Read Dagbani Hiburunima 4 Bible Online

Hiburunima 4 - Dagbani bible

Hiburunima 4

¹Dinzuɣu Naawuni ni lo ti vuhim nyabu alikauli shɛl’ la ni na kul ʒiɛya zuɣu, chɛliya ka ti zo dabiɛm ka yi ni so ti ku kɔŋ vuhim maa shee paabu.

²Lahibal’ suŋ daa kala ti sanna kaman di ni daa chaŋ bɛ sani shɛm; ka bɛ ni daa wum yɛtɔɣ’ shɛŋa maa daa bi ku ba buchi, dama bɛn daa wum li maa daa bi niŋ li yɛda.

³ Amaa tinim’ bɛn pun niŋ yɛda la paai vuhim shee Naawuni sani. Di bemi kaman o ni yɛli shɛm la: “N daa po n suhuyiɣisili puuni yɛli, ‘Bɛ kul ku nya vuhim shee n sani.’ ” Naawuni daa yɛli dimbɔŋɔ la hal saha shɛl’ o ni daa pun nam dunia naai la nyaaŋa;

⁴ dama daba ayopɔin dali yɛla sab’ Naawuni Kundi ni luɣ’ shɛli yɛli: “Naawuni daa vuh’ o tuma zaa puuni daba ayopɔin dali.”

⁵ O daa lan yɛli di yɛla yaha: “Bɛ kul ku nya vuhim shee n sani.”

⁶Dinzuɣu vuhim nyabu ni na kul ʒiɛya gul’ shɛb’ ni bɛ vuhi, hal ka bɛn daa tuui wum lahibal’ suŋ la daa bi paai vuhim shee Naawuni sani bɛ ni daa bi niŋ yɛda la zuɣu.

⁷ Ka Naawuni lan zali dabisi’ shɛli din booni zuŋɔ dabisili ŋɔ, ka daa ti chɛ ka Naa Dauda tɔɣisi di yɛla yuma din dol’ di nyaaŋa puuni ka di niŋ pali kaman di ni pun sabi wuhi shɛm la: “Yi yi wum o kukoli zuŋɔ dabisili ŋɔ, yin’ miriya ka yi niŋ tipawumlinima.”

⁸ Jɔshua yi di daa chɛ ka Naawuni niriba nya vuhim Naawuni sani, dindina ŋun’ Naawuni daa naan ku lan tɔɣisi dabisi’ shɛli yɛla yaha.

⁹Dinzuɣu Vuhim Dabisili na kul ʒiɛmi guli Naawuni niriba ni bɛ vuhi;

¹⁰ dama ŋunkam nya vuhim Naawuni sani chɛ o tuma ka vuhirimi kaman Naawuni ni daa chɛ omaŋmaŋ’ tuma ka vuhi shɛm la.

¹¹Dinzuɣu chɛliya ka ti kpaŋ timaŋ’ paai vuhim shee Naawuni sani, ka ti ni so ti ku lu nɔzaɣisibo ŋɔ tatabo zuɣu.

¹²Naawuni yɛligu nyɛla din mali nyɛvili ka tumdi tuma. Di diri gari takɔb’ kam din mali noya ayi, ka ŋmari paari ninsal’ kɔb’ tuɣa min’ o kɔba ni kpam tuɣa shee din nyɛ suhu mini shia tab’ tuɣibu shee la. Di vihiri baŋdi ninsal’ suhu ni bɔri shɛli mini tɛhi’ shɛŋa din be o suhu ni.

¹³Binnamdi’ so ku tooi sɔɣi Naawuni, dama binshɛɣukam dola palɔni o sani. Ŋuna n-nyɛ ti zaa ni ti yɛn kahigi ti bebu ni nyɛ shɛm wuhi so.

¹⁴Ti ni mali maligumaaniba zuɣulan’ titali so ŋun nyɛ Naawuni Bia Yisa ŋun daa chaŋ ti be Naawuni san’ la zuɣu, chɛliya ka ti gbibi ti daadiini ŋɔ kirikiri.

¹⁵Ti ni mali maligumaaniba zuɣulan’ titali so maa nyɛla ŋun ni tooi baŋ ti chɔɣinsi yɛla ka di niŋ o nambɔɣu, dama o nyɛla ŋun daa nya zahimbu kaman ti gba ni nyari zahimbu shɛm, amaa o daa bi tum alahichi di puuni.

¹⁶Dinzuɣu chɛliya ka ti niŋ naani ka vu m-miri Naawuni ŋun nyɛ alibarikalan’ ŋɔ nam ʒiishee, ka di chɛ ka o zo ti nambɔɣu ka ti nya alibarika din ni sɔŋ ti saha shɛli ti ni bɔri li.