Read Dagbani Hiburunima 9 Bible Online

Hiburunima 9 - Dagbani bible

Hiburunima 9

¹Tuuli alikauli la daa mali Naawuni jɛmbu soli zaligunim’ mini luɣ’ shɛli ninsalinim’ ni daa mali zali Naawuni jɛmbu zuɣu.

² Bɛ daa kpala tanti, ka booni di puuni luɣ’ shɛli din daŋ tooni Luɣ’ Kasi Shee. Firilatamdigu mini teebuli shɛli bɛ ni daa zaŋdi bɔrɔbɔro shɛli bɛ ni mali maani sara Naawuni sani m-pari di zuɣu la n-daa be nimaani.

³ Chinchin’ tibisi’ shɛli daa yili di puuni, ka bɛ booni tanti du’ shɛli din be chinchini maa nyaaŋa mi Luɣ’ Kasi Zaa Kasi Shee.

⁴ Ka bɛ ni daa tuɣindi tulaale zim salima bimbin’ shɛli zuɣu la mini bɛ ni daa dooi salima pa Naawuni Daalikauli Adaka shɛli zuɣu la daa be nimaani. Ka bɛ ni booni bindir’ shɛli manna ni daa be salima la’ shɛl’ ni la mini Aduna jaaŋgbee din daa puhi vari, ka daai pum la zaŋ tabili Naawuni fukumsi zaligunim’ ni daa sab’ pa kuɣiparilana ayi shɛŋa zuɣu la gba daa be di puuni.

⁵ Binnɛma ayi kɔtomsi din wuhiri ni Naawuni jilima be bɛ sani n-daa tam adaka maa zuɣusaa n-kul lihiri di zuɣusaa luɣ’ shɛli din booni Naawuni nambɔzɔbo shee la. Amaa ti ku tooi wuhi yɛla ŋɔ zaa gbinni pumpɔŋɔ.

⁶ Dimbɔŋɔnim’ ni daa mali zali naai maa, ka maligumaaniba daa kul kpɛri tanti duu din daŋ tooni la ni nti tumdi bɛ maligumaanitali tuma dabisili kam;

⁷ amaa maligumaaniba zuɣulan’ kɔŋko n-daa yi kpɛri tanti duu maa ni du’ shɛli din be chinchin’ la nyaaŋa la ni. Napɔŋ yim kɔŋko ka o mi daa yi kpɛri di ni yuuni kam. O daa yi zaŋdila ʒim kpɛri ti maani maligu omaŋmaŋ’ zuɣu, ka naanyi mali niriba ni tum alahichi shɛŋa ʒilinsi ni la gba zuɣu.

⁸Dimbɔŋɔnim’ puuni Naawuni Shia Kasi kahigi wuhi ni tuuli tanti duu la ni daa na kul ʒiɛya la zuɣu, di wuhiya ni Luɣ’ Kasi Zaa Kasi Shee la soli na bi yooi.

⁹Dimbɔŋɔ nyɛla ŋmahinli din wuhiri din be ʒiɛmani ŋɔ ni: Di gbinni nyɛla ni pina mini biŋkɔbiri sara shɛŋa bɛ ni zaŋdi maani maligu nyɛla din ku tooi chɛ ka ŋun jɛmdi Naawuni suhu ni tɛha niŋ dɛde.

¹⁰Dimbɔŋɔnim’ kul nyɛla din wuhiri bindira mini binnyura ni Yɛhudianim’ adiini kaya balibu kam din nyɛ niŋgbuŋ biɛhigu zaligunim’ din yɛn beni hal ti paai saha shɛli Naawuni ni ti lan yɛn taɣi mali binshɛlikam zal’ la.

¹¹Amaa Masia pun kana ti leei bin’ suma din pun beni maligumaani’ titali. O ni kpe tanti du’ shɛl’ ni ti tumd’ o maligumaanitali tuma la galisiya ka be dɛde gari tanti du’ kurili la, dama di pala ninsalinim’ ni kpa shɛli; dimbɔŋɔ wuhiya ni di pala dunia ŋɔ ni dini.

¹²Masia ni daa kpe tanti duu la puuni n-gari ti kpe Luɣ’ Kasi Zaa Kasi Shee yim ka di naai zaa la, pa buhi mini naɣibihi ʒim ka o daa zaŋ mali sara, amaa omaŋmaŋ’ ʒim ka o daa zaŋ mali sara n-deei tiliginsim din ka bahigu Naawuni sani ti ti.

¹³ Bɛ daa zaŋdi buhi mini naɣilahi ʒim ni naɣisa’ so bɛ ni daa zaŋdi nyɔri buɣim la tampiligim mihiri niriba niŋgbuna ni di chɛ ka bɛ mali be kasi, ka yi bɛ daadiini kaya dolibu taali ni.

