Read Dagbani Hiburunima 3 Bible Online

Hiburunima 3 - Dagbani bible

Hiburunima 3

¹M mabihi bɛn mali be kasi ka saɣi alizanda ni boligu ŋɔ, tɛhimiya Yisa ŋun nyɛ ti daadiini tumo ni maligumaani’ tital’ la yɛla.

² O daa ʒe yim ŋun piig’ o maa sani kaman Anabi Musa ni daa ʒe yim o tuma ni Naawuni niriba sani shɛm la.

³Amaa Yisa nyɛla ŋun simdi ni o mali jilima pam gari Anabi Musa kaman ŋun me yili ni mali jilima gari o ni me yil’ shɛli maa shɛm la.

⁴Yili kam nyɛla ninvuɣ’ so ni me shɛli, amaa Naawuni n-nyɛ ŋun me binshɛɣukam zaa.

⁵Anabi Musa daa ʒe yim Naawuni niriba zaa sani kaman yilibia la ni o di Naawuni ni ti yɛn yɛli binshɛŋa yɛla la shɛhira;

⁶amaa Masia ŋun’ daa ʒe yim Naawuni niriba san’ la o ni nyɛ Naawuni Bia la zuɣu. Ka ti gba nyɛla o niriba, tinim’ dee yi kul mali suhukpeeni ka niŋ ti ni mali tahima shɛl’ la naani hal ni di bahigu ni.

⁷Dinzuɣu di bemi kaman Naawuni Shia Kasi ni yɛli shɛm la: “Yi yi wum Naawuni kukoli zuŋɔ dabisili ŋɔ,

⁸yin’ miriya ka yi niŋ tipawumlinima kaman Naawuni niriba ni daa niŋ shɛm taai duŋ yɔɣu ni n-zahim o ka di chɛ ka o yɛli,

⁹‘Yi yaannim’ daa zahim ma, hal bɛ ni daa kul nya n ni tum shɛm yuun’ pihinahi puuni la zaa yoli.’

¹⁰Dinzuɣu ka n daa je suli niŋ bɛ ʒiɛmani maa nima ka yɛli, ‘Bɛ kul birigirila bɛ suhuri ni waawaayili, ka zaɣisiri n soya dolibu.’

¹¹ Ka n daa po n suhuyiɣisili puuni yɛli, ‘Bɛ kul ku nya vuhim shee n sani!’ ”

¹²M mabihi, miriya ka yi ni so mali suhu biɛɣu din biɛhinda, ka nyɛ din ni birigi ya Naawuni ŋun nyɛ nyɛvililan’ ŋɔ sani.

¹³Amaa saha shɛli Naawuni Shia Kasi ni booni zuŋɔ dabisili ŋɔ la puuni, kpaŋsimiya tab’ dabisili kam ka di chɛ ka yi ni so ku niŋ tipawumlilana alahichi yɔhiŋgu zuɣu;

¹⁴dama ti nyɛla bɛn mini Masia laɣim nyɛ zaɣ’ yini, ti yi kul niŋ ti ni daa tuui mali tahima shɛl’ la naani viɛnyɛliŋga hal ni di bahigu ni.

¹⁵ Di bemi kaman di ni yɛli shɛm la: “Yi yi wum Naawuni kukoli zuŋɔ dabisili ŋɔ, yin’ miriya ka yi niŋ tipawumlinima kaman bɛ ni daa niŋ shɛm taai duŋ la.”

¹⁶Banima n-nyɛ bɛn daa lee wum Naawuni kukoli, amaa ka ti taai duŋ la? Pa bɛna n-nyɛ Anabi Musa ni daa zaŋ ninvuɣ’ shɛb’ yi Ijipti na la?

¹⁷Ka banima n-daa lee ku Naawuni suli yuun’ pihinahi puuni la? Pa bɛna n-nyɛ bɛn daa tum alahichi ka kpi n-do yɔɣu ni la?

¹⁸ Ka banim’ ka o daa po n-yɛli ni bɛ ku nya vuhim o san’ la? Pa bɛna n-nyɛ bɛn daa niŋ tipawumlinim’ la?

¹⁹Dinzuɣu ti nyaya ni di nyɛla bɛ biɛhiŋ zuɣu ka bɛ daa bi tooi nya vuhim maa.