Read Dagbani 2 Pita 2 Bible Online

2 Pita 2 - Dagbani bible

2 Pita 2

¹Anab’ ʒirinim’ daa be kurimbuni saha niriba maa ni, ka lala ka karimba ʒirinim’ ni ti be yi gba ni. Bɛ ni ti doli yɛmbimbiɛri soli wuhiri wuhibu shɛŋa din pa yɛlimaŋli ka naɣ’ nyɛla din bahiri niriba yoli, hal bɛ ni chihi ŋun nyɛ Yikolana ka daa zaŋ omaŋ’ pa talima bɛ zuɣu la, ka di zuɣu ni chɛ ka bɛ bo bahiyotali ti bɛmaŋ’ yomyom.

²Ka niriba pam ni ti doli karimba ʒirinim’ ŋɔ kɔr’ biɛri soya, ka bɛ biɛhigu zuɣu ni chɛ ka niriba tɔɣisi yɛtɔɣ’ biɛri dalim yɛlimaŋli sol’ la.

³Ka karimbanim’ bɛn nyɛ diribarilimnim’ ŋɔ ni zaŋ bɛmaŋmaŋ’ ni nam yɛtɔɣ’ shɛŋa tɔɣisi ya ni bɛ zaŋ ya bo liɣiri. Amaa bɛ Sariakarita ŋun ni bahi ba yoli pun mali shili ka di wɔɣa; ka mi bi gbihira.

⁴Naawuni daa bi tiligi malaika shɛb’ bɛn daa tuui tum alahichi la, amaa o daa zaŋ ba bahila buɣim biɛhigu shee n-lo ba zoligɔnim’ zali luɣ’ shɛli din nyɛ bumbɔni shee gu saria karibu dali.

⁵ Naawuni daa bi tiligi kurimbuni ha dunia la, amaa o daa chɛ ka kom di di saha maa ninvuɣ’ shɛb’ bɛn daa bi luri ŋun’ Naawuni sizuura la, ka ninvuɣ’ shɛb’ bɛn daa naɣ’ tiligi di ni nyɛla Anabi Nuhu ŋun daa yihi wuntia soli waazu la mini niriba ayopɔin bɛn daa pah’ o zuɣu la kɔŋko.

⁶ Naawuni daa nya Sɔdom mini Gomɔra tinsi la nim’ taali, ka daa zaŋ buɣim bahi ba yoli wuliwuli, ka di wuhi din ti yɛn niŋ ninvuɣ’ shɛb’ bɛn bi luri Naawuni sizuura.

⁷ Amaa Naawuni daa tiligi Lɔt ŋun daa nyɛ wuntizɔra ka o suhu bi piɛli ninvuɣ’ shɛb’ bɛn daa nyɛ zaligu saɣindiba daɣiri tuma zuɣu la zuɣu.

⁸Wuntizɔra ŋɔ daa bela niriba ŋɔ ni, ka o ni daa nyari shɛli ka wumdi shɛli dabisili kam daa nyɛla niriba maa tuumbiɛ’ shɛŋa din kul chihir’ o suhu.

⁹Dinzuɣu ti Duuma nyɛla ŋun mi o ni yɛn niŋ shɛm yihi wuntizɔriba bɛ zahimbu nyabu ni, ka lan mi o ni yɛn niŋ shɛm chɛ ka tuumbiɛrinim’ be tibidarigibo shee guli saria karibu dali,

¹⁰di bahi bamdi ninvuɣ’ shɛb’ bɛn doli bɛ niŋgbuŋ kɔre daɣiri tuma soli ka ʒiɛm Naawuni fukumsi subu la. Karimba ʒirinim’ ŋɔ nyɛla suhukpeendaannima ni bɛn duhiri bɛmaŋa. Bɛ bi zɔri ni bɛ tu bɛn mali jilima be alizanda ni la, amaa ka naɣ’ lee ʒiɛmdi ba mi,

¹¹ka hal malaikanim’ bɛn mali yaa mini kpiɔŋ gari karimba ʒirinim’ ŋɔ bi doli ʒiɛmbu soli fiɣisiri bɛn mali jilima maa ti Duuma sani.

