ni daa zaŋ bɛ nuhi pa a zuɣu ka Naawuni ti a pin’ shɛli anabitali yɛtɔɣa tɔɣisibu puuni la, miri ka a zaŋ li niŋ a baɣaka.

¹⁵Doli dimbɔŋɔnima, ka zaŋ amaŋ’ ti li, ka di chɛ ka sokam nya a tooni chandi a tuma puuni ni nyɛ shɛm.

¹⁶Gbib’ amaŋ’ viɛnyɛliŋga, ka lihim’ a wuhibu viɛnyɛliŋga. Kul niŋmi dimbɔŋɔnima, dama a yi niŋdi lala, a ni tilig’ amaŋa zaŋ tabili bɛn wumd’ a wuhibu.