Read Dagbani 2 Pita 3 Bible Online

2 Pita 3 - Dagbani bible

2 Pita 3

¹M mabiyurisi, n ni sabiri gban shɛli tiri ya ŋɔ pahirila diba ayi. Gbana maa zaa puuni, n loya ni n neela yi nimmoo tɛha la n-teei ya yɛla ŋɔ.

²Di simdi ni yi teei anab’ suma ni daa tɔɣisi yɛtɔɣ’ shɛŋa n-zal’ la mini ti Duuma ŋun nyɛ ti Tiligira zaligu shɛl’ o ni zaŋ ti yi tuumba la ni be zaŋ yɛli ya la yɛla.

³ Din daŋ tooni nyɛla, di niŋ kamaata ni yi baŋ ni ʒiɛmani din bahindi nyaaŋa puuni, ninvuɣ’ shɛb’ bɛn doli bɛmaŋmaŋ’ niŋgbuŋ kɔre soli ni ti beni. Bɛ ni ti nyɛla ansarisimaaniba bɛn maani yi ni niŋ shɛli yɛda la ansarisi

⁴ka bɔhira, “O labbuna alikauli lɔbu palibu la lee be ya? Dama ti banim’ kalinsi nyaaŋa hal ni pɔŋɔ, binshɛɣukam na kul bemi kaman di ni daa be shɛm dunia nambu saha la.”

⁵ Bɛmbɔŋɔ nyɛla bɛn mi, amaa ka zaɣisi ni bɛ saɣi ni tum dunia piligu ni ha, Naawuni daa zaŋla o nol’ ni yɛtɔɣa nam zuɣusaa mini dunia ŋɔ. Kom ka Naawuni daa zaŋ nam dunia tiŋgbani ŋɔ, ka chɛ ka di yi kom ni na.

⁶ Ka di lan nyɛla kom din daa nyɛ kokpɛɣu la ka Naawuni daa zaŋ saɣim tuuli dunia la.

⁷Amaa Naawuni nol’ ni yɛtɔɣ’ yinsi maa ka o zaŋ yɛli zali zuɣusaa mini dunia tiŋgbani din be pumpɔŋɔ ŋɔ ni buɣim ti saɣim li ŋɔ. Di ʒiɛya gulila dahin’ shɛli Naawuni ni ti yɛn kari ninvuɣ’ shɛb’ bɛn bi luri ŋun’ Naawuni sizuura saria la.

⁸ Amaa m mabiyurisi, di tamya bin’ yini din nyɛ yɛlimaŋli ŋɔ yɛla. Dina n-nyɛ: Ti Duuma sani, dahin yini nyɛla kaman yuun’ tuhili, ka yuun’ tuhili mi nyɛ kaman dahin yini.

⁹Ti Duuma pala ŋun bi niŋdi yomyom zaŋ chaŋ o daalikauli palibu polo kaman ninvuɣ’ shɛb’ ni tɛhiri shɛm la, amaa o lee nyɛla ŋun mali suɣilo zaŋ chaŋ yi polo, dama o bi yu ni so ti bahi yoli, amaa o bɔri ni sokam zaa lee niŋla tuuba.

¹⁰ Amaa ti Duuma dabisili la dali ni ti kana kaman tayiɣa ni chani shɛm la; di saha maa zuɣusaa ni ti vuui ni vuɣɔbu pam, ka buɣim ni ti chɛ ka binyara din be zuɣusaa nyɛligi; ka buɣim ti di dunia tiŋgbani ŋɔ mini binyara din be di zuɣu.

¹¹ Ka dimbɔŋɔnim’ zaa ni ti yɛn bahi yoli ŋɔ zuɣu, di simdi ni yi nyɛla ninvuɣ’ bɔnima? Di niŋ kamaata ni yi bebu be kasi, ka yi nyɛ bɛn luri Naawuni sizuura binshɛɣukam zaa ni

¹²saha shɛli yi ni guhiri Naawuni dabisili dali ka yi suhuri kul ye di kandina zuɣu ŋɔ. Dindali maa buɣim ni ti taai zuɣusaa di li zaa, ka buɣim maa ni ti chɛ ka binyara din be zuɣusaa maa nyɛligi.

¹³Amaa Naawuni ni lo ti alikauli shɛl’ la zuɣu, tinim’ kul guhirila zuɣusaa mini dunia tiŋgbani din nyɛ zaɣ’ pala, ka wuntitali be di ni la.

¹⁴Dinzuɣu m mabiyurisi, yi ni guhiri dimbɔŋɔnim’ maa zuɣu, kpaŋmiya yimaŋ’ mali biɛr’ kasi ka ku mali galimi Naawuni sani, ka di chɛ ka suhudoo be yi min’ o sunsuuni.

¹⁵Baŋmiya ni ti Duuma suɣilɔdibo la nyɛla din tin ya dahima ni yi tiligi kaman ti mabiyurigu Pool ni daa sab’ shɛm tin ya Naawuni ni ti o yɛn shɛl’ la puuni la.

¹⁶Lala ka o yɛli o gbana la zaa puuni o ni sab’ shɛm zaŋ chaŋ yɛlli ŋɔ polo. Yɛl’ shɛŋa din baŋbu to be o gbana maa puuni, ka ninvuɣ’ shɛb’ bɛn be ʒilinsi ni ka bi ʒe yim la tiligitiligi li wuhiri ka di bi doli di yɛlimaŋli soli kaman bɛ ni pun niŋdi Naawuni Kundi ni sabbu shɛŋa shɛm la. Bɛ niŋdila lala bɔri bahiyolitali tiri bɛmaŋa.

¹⁷Dinzuɣu m mabiyurisi, yi ni pun mi dimbɔŋɔ yɛla zuɣu, miriya ka yi doli zaligusaɣindiba ŋɔ biriginsim soli maa ka kɔŋ yimaŋmaŋ’ ʒiɛyimtali zaashee la ni zanibu.

¹⁸Amaa kul zoomiyala ti Duuma ŋun nyɛ ti Tiligira Yisa Masia daanfaani min’ o baŋbu puuni. Ŋuna n-simdi tibigibu pumpɔŋɔ zaŋ hal ni saha din ka bahigu! Ami!