Read Dagbani 2 Timoti 1 Bible Online

2 Timoti 1 - Dagbani bible

2 Timoti 1

¹Man’ Pool ŋun nyɛ Yisa Masia tumo Naawuni ŋun daa lo ti nyɛvili shɛli din be Yisa Masia ni alikauli la yubu puuni la n-sabiri gbaŋ ŋɔ

² tiri m biyurigu Timoti. Ti Ba Naawuni mini ti Duuma Yisa Masia zom’ a nambɔɣu, ka niŋ alibarika niŋ a ni, ka ti a suhudoo!

³M paɣiri Naawuni so n ni jɛmdi n suhu ni tɛha din ka galimi puuni kaman n yaannim’ ni daa jɛm o shɛm la. N kul teer’ a yɛla n wunsuhigu ni yuŋ ni wuntaŋ’ ni, ka paɣiri Naawuni di zuɣu.

⁴N yi ti teeg’ a nintam la yɛla, n suhu kul yɛla a nyabu zuɣu ni di chɛ ka n nya suhupiɛlli.

⁵ N teeg’ a ni mali yɛda maŋli shɛl’ la yɛla. Di nyɛla yɛda shɛli a yabipaɣa Lɔis mini a ma Yunis ni daa mal’ la tatabo, ka m mi ni a gba shiri mal’ li.

⁶Dinzuɣu m bɔri ni n teeg’ a Naawuni ni daa ti a pin’ shɛli ka di be a ni n ni daa zaŋ n nuhi pa a zuɣu saha shɛl’ la yɛla. Tiɣisim’ li niŋ kaman nir’ ni tiɣisiri buɣim ka di taari diri shɛm la;

⁷dama Naawuni bi zaŋla shia ŋun ni chɛ ka ti zɔri dabiɛm ti ti, amaa shi’ so ŋun ni chɛ ka ti mali yiko mini yurilim ni maŋgbibbu ka o zaŋ ti ti.

⁸Dinzuɣu di zɔri vi ni a di ti Duuma bee man’ ŋun nyɛ o dansarika ŋɔ shɛhira, amaa Naawuni yiko ni, chɛ ka m min’ a laɣim di wahala lahibal’ suŋ maa zuɣu.

⁹Ŋuna n-daa tiligi ti ka boli ti ni di chɛ ka ti be kasi, ka di pala ti ni tum shɛli zuɣu, amaa di nyɛla omaŋmaŋ’ ni lo shɛm min’ o daanfaan’ shɛl’ o ni daa pun niŋ niŋ ti ni Yisa Masia zuɣu ʒiɛmana din gari la ni ha la zuɣu.

¹⁰Ka pumpɔŋɔ di yipa kahigi wuhi ti Yisa Masia ŋun nyɛ ti tiligira kandina la zuɣu. Ŋuna n-nyɛ ŋun daa nyaŋ kum zaa, ka kahigi wuhi ni nyɛvili mini niŋgbun shɛli din bi poori beni lahibal’ suŋ la zuɣu.

¹¹ Lala zuɣu ka Naawuni daa pii ma n-leei lahibal’ suŋ ŋɔ molomoona mini di tumo ni di karimba,

¹²dinzuɣu ka n diri wahala ŋɔ. Amaa vi bi mali ma, dama m mi n ni niŋ so yɛda, ka mi ni o ni tooi gbibi n ni zaŋ shɛli niŋ o nuu ni la hal ti paai ti Duuma labbuna dabisili la dali.

¹³Doli wuhibu maŋ’ shɛŋa n ni daa zaŋ wuh’ a la yɛda niŋbu mini yurilim shɛli din be Yisa Masia ni la puuni.

¹⁴Ka gbib’ yɛlimaŋ’ shɛli Naawuni Shia Kasi ŋun be ti ni ni zaŋ niŋ a nuu ni la.

¹⁵A mi ni bɛnkam be Ɛsha daa zoya ka chɛ ma, bɛ ni shɛba n-nyɛ Faijɛlus mini Hɛrimɔjɛneez.

¹⁶N suhiri ti Duuma ni o zom’ Onɛsifɔrus yiŋnim’ nambɔɣu, dama o nyɛla ŋun daa kul kpaŋsiri n suhu waawaayili; ka vi bi mal’ o zoligɔnim’ din lo ma la zuɣu.

¹⁷O ni daa paai Rom na, o daa bo n shee ni nimmoo hal ti nya ma.

¹⁸Ka a mi o ni daa tum tuun’ sun shɛŋa Ɛfɛsus la gba yɛla viɛnyɛliŋga. Ti Duuma chɛ ka o ti nya nambɔzɔbo o sani ŋun’ ti Duuma labbuna dabisili la dali.