Read Dagbani Taitus 2 Bible Online

Taitus 2 - Dagbani bible

Taitus 2

¹Amaa nyin’ wuhimila din mini wuhibu maŋli taɣili tab’ la.

²Yɛlim’ do’ kura la ni bɛ gbib’ bɛmaŋa, ka mali biɛrisuŋ, ka mali yɛm, ka doli wuhibu maŋli, ka mali yurilim, ka nyɛ bɛn mal’ ania yɛda niŋbu ni.

³Yɛlim’ paɣ’ kura la gba ni bɛ mali biɛhigu shɛli din luri Naawuni sizuura, ka pa ni munaafichinima bee bɛn nyɛ danyubo daba. Di simdi ni bɛ nyɛla bɛn wuhiri din nyɛ zaɣ’ viɛlli

⁴ka di chɛ ka bɛ tooi wuhi paɣisara ka bɛ yuri bɛ yidaannim’ mini bɛ bihi,

⁵ka gbib’ bɛmaŋa, ka mali biɛri suŋ, ka nyɛ bɛn gbib’ bɛ yinsi viɛnyɛliŋga, ka niŋdi nirilim, ka nyɛ bɛn wumdi n-tiri bɛ yidaannima, ka di chɛ ka so ku yɛli zaɣ’ biɛɣu n-dalim Naawuni yɛligu.

⁶Yɛlim’ nachimbihi la gba ni bɛ gbib’ bɛmaŋa.

⁷Di niŋ kamaata ni amaŋmaŋ’ gba tumdi tuun’ suma, ka di wuhi bɛn kpalim la din simdi niŋbu ni nyɛ shɛli binshɛɣukam puuni. Mali biɛri suŋ mini maŋgbibbu a wuhibu puuni.

⁸Tɔɣisim’ yɛtɔɣ’ maŋa din nyɛ so ni ku tooi galim shɛli, ka di chɛ ka bɛn chihir’ a di vi ka ku tooi mali zaɣ’ biɛ’ shɛli ni bɛ yɛli dalim ti.

⁹Yɛlim’ daba la gba ni bɛ deemi bɛ duumanim’ noya, ka tumdi din tiɣiri bɛ nini binshɛɣukam zaa puuni; ka di ŋmɛri ba naŋgbankpeeni

¹⁰bee n-kpuɣiri bɛ neem’ bihibihi. Amaa bɛ lee chɛ ka bɛ bebu kahigi wuhi ni bɛ nyɛla bɛn ʒe yim ni yɛlimaŋli ni be shɛb’ ni, ka di chɛ ka Naawuni ŋun nyɛ ti Tiligira ŋɔ yɛla wuhibu la nya jilima bɛ ni niŋdi shɛlikam zaa puuni.

¹¹Naawuni daa kahig’ o daanfaani wuhi palɔni ni di chɛ ka sokam tooi nya tiliginsim.

¹²Anfaani maa wuhiri ti ni ti zaɣisim’ din bi luri Naawuni sizuura mini dunia ŋɔ kɔr’ biɛri, amaa ka lee gbibi timaŋa ka mali bebu din tuhi, ka mali biɛhigu shɛli din luri Naawuni sizuura dunia ŋɔ ni,

¹³ka guhiri ti tahima din mal’ alibarika dabisi’ shɛli dali ti Naawuni Natitamlana ŋun nyɛ tiligira Yisa Masia la jilima palo yibu saha.

¹⁴Ŋuna n-daa zaŋ omaŋ’ pa talima ni o tiligi ti ti tuumbiɛri zaa ni ka mali ti ka ti be kasi, ka zaŋ ti leeg’ omaŋmaŋ’ niriba bɛn suhuri ye tuun’ suma tumbu zuɣu.

¹⁵Zaŋmi dimbɔŋɔnim’ wuhimi niriba; ka kpammi ba jaande, ka kpahimi bɛn wumd’ a wuhibu zuɣu ni a fukumsi zaa subu puuni. Di chɛ ka so ʒiɛm a.