Read Dagbani Taitus 1 Bible Online

Taitus 1 - Dagbani bible

Taitus 1

¹Gbaŋ ŋɔ yila man’ Pool ŋun nyɛ Naawuni dabili mini Yisa Masia tuun’ so o ni tim ni n ti kpaŋsi Naawuni ninvuɣ’ gahinda yɛda mini bɛ yɛlimaŋli baŋbu din nyɛ din luri Naawuni sizuura la sanna.

²Dimbɔŋɔ tamla nyɛvili din ka bahigu tahima zuɣu. Naawuni ŋun ku ŋma ʒiri ŋɔ daa lo ti nyɛvili ŋɔ alikauli la ʒiɛmana din gari la ha ni.

³Ka di saha dɛde daa ti paai ka o kahigi li wuhi palɔni o lahibal’ sun shɛli o ni zaŋ niŋ n nuu ni, ka m mol’ li kaman ŋun’ Naawuni ŋun nyɛ ti Tiligira ŋɔ ni zal’ li shɛm la.

⁴ N sabiri gbaŋ ŋɔ n-tirila Taitus ŋun nyɛ m bi’ maŋli ti daadiini soli yɛda niŋbu ni la. Ti Ba Naawuni mini Yisa Masia ŋun nyɛ ti Tiligira la niŋm’ alibarika niŋ a ni, ka zo a nambɔɣu ka ti a suhudoo!

⁵N daa chɛ a Kriit ni a niŋla binshɛŋa din simdi niŋbu la, ka pii cheechi toondaannima n-zali tiŋ’ kam ni kaman n ni daa pun wuh’ a shɛm la.

⁶ Dina n-nyɛ: Di niŋ kamaata ni cheechi toondana malila biɛrisuŋ; di simdi ni o malila paɣ’ yino; ka di mi simdi ni o bihi nyɛla yɛdaniŋdiba, ka pa ni niriba ni ni tooi galim shɛba bɛ ni bi gbaari bɛmaŋ’ shɛm bee bɛ tipawumli zuɣu.

⁷Dama cheechi toondana ni su Naawuni tuma fukumsi la zuɣu, di simdi ni o malila biɛrisuŋ; di bi simdi ni o nyɛla barinyura bee suhuyiɣisililana bee ŋun nyuri dam kuuna bee vubɔra bee ŋun suhu ye liɣiri zuɣu ti yaɣi,

⁸amaa di simdi ni o nyɛla ŋun niŋdi saani ni ŋun yuri zaɣ’ suŋ ni ŋun su omaŋa ni ŋun bebu tuhi ni ŋun bebu be kasi ni ŋun gbib’ omaŋa.

⁹Ka di lan simdi ni o nyɛla ŋun gbibi Naawuni yɛligu yɛlimaŋtali shɛli bɛ ni daa wuh’ o la viɛnyɛliŋga, ka di chɛ ka o tooi zaŋ wuhibu shɛŋa din be wuhibu maŋli ni n-wuhi niriba, ka tooi lan zaŋ wuhibu maa n-wuhi bɛn chihiri li bɛ chirimbu ni nyɛ shɛli.

¹⁰Niriba pam bɛn nyɛ tipawumlinima, ka lan nyɛ bɛn tɔɣisiri yɛtɔɣ’ chɔɣima ni bɛn yɔhindi niriba beni, di bahi bamdi yɛdaniŋdiba bɛn na kul doli Yɛhudianim’ adiini soli kaya la.

¹¹Di niŋ kamaata ni a yihi ba di ni, dama di nyɛla vi ni bɛ mali wuhibu shɛŋa bɛ ni ka soli ni bɛ zaŋ wuhi so m-birigiri yiya pam puuni niriba liɣiri nyabu zuɣu.

¹²Hal Kriitinim’ ni booni bɛ ni ninvuɣ’ so anabi la maŋmaŋ’ daa yɛliya, “Kriitinim’ kul nyɛla ʒiŋmariba mini biŋkɔb’ biɛri ni diribarilimnima.”

¹³Ka o ni daa yɛl’ shɛm maa shiri nyɛla yɛlimaŋli. Dinzuɣu kpahimi bɛ zuɣu ni ni nimmoo ka di chɛ ka bɛ ba n-zani wuhibu maŋli maa ni,

¹⁴ ka ku lan doli Yɛhudianim’ kurimbuni lahibaya din pa yɛlimaŋli la mini ninsalinim’ zaligunima din nyɛ bɛn zaɣisi yɛlimaŋli ni zali shɛl’ la.

¹⁵Ninvuɣ’ shɛb’ bɛn biɛhigu be kasi sani, binshɛɣukam nyɛla din be kasi; amaa ninvuɣ’ shɛb’ bɛn biɛhigu bi be kasi ka nyɛ bɛn bi niŋ yɛda sani, binshɛli kani n-nyɛ din be kasi, dama bɛ suhuri ni tɛha malila daɣiri.

¹⁶Bɛ yihi yɛli ni bɛ mi Naawuni, amaa ka bɛ tuma lee bi wuhi ni bɛ mi o. Bɛ nyɛla tuumbiɛrinim’ mini tipawumlinima ka ka buchi zaŋ chaŋ tuun’ suŋ kam tumbu polo.