Read Dagbani Jeemsi 2 Bible Online

Jeemsi 2 - Dagbani bible

Jeemsi 2

¹M mabihi, ti Duuma Yisa Masia n-nyɛ Duuma ŋun nyɛ Jilimalana. Ka yi ni doli yɛda niŋbu adiini so’ shɛli o ni zal’ la zuɣu, di yaaya so yuri ka chɛ so.

²Chɛ ka ti yɛli ni so yi ti ye binyɛr’ suma, ka piri salima nintuhi kpe yi laɣiŋgu ni na, ka nandana ŋun ye binchɛra gba kpɛna,

³ka yi lula ŋun ye binyɛr’ suma la sizuura ka yɛl’ o, “N dana, ʒinim’ ʒiishe’ viɛlli ŋɔ ni;” ka ŋmaligi yɛli nandan’ la ŋuna, “Ʒe nimaani bee kamina nti ʒin’ tiŋa n naba ŋɔ shee”

⁴yi yi niŋdi lala, yi bi yaala so yuri ka chɛ so, ka lan leei bɛn doli tɛhi’ biɛri soli kariti saria?

⁵M mabiyurisi, wummiya! Pa Naawuni m-pii ninvuɣ’ shɛb’ bɛn nyɛ nandaamba dunia ŋɔ ni ni bɛ nyɛ azichinima zaŋ chaŋ yɛda niŋbu polo, ka lan nyɛ bɛn ti yɛn di nam shɛli o ni zaŋ lo bɛn yur’ o alikauli la?

⁶Amaa yinim’ lihi ʒiɛmla nandaamba. Pa bundaannima n-nahindi ya la? Pa bɛna n-dariti ya tahiri ʒiishee la?

⁷Pa bɛna n-nyɛ bɛn turi jilima yu’ shɛli Naawuni ni zaŋ boli ya la?

⁸ Yi yi doli Naawuni nam zaligu kaman di ni wuhi shɛm Naawuni Kundi ni la, yi niŋ din tuhi. Dina n-nyɛ: “Yum’ a ʒiʒiinikpee kaman amaŋmaŋ’ la.”

⁹Amaa yi yi yaai so yuri ka chɛ so, yi tum alahichi, ka Naawuni zaligu nya yi taali ka wuhi ni yi nyɛla zaligusaɣindiba.

¹⁰Ka ŋunkam saɣim Naawuni zaligu zaɣ’ yini ni mali di zaa saɣimbu taali.

¹¹ Dama ŋun yɛli, “Miri ka a niŋ zina” la n-nyɛ ŋun lan yɛli, “Miri ka a ku ninsal’ la.” Ka a yi bi niŋ zina, amaa ka lee ku ninsala, dindina a leei Naawuni zaligusaɣinda m-bala.

¹²Dinzuɣu tɔɣisimiya ka niŋmiya kaman bɛn nyɛ Naawuni ni ti yɛn zaŋ o zaligu shɛli din tiri yolisim la kari shɛb’ saria.

¹³Ninvuɣ’ so ŋun bi zɔri nambɔɣu ti ku nya nambɔzɔbo saria karibu puuni; amaa ŋun zɔri nambɔɣu ni ti di nasara saria karibu puuni.

¹⁴M mabihi, so yi yɛli ni o mali yɛda, amaa ka di bi tumdi tuma, di buchi lee nyɛla dini? Yɛda niŋbu ŋɔ tatabo ni tooi tilig’ o?

¹⁵Chɛ ka ti yɛli ni yi mabia ŋun nyɛ doo bee paɣa beni n-nyɛla ŋun chani gbinfini ka ka bindirigu din ni di.

¹⁶Ka yi ni so yɛl’ o ni o cham’ ni suhudoo; ka lan yɛl’ o ni Naawuni ni chɛ ka o nya n-ye ka di n-tiɣi, amaa ka bi ti o binshɛl’ din simd’ o niŋgbuŋ, di buchi lee nyɛla dini?

¹⁷Lala n-nyɛ yɛda niŋbu kɔŋko gba, di yi bi tumdi tuma, di nyɛla yɛda kpiŋ.

¹⁸Amaa so ni yɛli, “A malila yɛda, ka m mi mali tuma.” N gba ni yɛli, “Wuhim’ ma a yɛda niŋbu din bi tumdi tuma maa, ka m mi wuh’ a n yɛda niŋbu n tuma tumbu puuni.”

¹⁹A niŋ yɛda ni Naawuni yino ko m-beni. Lala tuhiya! Hal alizin’ biɛri gba niŋdi yɛda lala, ka zɔri dabiɛm.

²⁰Nyin’ ŋun tɛha bi zilimmi ŋɔ, a bɔri ni so n-wuh’ a ni yɛda niŋbu din bi tumdi tuma nyɛla yɛda ŋoli?

²¹ Ti yab’ Ibrahimma ni daa zaŋ o bia Yisahaku mali sara bimbini zuɣu la, pa o tuma tumbu zuɣu ka o daa yi taali ni Naawuni sani?

²²A bi nya ka di nyɛla o yɛda niŋbu min’ o tuma tumbu n-daa laɣim tum lala maa? Ka o yɛda niŋbu daa niŋ dɛde la o tuma tumbu puuni.

²³ Ka dimbɔŋɔ chɛ ka Naawuni Kundi ni luɣ’ shɛli din yɛli ni Ibrahimma daa niŋ Naawuni yɛda ka Naawuni zaŋ o zali wuntia zaani la niŋ pali; dina n-chɛ ka Naawuni daa bol’ o o zo.

²⁴Yi nya nir’ ni yiri taali ni Naawuni sani o tuma tumbu zuɣu shɛm, ka pa ni o yɛda niŋbu kɔŋko zuɣu.

²⁵ Lala ka Reehab ŋun daa nyɛ pagɔrili la gba daa niŋ yi taali ni Naawuni sani, o ni daa deei tuumba la n-chɛ ka bɛ taɣi doli so’ shɛli n-zo n-tiligi la puuni.

²⁶Dinzuɣu shia ni ka niŋgbun shɛl’ ni ni nyɛ niŋgbuŋ kpiŋ shɛm la, lala ka yɛda niŋbu din bi tumdi tuma gba nyɛ yɛda kpiŋ.