¹⁴Dimbɔŋɔ ni shiri nyɛ yɛlimaŋli maa, dindina Masia ʒim tum din gari lala! Naawuni Shia ŋun ka bahigu ŋun be Masia ni la zuɣu ka ŋun’ Masia ŋun ka galimi la daa zaŋ omaŋ’ mali sara Naawuni sani. O ʒim maa ni tooi yihi tuun’ yoya ti suhuri tɛha ni, ka di chɛ ka ti tooi jɛm Naawuni ŋun nyɛ nyɛvililan’ ŋɔ.

¹⁵Daliri ŋɔ zuɣu Yisa n-nyɛ sandaantimdi’ so ŋun zali alikauli palli la ni di chɛ ka Naawuni ni boli shɛb’ la tooi deei Naawuni ni daa lo ba alikauli ni bɛ ni ti deei shɛli ka di nyɛ din ni be hal ni saha din ka bahigu la. Dimbɔŋɔ ni tooi nani, dama so kpi kum shɛli din ni tooi fa daadamnim’ bɛn daa tum taali alikauli kurili la ʒiɛman’ la ni bahi.

¹⁶Nir’ yi sabi wuh’ o yubu ni nyɛ shɛm zali ni di ti tum tuma o kalinsi nyaaŋa, di bi tumdi tuma naɣila o ti shiri kpimi;

¹⁷dama nir’ yi sabi wuh’ o yubu ni nyɛ shɛm zali, di bi tumdi tuma o yi na be o nyɛvil’ ni.

¹⁸Daliri ŋɔ zuɣu tuuli alikauli la daa naan ku tooi zani, ka pa ni ʒim n-yi.

¹⁹Anabi Musa ni daa zaŋ Naawuni daalikauli zaligunim’ zaa yɛla yɛli niriba zaa la nyaaŋa, o daa zaŋla naɣibihi mini buhi ʒim ni kom n-zaŋ taaŋkɔro vari mini piɛkɔb’ ʒɛhi tim di ni n-zaŋ li mihi Naawuni Zaligu Kundi la mini niriba maa zaa.

²⁰ O ni daa niŋ lala maa ka yɛli, “Dimbɔŋɔ nyɛla Naawuni ni daa lɔn ya alikauli shɛli ni yi gbib’ la shɛhira ʒim.”

²¹ Lala ka o daa lan zaŋ ʒim mihi tanti Naawuni jɛmbu duu la mini binshɛlikam bɛ ni daa mali tumdi Naawuni jɛmbu tuma.

²² Yɛlimaŋli, Naawuni zaligu sulinsi ʒiɛman’ ni, kul gbaai yihi bina biɛla kɔŋko, ʒim n-daa yi maani binshɛɣukam din kpalim ka di be kasi; ka ʒim yi bi yi, alahichi chɛ m-paŋ kani.

²³Lala zuɣu di daa nyɛla talahi ni binshɛŋa din nyɛ din be alizanda ni ŋmahima la doli maligu malibu soli ŋɔ m-mali be kasi; amaa di nyɛla talahi ni binshɛŋa din be alizanda ni maŋmaŋ’ mali sara din so.

²⁴Dama Masia daa bi kpɛla daadamnim’ ni me Luɣ’ Kasi Zaa Kasi Shee din nyɛ alali din’ la ŋmahinli la ni, amaa alizanda maŋmaŋ’ ni ka o kpe nti zani Naawuni tooni ti zuɣu pumpɔŋɔ.

²⁵O mi bi kpe di ni mi ni o ti zaŋd’ omaŋ’ maani maligu yuuni kam kaman maligumaaniba zuɣulana ni daa yi zaŋdi biŋkɔbigu ʒi’ shɛli din pa ŋun’ maŋmaŋ’ ʒim kpɛri Luɣ’ Kasi Zaa Kasi Shee nti maani maligu shɛm la.

²⁶Di yi di nyɛ lala, dindina o naan kul dirila wahala tum dunia piligu ni hal ni pɔŋɔ; amaa din beni nyɛla, saha ni daa ti paai, o daa kana yim nti zaŋ omaŋa m-mali sara kpihim niriba daalahichi.

²⁷Di nyɛla talahi ni sokam zaa kpi yim, ka saria karibu lee be di nyaaŋa.

²⁸Lala zuɣu Masia ŋun daa zaŋ omaŋ’ mali sara yim ni o kpihim niriba pam daalahichi la ni lan labina pahi buyi, ka di pala alahichi zuɣu, amaa o yɛn labina ti tiligila bɛn suhuri kul ye o labbuna zuɣu ka guhir’ o la.