¹²Niriba ŋɔ tatabo kul niŋdila bɛ suhuri ni yu ni bɛ niŋ shɛm. Bɛ ŋmanila biŋkɔbiri bɛn nyɛ bɛ ni dɔɣ’ shɛb’ ni bɛ ti gbahi ba kɔri la; bɛ nyɛla bɛn ʒiɛmdi bɛ ni bi baŋ yɛl’ shɛŋa gbinni. Bɛ ni ti bahi yoli kaman biŋkɔbiri la,

¹³ka ni ti nya wahala bɛ ni daa niŋ niriba wahala la zuɣu. Bɛ nyɛla bɛn nini tiɣi niŋgbuŋ kɔre nyaɣisim tuun’ shɛŋa bɛ ni tumdi palɔni wuntaŋ’ ni la. Bɛ lan nyɛla daɣirinim’ bɛn tumdi vi tuma, ka hal bɛ yi pahi yi zuɣu yi bindirigu dibu laɣiŋgu ni, bɛ suhuri kul paligirila bɛ ni yɔhim ya shɛm di puuni la zuɣu.

¹⁴Bɛ nina kul kpala paɣiba bɛn nyɛ zinaniŋdiba, ka bɛ nina na ʒi n-tiɣi shɛli alahichi tumbu puuni. Bɛ nyɛla bɛn bariti zana ni bɛ gbahi ninvuɣ’ shɛb’ bɛn bi ʒe yim, ka nyɛ bɛn bɔhim baŋ diribarilim tuma yɛla. Mbusim be bɛ zuɣu!

¹⁵Bɛ chɛ soli din tuhi ka birigi; bɛ dolila Bɛɔr bia Anabi Balaam ŋun daa tum din bi tuhi liɣiri nyabu zuɣu la naba.

¹⁶ Amaa Naawuni daa kpah’ o zuɣu ni di zuɣu, ka chɛ ka buŋ’ ŋun bi tɔɣisiri yɛtɔɣa tooi tɔɣisi yɛtɔɣa kaman ninsal’ la n-kari anabi maa o yinyari tuma ni.

¹⁷Niriba ŋɔ tatabo ŋmanila kulibɔŋ kuma mini sagban’ shɛŋa sanʒiɛɣu ni ʒiɛri chana, ka Naawuni mali biɛhigu shee bumbɔn’ ni zali gu ba.

¹⁸Bɛ nyɛla bɛn tɔɣisiri karimbaan’ yɛtɔɣa din nyɛ jɛritali, ka zaŋ niŋgbuŋ kɔre tuma leei zana bari ni bɛ gbahi bɛn na yoli yi ninvuɣ’ shɛb’ bɛn be biriginsim puuni kalinli ni la.

¹⁹Bɛ lo ba yolisim nyabu alikauli, amaa ka bɛmaŋmaŋ’ nyɛ bɛn zaŋ bɛmaŋ’ leei bahiyotali tuun’ shɛŋa bɛ ni tum ka di mili ba la daba, dama ninsal’ nyɛla binshɛɣukam din nyaŋ o dabili.

²⁰Ka ninsalinim’ yi yi dunia ŋɔ binyara din tari ba daɣiri ni, bɛ ni baŋ ti Duuma ŋun nyɛ ti Tiligira Yisa Masia la puuni, di yi lan gbahi ba nyaŋ ba, di nyaaŋa bɛ ni be barina ni di saha maa gari di piligu ni.

²¹Ka bɛ yi di daa bi pun baŋ wuntia soli yɛla, di naan so n-gari bɛ baŋ li ka lan ŋmaligi ka chɛ Naawuni zaligu kasi shɛl’ o ni daa zaŋ ti ba la.

²² Ka din niŋ ba maa wuhiya ni yɛliŋahili la nyɛla yɛlimaŋli. Ŋahili maa ni yɛli shɛm m-bɔŋɔ: “Baa labi dir’ o tiri, ka bɛ ni su kuruchu so kom mi lan ŋmaligi labi ti bilindi baɣiri ni yaha.”