Read Dagbani Hiburunima 5 Bible Online

Hiburunima 5 - Dagbani bible

Hiburunima 5

¹Maligumaaniba zuɣulan’ kam yirila o tab’ sunsuuni na ni o ʒe bɛ zaani n-zaŋdi pina mini sara maani maligu niriba daalahichi zuɣu Naawuni sani.

²Ka omaŋmaŋ’ ni ka yaa yɛla pam ni zuɣu, o ni tooi di suɣilo o tuma ni zaŋ chaŋ ninvuɣ’ shɛb’ bɛn be ʒilinsi ni mini bɛn chirindi polo.

³ O ni ka yaa maa zuɣu, di nyɛla talahi ni o maani maligu omaŋmaŋ’ daalahichi zuɣu kaman o ni maani niriba daalahichi zuɣu shɛm.

⁴ So bi piiri maligumaaniba zuɣulaantali mini di jilima o tolitoli; kulla Naawuni maŋmaŋa m-piiri nir’ leeri maligumaaniba zuɣulana kaman o ni daa piig’ Aduna shɛm la.

⁵ Masia gba daa bi pii maligumaaniba zuɣulaantali mini di jilima. Naawuni n-daa lee piig’ o ka yɛl’ o: “A nyɛla m Bia; zuŋɔ dabisili ŋɔ ka n leeg’ a Ba.”

⁶ O lan yɛli luɣ’ shɛli yaha: “A nyɛla maligumaana ŋun tuma ni be kaman Mɛlikizɛdɛk tuma la hal ni saha din ka bahigu.”

⁷ Yisa ni daa be dunia ŋɔ ni saha shɛli, o daa suhiri Naawuni yɛr’ o o ni bɔri shɛli, ka duhir’ o yee kuhiri ni nintam niŋdi Naawuni ŋun ni tooi tilig’ o kum ni la. Ka Naawuni daa wum o suhigu maa o ni daa zɔri ŋun’ Naawuni la zuɣu.

⁸O ni daa kul nyɛ Naawuni Bia maa zaa yoli, o daa bɔhim nɔdeebo wahala dibu puuni.

⁹O ni daa leei ŋun be tibi maa zuɣu, ka o leei bɛnkam zaa deer’ o noli tiliginsim din ka bahigu ni yiri so sanna.

¹⁰Naawuni n-daa zal’ o ni o nyɛ maligumaaniba zuɣulan’ ŋun tuma ni be kaman Mɛlikizɛdɛk tuma ni daa be shɛm.

¹¹Ti mali yɛla pam ni ti yɛli ya zaŋ chaŋ yɛla ŋɔ polo ka di mi kahigibu to, dama yi nyɛla suhutunanima.

¹²Zaŋ kana pumpɔŋɔ di di simdi ni yi nyɛla yi tab’ sowuhiriba, amaa ka yi ti na bɔrimi ni so n-wuhi ya Naawuni yɛtɔɣa bɔhimbu piligu ni yɛla. Yi na kul nyurila bihim, ka pa ni bindir’ maŋli,

¹³ dama ŋunkam kul nyurila bihim nyɛla ŋun yɛm na bi goligi wuntia yɛtɔɣa puuni, ka o na kul nyɛla bia.

¹⁴Bindir’ maŋli nyɛla ninkura bɛn zaŋ bɛ tɛha bɔhim baŋ zaɣ’ suŋ mini zaɣ’ biɛɣu woligibu ni nyɛ shɛm dini.