Read Dagbani Hiburunima 13 Bible Online

Hiburunima 13 - Dagbani bible

Hiburunima 13

¹Kul yumiya taba kaman yi nyɛla mabi’ yinsi la.

² Di tamya saamba saani niŋbu yɛla, dama shɛb’ daa niŋdi saani lala hal ti niŋ malaikanim’ saani ka bi baŋ ni malaikanim’ m-bala.

³Kul teemiya bɛn be sarika ni yɛla ka di be kaman yi mini ba ka bɛ laɣim kpɛhi sarika maa la. Teemiya bɛn diri wahala yɛla ka di be kaman yi mini ba n-laɣim diri wahala maa la.

⁴Chɛliya ka amiliya lɔbu mali jilima sokam sani, ka chɛliya ka yidan’ min’ o paɣa ʒe tab’ yim bɛ daamiliya lɔbu puuni; dama Naawuni ni kari niŋgbuŋ kɔrɛnim’ mini bɛn niŋdi zina saria.

⁵ Gbaamiya yimaŋa ni laɣiyubo, ka chɛliya ka yi nini tiɣi yi ni mali shɛli, dama Naawuni yɛliya, “N kul ku chɛ a, ka mi ku bah’ a.”

⁶ Dinzuɣu ti ni tooi niŋ suhukpeeni yɛli: “N Duuma nyɛla n sɔŋda; n ku zo dabiɛm. Bɔ ka ninsal’ ni tooi niŋ ma?”

⁷Teemiya yi zuɣulaannim’ bɛn daa wuhi ya Naawuni yɛtɔɣa la yɛla, ka kpahimya bɛ biɛhigu ni daa nyɛ shɛm hal ti paai kum la, ka chɛliya ka yi yɛda niŋbu be kaman bɛ yɛda niŋbu.

⁸Yisa Masia ni sa be shɛm sɔhila, lala ka o be zuŋɔ, ka kul ni be lala hal ni saha din ka bahigu.

⁹Di chɛliya ka wuhibu balibubalibu mini wuhibu kɔŋkɔba din be di ko la birigi ya; di niŋ kamaata ni ti nya suhukpaŋsibo la Naawuni daanfaani puuni, ka pa ni bindira chihibu din bi sɔŋdi bɛn doli di wuhibu sol’ la.

¹⁰Ti mali bimbin’ shɛli ka maligumaaniba bɛn tumdi sara maligu malibu tuma tanti jɛmbu duu la ni ka soli ni bɛ di binshɛli din pa di zuɣu.

¹¹ Dama maligumaaniba zuɣulana daa yi zaŋdila biŋkɔbiri ʒim kpɛri Luɣ’ Kasi Zaa Kasi Shee la ti maani sara alahichi zuɣu, ka chɛ ka bɛ zaŋdi biŋkɔbiri maa zaɣ’ muna yiri tin’ tariga ti nyɔri buɣim.

¹²Lala zuɣu ka Yisa gba daa kpi tin’ tariga ni o zaŋ omaŋmaŋ’ ʒim mali niriba ka bɛ be kasi.

¹³Dinzuɣu chɛliya ka ti yi n-chaŋ o sani tin’ tariga maa ha nti pah’ o zuɣu di vi.

¹⁴Dama ti ka tin’ shɛli din ni be hal ni saha din ka bahigu dunia ŋɔ ni, dinzuɣu ti lihiri bɔrila tin’ shɛli din ti yɛn kana la.

¹⁵Ti Duuma Yisa zuɣu, chɛliya ka ti kul zaŋdi wumpaɣibo kaman sara la paɣiri Naawuni, dina n-nyɛ ti yaai ti noya kahigi wuhi ni ti tibigir’ o yuli.

¹⁶Di tamya zaɣ’ viɛlli niŋbu yɛla, ka zaŋmiya yi ni mali shɛli sɔŋdi taba, dama dina n-nyɛ sara shɛŋa din tiɣiri Naawuni nini.

¹⁷Deemiya yi zuɣulaannim’ noli ka doli bɛ wuhibu, dama bɛna n-kul guli ya ka nyɛ bɛn ti yɛn wuhi bɛ tuma ni nyɛ shɛm yi sani Naawuni tooni. Yi yi doli bɛ wuhibu, bɛ ni tum bɛ tuma ni suhupiɛlli ka pa ni suhugarigu, dama bɛ yi malila suhusaɣiŋgu di ku kun ya buchi.

¹⁸Kul suhimiya Naawuni tiri ti, dama ti niŋ yɛda ni ti ka galimi ti suhuri tɛha ni; ka di nyɛla ti ni bɔri ni ti niŋ shɛlikam zaa ka di tuhi la zuɣu.

¹⁹Ka n kpamdi ya jaande ni yi kul suhim’ Naawuni ka o chɛ ka di ku yuui ka n lab’ yi sanna.

²⁰Naawuni ŋun nyɛ suhudoolana ka daa neei ti Duuma Yisa ŋun nyɛ Piɛgul’ Suŋ o daalikauli din ka bahigu ʒim zuɣu kum ni la

²¹timiya binshɛɣukam din viɛla, ka yi tooi tum o yubu; ka lan chɛ ka yi tum din ni tiɣ’ o nini yi bebu ni Yisa Masia zuɣu. Ŋuna n-simdi tibigibu hal ni saha din ka bahigu. Ami.

²²M mabihi n suhiri ya, niŋmiya suɣilo n-deei n saɣisigu yɛtɔɣa ŋɔ, dama yɛtɔɣa biɛla ka n zaŋ n-sabi gbaŋ ŋɔ tin ya.

²³M bɔri ni yi baŋ ni bɛ yihi ti mabia Timoti sarika ni; o yi paana tu n kandina saha, n ni zaŋ o pahi mmaŋ’ zuɣu na ti nyan ya.

²⁴Puhimiya yi zuɣulaannim’ mini Naawuni ninvuɣ’ gahinda la zaa ti ma. Ti mabihi bɛn nyɛ Italinim’ la puhiri ya.

²⁵Naawuni daalibarika kpalimmi be yi zaa ha ni!