Read Dagbani 2 Timoti 3 Bible Online

2 Timoti 3 - Dagbani bible

2 Timoti 3

¹Baŋmi dimbɔŋɔ: ʒiɛmana din bahindi nyaaŋa puuni nandahima ni ti beni sahasaha.

²Di saha maa daadamnim’ ni ti nyɛla bɛn yuri bɛmaŋ’ yaɣi, ka shɛb’ nyɛ laɣiyuriba, ka shɛb’ nyɛ karimbaannima, ka shɛb’ nyɛ barinyuriba, ka shɛb’ nyɛ ninvuɣ’ turiba, ka shɛb’ nyɛ bɛn bi deeri bɛ laamba noli, ka shɛb’ nyɛ gutulinima, ka shɛb’ nyɛ bɛn biɛhigu bi be kasi.

³Ka bɛ ni shɛb’ ni nyɛla ninkuunsinima mini halikpɛmanima ni munaafichinima ni bɛn bi gbaari bɛmaŋa ni ninvuɣ’ yarisi ni bɛn je zaɣ’ suŋ

⁴ni nyaanyiriba ni bɛn baɣa ka shɛl’ ni ni maŋduhiriba ni bɛn yuri niŋgbuŋ kɔre nyaɣisim gari Naawuni.

⁵Bɛmbɔŋɔnim’ nyɛla bɛn doli adiini soli kaya, amaa ka lee chihi di yiko. Gbaam’ amaŋ’ ni niriba ŋɔ tatabo.

⁶Niriba ŋɔ ni shɛb’ nyɛla bɛn doli yɛŋkiŋkabina soli n-kpɛri yiya ni ti liriti paɣ’ shɛb’ bɛn yɔhimbu bi to, ka lan nyɛ bɛn daalahichi taali muɣisiri ba ka kɔre balibu kam mali ba niŋdi di yubu la.

⁷Paɣiba ŋɔ nyɛla bɛn kul kpaŋdi bɛmaŋa ni bɛ bɔhim baŋ shɛli, amaa ka lee ku tooi baŋ yɛlimaŋli ni nyɛ shɛli.

⁸ Dɔbba ŋɔ mi nyɛla bɛn tɛha bie ni bɛn yɛda niŋbu pa alali. Janeez mini Jambireez ni daa chihi Anabi Musa yɛligu shɛm la, lala ka bɛ gba chihiri din nyɛ yɛlimaŋli;

⁹amaa bɛ ku chaŋ tooni, dama sokam ni nya bɛ jɛritali tuma kaman bɛ ni daa nya niriba ayi ŋɔ jɛritali tuma shɛm la.

¹⁰Amaa nyin’ pun kpahim baŋ n wuhibu mini m biɛhigu ni n ni lo shɛm m bebu ni ni n yɛda niŋbu yɛla zaŋ tabili n daania niŋbu ni n yurilim ni n ʒiɛyimtali

¹¹ ni n daalaka nyabu ni n wahala dibu. A mi dinkam zaa daa niŋ ma mini alaka biɛ’ shɛŋa n ni daa nya Antiɔk mini Aikɔnium ni Listra la gba yɛla; amaa ti Duuma daa fa ma di zaa ni bahi.

¹²Yɛlimaŋli, ninvuɣ’ shɛb’ bɛn zaa bɔri ni bɛ mali Naawuni sizuura lubu biɛhigu Yisa Masia zuɣu ni bahi nya alaka.

¹³Ka ninvuɣ’ biɛri mini karimba ʒirinim’ kul ni chani tooni n-tumdi din bie nti yaɣi, ka yɔhindi niriba, ka bɛmaŋmaŋ’ gba ni ti lu yɔhiŋgu ni.

¹⁴Amaa nyin’ kul dol’ a ni daa bɔhim yɛlimaŋ’ shɛŋa yɛla ka niŋ li yɛda la viɛnyɛliŋga. A mi a karimbanim’ ni nyɛ shɛba.

¹⁵A bilim ni ha mi ka a pun mi Naawuni Sabbu Kasi din ni tooi wuh’ a tiliginsim soli Yisa Masia yɛda niŋbu zuɣu la.

¹⁶Ka yɛtɔɣ’ shɛŋa zaa din be Naawuni Kundi ni yila Naawuni nol’ ni na, ka nyɛ din mali buchi pam zaŋ chaŋ wuhibu mini saɣisibu ni zuɣu ni kpahibu ni wuntia soli wuhibu polo.

¹⁷Di ni chɛ ka Naawuni nir’ bebu mali m-be viɛnyɛliŋga zaa, ka o mali din ni chɛ ka o tooi tum tuun’ suŋ kam.