Read Dagbani 1 Jɔn 4 Bible Online

1 Jɔn 4 - Dagbani bible

1 Jɔn 4

¹M biyurisi, di niŋya ŋunkam yɛli ni o mali Naawuni Shia yɛda, amaa buɣisimiya ba nya bɛ ni mali shi’ so maa yila Naawuni sanna; dama anab’ ʒirinim’ pam yiɣisiya m-be dunia ŋɔ ni luɣ’ shɛlikam.

²Dimbɔŋɔ n-ni chɛ ka yi tooi baŋ shi’ so ŋun yi Naawuni sanna: Ŋunkam yɛli ni Yisa Masia daa leei ninsala n-ka dunia ŋɔ ni na n-nyɛ ŋum mali Shi’ so ŋun yi Naawuni sanna;

³amaa ŋunkam chihi dimbɔŋɔ zaŋ chaŋ Yisa polo pala ŋun mali Shi’ so ŋun yi Naawuni sanna. Ka shia ŋɔ nyɛla shi’ so ŋun yi Masiachihira sanna, ka yi mi pun wum ni o ni ti kana, ka hal o pun be dunia ŋɔ ni pumpɔŋɔ.

⁴Amaa m bihi, yi nyɛla Naawuni niriba ka pun nyaŋ anab’ ʒirinim’ maa, dama Shi’ so ŋun be yi ni maa mali yiko gari shi’ so ŋun be dunianim’ ni.

⁵Bɛ nyɛla dunia ŋɔ niriba, dinzuɣu ka bɛ tɔɣisiri dunia ŋɔ yɛla, ka dunia ŋɔ nim’ wumdi tiri ba.

⁶Amaa tinim’ nyɛla Naawuni niriba. Ka ŋunkam nyɛ Naawuni nir’ nyɛla ŋun wumdi tiri ti; ka ŋunkam mi pa Naawuni nir’ pala ŋun wumdi tiri ti. Dinzuɣu dimbɔŋɔ puuni ka ti ni tooi baŋ Shi’ so ŋun nyɛ yɛlimaŋli Shia, ka lan baŋ shi’ so ŋun nyɛ biriginsim shia.

⁷M biyurisi, chɛliya ka ti yuri taba, dama yurilim yirila Naawuni sanna; ka ŋunkam yur’ o mabia nyɛla Naawuni bia, ka mi Naawuni.

⁸Ka ŋunkam bi yur’ o mabia pala ŋun mi Naawuni, dama Naawuni nyɛla yurilim.

⁹Ŋ-ŋɔ ka Naawuni niŋ wuhi ni o yuri ti: O daa tim o Bi’ gaŋ’ na ni o ti chɛ ka ti nya nyɛvili o zuɣu.

¹⁰Dimbɔŋɔ n-wuhiri yurilim ni nyɛ shɛli: Di pala tinima n-daa yuri Naawuni, amaa ŋuna n-daa yuri ti ka tim o Bia na ni o ti leei sara maligu din kpihindi ti daalahichi.

¹¹M biyurisi, Naawuni yi yuri ti ŋ-ŋɔ, dindina di simdi ni ti gba yuri taba.

¹² So na ʒi n-nya Naawuni, ka ti yi yuri taba Naawuni ni be ti ni ka o yurilim ni niŋ dɛde ti ni.

¹³Dimbɔŋɔ puuni ka ti baŋ ni ti be o ni ka o gba be ti ni. Dina n-nyɛ: O ni zaŋ omaŋmaŋ’ Shia ti ti la zuɣu.

¹⁴Ka ti nya dimbɔŋɔ ka di li shɛhira n-yɛri ni ti Ba Naawuni daa tim o Bia na ni o ti leei dunianim’ Tiligira.

¹⁵Ka ŋunkam kahigi yɛli ni Yisa nyɛla Naawuni Bia, Naawuni be o ni ka o gba be Naawuni ni.

¹⁶Ka timaŋmaŋ’ gba baŋ Naawuni yurilim ni nyɛ shɛm zaŋ chaŋ ti sani, ka niŋ yɛda. Naawuni nyɛla yurilim, ka ŋunkam kul be yurilim puuni nyɛla ŋun be Naawuni ni, ka Naawuni gba be o ni.

¹⁷Dimbɔŋɔ puuni ka yurilim niŋ dɛde ti ni ni di chɛ ka ti ti tooi mali suhukpeeni saria karibu dali, dama o ni be shɛm, lala ka ti gba biɛhigu be dunia ŋɔ ni.

¹⁸Dabiɛm ka yurilim puuni, ka yurilim din niŋ dɛde nyɛla din yihiri dabiɛm bahira. Dama dabiɛm mini tibidarigibo n-dol’ taba; dinzuɣu ŋunkam zɔri dabiɛm, yurilim na bi niŋ dɛde o ni.

¹⁹Ti wuhiri ti yurilim ni nyɛ shɛm, Naawuni ni daŋ n-yu ti la zuɣu.

²⁰Ka so yi yɛli ni o yuri Naawuni ka je o mabia, o nyɛla ʒirilana; dama ŋunkam bi yur’ o mabi’ so o nini ni nyari ku tooi yuri Naawuni ŋun nyɛ o ni bi nyari so la.

²¹Dimbɔŋɔ n-nyɛ zaligu shɛli Masia ni zali ti. Dina n-nyɛ: Ŋunkam yuri Naawuni, di simdi ni o yur’ o mabia gba.