Read Dagbani 1 Jɔn 2 Bible Online

1 Jɔn 2 - Dagbani bible

1 Jɔn 2

¹M bihi, n sabirila dimbɔŋɔnim’ tiri ya ni di chɛ ka yi ku tum alahichi, amaa yi ni so yi tum alahichi, ti mali sandaantimda ŋun be ti Ba Naawuni sani: ŋuna n-nyɛ Yisa Masia ŋun nyɛ wuntialan’ la.

²Ŋun’ maŋmaŋa n-lan nyɛ sara maligu din kpihindi ti daalahichi, ka o pala ti kɔŋko daalahichi sara maligu, amaa o nyɛla dunianim’ zaa daalahichi sara maligu.

³Ti yi dol’ o zaligunima, dina n-ni chɛ ka ti baŋ ni ti mi o.

⁴Ka ŋun yɛli ni o mi o ka bi dol’ o zaligunima, o ŋmarila ʒiri ka yɛlimaŋli ka o ni.

⁵Amaa ŋunkam dol’ o yɛligu, dilana n-nyɛ Naawuni yurilim ni niŋ dɛde so ni. Dimbɔŋɔ puuni ka ti ni tooi baŋ ni ti be Naawuni ni.

⁶Ka ŋun yɛli ni o be Naawuni ni, di niŋ kamaata ni o be kaman Masia ni daa be shɛm la.

⁷ M biyurisi, pa zaligu palli ka n sabiri tiri ya, amaa di nyɛla zaligu kur’ shɛli yi ni daa pun mali piligu ni ha la. Zaligu kurili maa nyɛla yi ni daa pun wum yɛligu shɛl’ la yɛla.

⁸Amaa n ni sabiri zaligu shɛli tiri ya ŋɔ bahi nyɛla zaligu palli, ka di yɛlimaŋtali yi palo Masia ni ni yi gba ni, dama zibisim kul vuurimi chana, ka neesim maŋli mi pum neei na.

⁹Ka ŋunkam yihi yɛli ni o bela neesim ni ka je o mabia, o na kul bela zibisim ni.

¹⁰Ka ŋunkam yur’ o mabia nyɛla ŋun be neesim ni, ka shɛli ka di ni din ni chɛ ka so tuui.

¹¹Amaa ŋunkam je o mabia, o bela zibisim ni ka kul chanila zibisim maa puuni ka ʒi o ni kpari shɛli polo, dama zibisim maa zom o nina.

¹²M bihi, n sabirila gbaŋ ŋɔ tiri ya yi ni nya yi daalahichi chɛ m-paŋ Masia zuɣu la zuɣu.

¹³M banima, n sabirila gbaŋ ŋɔ tiri ya yi ni pun mi ŋun daa be piligu ni ha la zuɣu. Nachimbihi, n sabirila gbaŋ ŋɔ tiri ya yi ni pun nyaŋ Tuumbiɛrilan’ la zuɣu.

¹⁴M bihi, n sabila gbaŋ ŋɔ tin ya yi ni mi ti Ba Naawuni la zuɣu. M banima, n sabila gbaŋ ŋɔ tin ya yi ni mi ŋun daa be piligu ni ha la zuɣu. Nachimbihi, n sabila gbaŋ ŋɔ tin ya yi ni mali kpiɔŋ ka Naawuni yɛligu be yi ni ka yi pun nyaŋ Tuumbiɛrilan’ la zuɣu.

¹⁵Di yuriya dunia ŋɔ bee binshɛŋa din be dunia ŋɔ ni. So yi yuri dunia ŋɔ, ti Ba Naawuni yurilim ka o ni.

¹⁶Dama binshɛɣukam din be dunia ŋɔ ni pala din yi ti Ba Naawuni sanna, amaa di nyɛla din yi dunia ŋɔ ni na. Dina n-nyɛ: Niŋgbuŋ kɔre mini nini kɔre ni barinyubo dunia ŋɔ biɛhigu zuɣu.

¹⁷Ka dunia ŋɔ mini di kore nyɛla din garita, amaa ŋunkam tumdi Naawuni yubu kul ni be hal ni saha din ka bahigu.

¹⁸M bihi, ʒiɛmani din bahindi nyaaŋa m-bɔŋɔ. Ka yi ni daa pun wum ni ninvuɣ’ so ŋun nyɛ Masiachihira ni ti kana la, hal Masiachihiriba pam pun kana gba, dinzuɣu ti baŋya ni ʒiɛmani din bahindi nyaaŋa n-shiri bɔŋɔ.

¹⁹Bɛmbɔŋɔnim’ pala ti ni niriba; lala zuɣu ka bɛ daa yi ti ni. Bɛ yi di daa nyɛla ti ni niriba, bɛ daa naan kpalim be ti sani. Amaa bɛ daa yi ti ni ni di kahigi wuhi ni bɛ zaa pala bɛn be ti ni.

²⁰Ka ŋun nyɛ Naawuni Ninvuɣ’ suŋ la pun tin ya Naawuni Shia Kasi, ka di chɛ ka yi zaa baŋ din nyɛ yɛlimaŋli.

²¹N ni sabi gbaŋ ŋɔ tin ya maa bi wuhi ni yi ʒila yɛlimaŋli, amaa yi ni lee mi li ka baŋ ni ʒiri ka yɛlimaŋli ni la zuɣu.

²²Ŋuni n-lee nyɛ ʒirilana ka pa ni ŋun chihi ni Yisa pala Masia? Ninvuɣ’ so ŋun chihi ti Ba Naawuni min’ o Bia maa, dilana n-nyɛ Masiachihira.

²³Ŋunkam chihi Bia maa, o ka ti Ba Naawuni. Ka ŋunkam deei Bia maa mali ti Ba Naawuni gba.

²⁴Chɛliya ka yi ni daa wum shɛli piligu ni la ha kul kpalim be yi suhuri ni. Yi ni daa wum shɛli piligu ni maa ha yi kul kpalim be yi ni, dindina yi gba ni be Bia maa min’ o Ba Naawuni ni.

²⁵Masia maŋmaŋ’ ni lo alikauli ni o ti ti shɛli nyɛla nyɛvili din ka bahigu.

²⁶N sabila dimbɔŋɔ tin ya ni n yɛli ya bɛn bɔri ni bɛ yɔhim ya la yɛla;

²⁷amaa yi ni daa deei Shia Kasi so Masia san’ la nyɛla ŋun kul kpalim be yi ni, ka di bi lan simdi ni so wuhi ya shɛli; Ka Naawuni Shia Kasi ni wuhiri ya binshɛɣukam ka di nyɛ yɛlimaŋli ka pa ʒiri la zuɣu, kul benya Masia ni.

²⁸M bihi, kul kpalimmiya be o ni pumpɔŋɔ, ka di chɛ ka o ti yi palo ka ti tooi mali suhukpeeni, ka ti ku tiri gbini n-zo o sani vi zuɣu o labbuna dali.

²⁹Yi yi mi ni o nyɛla wuntialana, yin’ baŋmiya ni ŋunkam tumdi din tuhi nyɛla Naawuni bia.