Read Dagbani 2 Pita 1 Bible Online

2 Pita 1 - Dagbani bible

2 Pita 1

¹Man’ Saimɔn Pita ŋun nyɛ Yisa Masia dabili ni o tumo la n-sabiri gbaŋ ŋɔ tiri ninvuɣ’ shɛb’ bɛn yɛda mali buchi kaman ti gba yɛda ni mali buchi shɛm ti Naawuni ŋun nyɛ ti Tiligira Yisa Masia wuntitali puuni la.

²Naawuni niŋm’ alibarika niŋ yi ni, ka tin ya suhudoo din kul zoori pahiri Naawuni mini ti Duuma Yisa baŋbu puuni!

³Masia Naawunitali yiko chɛ ka ti nya binshɛɣukam zaa din simdi ni ti zaŋ mali nyɛvili mini biɛhigu din luri Naawuni sizuura, ŋuna ŋun bol’ ti o jilima min’ o zaɣisuntali baŋbu puuni la zuɣu.

⁴Dimbɔŋɔnim’ zuɣu ka o lo ti alikauli kara din mali buchi ni di chɛ ka ti yi dunia ŋɔ niŋgbuŋ kɔr’ biɛri din saɣindi ninsalinim’ la ni, ka ti min’ o laɣim mali Naawunitali biɛhigu.

⁵Dimbɔŋɔ zuɣu lomiya ania n-chɛ ka zaɣisuntali pahi yi yɛda niŋbu zuɣu, ka chɛ ka baŋsim pahi yi zaɣisuntali zuɣu,

⁶ka chɛ ka yi maŋgbibbu pahi yi baŋsim zuɣu, ka chɛ ka yi ʒiɛyimtali pahi yi maŋgbibbu zuɣu, ka chɛ ka yi Naawuni sizuura lubu pahi yi ʒiɛyimtali zuɣu,

⁷ka chɛ ka yi mabihili nirilim niŋbu pahi yi Naawuni sizuura lubu zuɣu, ka chɛ ka yi yurilim mi pahi yi mabihili nirilim niŋbu maa zuɣu.

⁸Dimbɔŋɔnim’ yi be yi ni galisi pam, di ni chɛ ka yi nyɛla bɛn tumdi viɛnyɛliŋga, ka nyɛ bɛn mali buchi baŋbu shɛli din yiri ti Duuma Yisa Masia ni na la puuni.

⁹Ŋunkam ka dimbɔŋɔnim’ nyɛla tɛhijihilana ni zoma, ka lan nyɛla ŋun tam ni o daalahichi pun kpihim.

¹⁰Dinzuɣu m mabihi, kpaŋmiya yimaŋ’ niŋ nimmoo n-chɛ ka yi bolibu mini yi piibu la ba n-zani, dama yi yi niŋ lala yi ku lu.

¹¹Ka dimbɔŋɔ ni chɛ ka yi nya soli kpe ti Duuma ŋun nyɛ ti Tiligira Masia nam din ka bahigu la ni.

¹²Daliri ŋɔ zuɣu ka n lo ni n kul teeri ya dimbɔŋɔnim’ yɛla, hal yi ni pun mi li ka ba n-zani yɛlimaŋ’ shɛli yi ni pun dee’ la ni zaa yoli.

¹³N tɛhiya ni di tuhiya ni n neei yi tɛha ka yi teeri yɛla ŋɔ, n ni na kul be n nyɛvili ni ŋɔ,

¹⁴dama m mi ni di ku lan yuui ka n kani kaman ti Duuma Yisa Masia ni kahigi wuhi ma shɛm.

¹⁵Ka n ni kpaŋ mmaŋ’ niŋ di ni simdi ni n niŋ shɛm, ka di chɛ ka yi ti tooi teeri dimbɔŋɔnim’ yɛla sahakam n kalinsi nyaaŋa.

¹⁶Pa kurimbuni lahibaya din pa yɛlimaŋli ka ti daa zaŋ wuhi ya ti Duuma Yisa Masia yiko min’ o kandina yɛla, amaa ti nyɛla shɛhiranim’ bɛn nini daa nya o jilima.

¹⁷ Dama saha shɛl’ o ni daa nya tibiginsim mini jilima o Ba Naawuni sani la ka kukoli daa yi Zallakudura Naa Jilima Biɛhigu Shee na n-di o shɛhira yɛli, “M Biyurigu m-bɔŋɔ; n nin’ ni tiɣi so pam m-bala.”

¹⁸Ka ti daa wum kukoli din yi alizanda ni na di o shɛhira maa, dama ti daa be o sani zoli din be kasi la zuɣu.

¹⁹Dinzuɣu ti niŋ anabinim’ ni daa tɔɣisi yɛtɔɣ’ shɛŋa la naani pam. Ka yi yi niŋ ania dol’ li, yi niŋ din tuhi viɛnyɛliŋga, dama di ŋmanila firila din ne zibisim ni hal ka biɛɣu ti neerina ka biɛŋmariga neesim neei yi suhuri ni la.

²⁰Ka din nyɛ yɛlikpeeni nyɛla, baŋmiya ni anabitali yɛtɔɣa din be Naawuni Kundi ni pala ninsal’ ni ni tooi kahigi shɛli gbinni wuhi omaŋmaŋ’ baŋsim puuni;

²¹dama anabitali yɛtɔɣa daa bi yirila ninsal’ suhu yubu ni na, amaa Naawuni Shia Kasi n-daa be ninsalinim’ ni n-chɛ ka bɛ tɔɣisiri Naawuni yɛtɔɣ’ shɛŋa din daa yir’ o sanna maa.