Read Dagbani Failimɔn 1 Bible Online

Failimɔn 1 - Dagbani bible

Failimɔn 1

¹Man’ Pool ŋun nyɛ dansarika Yisa Masia zuɣu la mini ti mabia Timoti n-sabiri gbaŋ ŋɔ tiri Failimɔn ŋun nyɛ ti tumtumdikpe’ so ti ni yuri la

² mini yɛdaniŋdiba bɛn laɣind’ o yiŋ’ la ni ti tizɔpaɣa Afia ni Aakipus ŋun nyɛ ti tɔbbikpee la.

³Ti Ba Naawuni mini ti Duuma Yisa Masia niŋm’ alibarika niŋ yi ni, ka tin ya suhudoo!

⁴M mabia Failimɔn, n yi ti suhiri Naawuni tir’ a, n kul paɣir’ o mi sahakam,

⁵dama n wum a ni niŋ ti Duuma Yisa yɛda shɛm min’ a ni yuri Yisa nyaandoliba shɛm la yɛla.

⁶N suhiri Naawuni ni a ni mali yurilim shɛli din yi a yɛda niŋbu ni na maa ni kpaŋs’ a ka a baŋ bin’ sun shɛŋa zaa ti ni mali Masia ni la viɛnyɛliŋga.

⁷M mabia, a yurilim maa zuɣu chɛ ka n nya suhupiɛlli mini suhukpaŋsibo, dama Yisa nyaandoliba nyari suhukpaŋsibo a sani.

⁸Daliri ŋɔ zuɣu, hal n ni mali suhukpeeni Masia zuɣu ni n tooi wuh’ a di ni niŋ kamaata ni a niŋ shɛm la zaa yoli,

⁹yurilim zuɣu chɛ ka n naɣ’ suhir’ a mi. Man’ Pool ŋun nyɛ ninkurigu ka lan nyɛ dansarika Yisa Masia zuɣu la

¹⁰ suhir’ a n ni leei bi’ so ba sarika ŋɔ ni la zuɣu. Bia maa n-nyɛ Onɛsimus.

¹¹Saha shɛli ha o daa ka a buchi, amaa pumpɔŋɔ o nyɛla ŋun mali buchi m min’ a zaa sani.

¹²Ka pumpɔŋɔ n labisir’ o mi na ni n ti ti a, dimbɔŋɔ wuhiri ni n zaŋla n suhu m-pah’ o zuɣu ti a.

¹³N di yuya ni o be n sani n-zan’ a zaani n-sɔŋdi ma n ni be sarika ŋɔ ni lahibal’ suŋ la zuɣu saha shɛli ŋɔ,

¹⁴amaa m bi bɔri ni n niŋ shɛli ka di pala a yubu ni, dama m bɔri ni a tuun’ suŋ yila amaŋmaŋ’ yubu ni na, ka pa ni muɣisigu ni na.

¹⁵Di pa shɛli Onɛsimus daa yi a sani n-zomi ni o yi kpaŋ’ biɛla, ka ti lan lab’ a sanna n-yipa ti beni sahakam.

¹⁶Ka pumpɔŋɔ o lan pala dabili kɔŋko, amaa o gari dabili; o yipa nyɛla ti mabiyurigu Masia ni. O mali ma buchi pam, amaa nyini ka o lee ni mali buchi pam, o ni nyɛ a dabili la min’ o ni nyɛ a mabia ti Duuma zuɣu la puuni.

¹⁷Dinzuɣu a yi lihi ma ni n nyɛla a tumtumdikpee, nyin’ deem’ o kaman a ni ni deei ma shɛm.

¹⁸O yi daa tum a taali bee n-di a samli, nyin’ chɛ ka di dolila mani.

¹⁹Man’ Pool maŋmaŋa n-sabi ŋɔ: N ni yo a li. Hal n ni tooi yɛli ni n samli dol’ a zaŋ chaŋ amaŋmaŋ’ nyɛvili polo.

²⁰Dinzuɣu m mabia, n suhir’ a, Niŋm’ ma nirilim ŋɔ ti Duuma zuɣu. Kpaŋsimi n suhu Masia ni.

²¹N ni sabiri shɛli ŋɔ puuni, n niŋ naani ni a ni niŋ n ni suh’ a ni a niŋ shɛli ŋɔ hal n-niŋ li yaɣi lala zuɣu gba.

²²Ka din pahi nyɛla, m bɔri ni a mali duu zali ma, dama m mali tahima ni Naawuni ni deeg’ a suhigu, ka labisi ma ti a.

²³ Ɛpafiras ŋun be sarika ŋɔ ni pahi n zuɣu Yisa Masia zuɣu la puhir’ a.

²⁴ Maak mini Aristakus ni Diimas ni Luk bɛn nyɛ n tumtumditab’ la gba puhiri ya.

²⁵Ti Duuma Yisa Masia daalibarika kpalimmi be yi ni!