Read Dagbani 1 Jɔn 3 Bible Online

1 Jɔn 3 - Dagbani bible

1 Jɔn 3

¹ Nyamiya ti Ba Naawuni ni yu ti yurilim shɛli, ka di zuɣu chɛ ka o bol’ ti ŋun’ Naawuni bihi; ka lala n-shiri nyɛ ti. Dimbɔŋɔ zuɣu ka dunia ŋɔ nim’ bi mi ti, ka di nyɛla bɛ ni bi mi o la zuɣu.

²M biyurisi, ti nyɛla Naawuni bihi pumpɔŋɔ, ka di na bi kahigi wuhi ti ni ti yɛn be shɛm, amaa ti lee mi ni o yi ti yi palo, ti ni bemi kaman ŋuna, dama ti ni ti nya o kaman o ni kul be shɛm.

³Ka ŋunkam mali tahima ŋɔ kul maanila omaŋa m-be kasi kaman o ni be kasi shɛm.

⁴Ŋunkam tumd’ alahichi nyɛla zaliguchihira, dama alahichi tumbu nyɛla zaligu chihibu.

⁵ Yi mi ni Masia daa kana ni o ti kpihimla ninsalinim’ daalahichi, ka alahichi ka o ni.

⁶Ka ŋunkam be Masia ni, o bi tumd’ alahichi; ka ŋunkam kul tumd’ alahichi, dindina o na bi nya o bee m-mi o.

⁷M bihi, di chɛliya ka so yɔhim ya. Ŋunkam tumdi din tuhi n-nyɛ wuntizɔra kaman Masia ni nyɛ wuntizɔra shɛm.

⁸Ka ŋunkam kul tumd’ alahichi nyɛla Sintani nira, dama piligu ni ha ka Sintani pun tumd’ alahichi. Ka daliri din chɛ ka Naawuni Bia daa kana nyɛla ni o ti saɣim Sintani tuma.

⁹Ŋunkam nyɛ Naawuni bia bi tumd’ alahichi, Naawuni biɛhigu ni be o ni ka o nyɛ Naawuni bia maa zuɣu ka o ku tooi tum alahichi.

¹⁰Dimbɔŋɔ n-kahigiri wuhiri Naawuni bihi ni nyɛ shɛba, ka lan wuhiri Sintani gba bihi ni nyɛ shɛba: Ŋunkam bi tumdi din tuhi bee n-yur’ o mabia pala Naawuni bia.

¹¹ Yi ni daa wum yɛtɔɣ’ shɛŋa piligu ni ha la nyɛla ni ti yum’ taba.

¹² Di bi simdi ni ti be kaman Keen ŋun daa nyɛ Sintani nira ka ku o mabia la. Bɔzuɣu ka o daa lee ku o? Di nyɛla o tuma ni daa bi tuhi ka o mabia maa ŋun’ tuma tuhi la zuɣu.

¹³M mabihi, dunianim’ yi jɛn ya, yin’ di chɛliya ka di gari ya.

¹⁴ Ti mi ni ti pun yi kum ni n-kpe nyɛvil’ ni ti ni yuri ti mabihi la zuɣu. Ka ŋunkam bi yur’ o mabia bela kum ni.

¹⁵Ŋunkam je o mabia nyɛla ninvuɣ’ kura, ka yi mi ni ninvuɣ’ kura ka nyɛvili din ka bahigu o ni.

¹⁶Masia ni daa zaŋ o nyɛvili pa talima ti zuɣu la puuni ka ti baŋ yurilim ni nyɛ shɛli, ka di simdi ni ti gba zaŋ ti nyɛviya pa talima ti mabihi zuɣu.

¹⁷So yi mali dunia ŋɔ buni, ka nya o mabia ŋun simdi sɔŋbu ka yih’ o suhu o ni, wula ka Naawuni yurilim ni tooi be nira ŋ-ŋɔ tatabo ni?

¹⁸M bihi, di bi simdi ni ti yurilim nyɛla yɛtɔɣa bee ti ni yɛri shɛm kɔŋko, amaa di simdi ni di nyɛla yurilim maŋli di tuma puuni.

¹⁹Dimbɔŋɔ puuni ka ti baŋ ni ti dolila yɛlimaŋli, ka di chɛ ka ti mali suhukpeeni Naawuni sani.

²⁰Ka saha shɛlikam ti suhuri yi ti wuhi ti ni ti mali galimi, Naawuni gari ti suhuri maa, ka mi binshɛɣukam zaa.

²¹M biyurisi, ti suhuri yi bi wuhi ti ni ti mali galimi, ti ni mali suhukpeeni Naawuni sani,

²²ka ni deei ti ni suhi shɛlikam o sani, ti ni dol’ o zaligunim’ ka tumdi din tiɣir’ o nini la zuɣu.

²³ O ni zali ti shɛm n-nyɛ ni ti niŋ o Bia Yisa Ba Masia yuli yɛda ka yuri taba kaman o ni zali ti shɛm.

²⁴Ka bɛnkam zaa dol’ o zaligunim’ maa be o ni, ka o mi be bɛ ni. O ni zaŋ o Shi’ so ti ti la n-chɛ ka ti baŋ ni o be ti ni.