Read Dagbani Zuɣulaannima 1 Bible Online

Zuɣulaannima 1 - Dagbani bible

Zuɣulaannima 1

¹Jɔshua kum nyaaŋa, ka Izraɛlnim’ daa bɔhi Naawuni, “Ka ŋun’ daŋ niriba n-lee yɛn daŋ tooni chaŋ ti tuhi Keenannim’ ŋɔ ti ti?”

²Ka Yawɛ daa yɛli ba, “Juda zuliya niriba n-yɛn daŋ chandi, m pun zaŋ tiŋgbani maa niŋ bɛ nuu ni.”

³Ka Juda zuliya niriba maa daa yɛli bɛ mabihi Simiɔn daŋ niriba maa, “Pahimiya ti zuɣu ka ti chaŋ bɛ ni zaŋ tiŋgban’ shɛli ti ti la ni ti tuhi Keenannim’ maa. Ka ti gba pahi yi zuɣu ka ti chaŋ bɛ ni zaŋ tiŋgban’ shɛli tin ya la ni.” Ka Simiɔn zuliya niriba maa daa pahi bɛ zuɣu ka bɛ chaŋ.

⁴Ka Juda zuliya niriba maa daa chaŋ ti liri Keenannim’ mini Pɛrizinima ka Yawɛ daa zaŋ ba niŋ bɛ nuu ni, ka bɛ tuhi ku bɛ ninvuɣ’ tuhi’ pia Bɛzɛk.

⁵Ka bɛ daa nya Adɔnibɛzɛk Bɛzɛk maa n-chɛ ka bɛ min’ o zaŋ nya taba, ka bɛ daa nyaŋ Keenannim’ mini Pɛrizinim’ maa.

⁶Ka Adɔnibɛzɛk daa guui, ka bɛ kari dol’ o ti gbaag’ o ŋ-ŋmah’ o nubihilɔri min’ o napombihilɔri bahi.

⁷Ka Adɔnibɛzɛk daa yɛli, “Nanim’ pisopɔin bɛn nubihilɔri mini bɛ napombihilɔri ŋmahiŋmahi n-yi gahindi bindir’ burisa din luri tiŋa n tooni, n ni niŋ shɛm ka Naawuni niŋ ma labisi maa.” Ka bɛ daa zaŋ o tahi Jɛrusalɛm ka o ti kpi nimaani.

⁸Ka Juda zuliya niriba maa daa tuhi deei Jɛrusalɛm, ka zaŋ takɔbi ku di niriba, ka nyo li buɣim bahi.

⁹Dimbɔŋɔ nyaaŋa ka Juda zuliya niriba maa daa lan chaŋ ti tuhi Keenannim’ shɛb’ bɛn be zoya tinsi ni mini bɛn be Nɛgɛb ni bɛn be zolɔna ni tinsi ni la.

¹⁰Ka bɛ daa lan chaŋ ti lu Keenannim’ bɛn be Hiburɔn (bɛ ni daa tuui booni tin’ shɛli Kiriatariba) la nim’ zuɣu n-tuhi nyaŋ Shɛshai mini Ahiman ni Talimai.

¹¹Ka Juda zuliya niriba maa daa lan yi nimaani chaŋ ti liri Dɛbirinima. Bɛ daa tuui booni li la Kiriatisɛfa.

¹²Ka Kalɛb daa yɛli, “Ŋun ni tooi chaŋ ti liri Kiriatisɛfanima n-tuhi nyaŋ ba ka deei bɛ tiŋ’ maa, n ni zaŋ m bipuɣiŋga Akisa ti o paɣ’ pini.”

¹³Ka Otiniɛl ŋun daa nyɛ Kalɛb tizo Kɛnaz bidibiga la daa chaŋ ti tuhi deei tiŋ’ maa, ka Kalɛb daa shiri zaŋ o bipuɣiŋga Akisa maa ti o ka o niŋ o paɣa.

¹⁴Bɛ ni daa ti kulisi Akisa na dahin’ shɛli, ka o daa kpam Otiniɛl jaande ni o suhim’ o ba tiŋgbani palo. Ka Akisa daa ti sheeg’ o buŋ’ zuɣu na, ka Kalɛb bɔh’ o, “Bɔ ka a bɔra?”

¹⁵Ka o garigi yɛl’ o, “Tim’ ma pini. A ni zaŋ Nɛgɛb ti ma la zuɣu, tim’ ma kulibɔna din kom zɔri gba pahi.” Ka Kalɛb daa zaŋ zuɣusaa polo mini naɣiliŋga ni kulibɔna ti o.

¹⁶Ka Musa deemba ŋun daa nyɛ Kɛn nir’ la daŋ niriba daa yiɣisi abie tihi tiŋ’[1] la ni n-dol’ Juda zuliya niriba maa ti ʒini Juda tiŋgban’ ni din lab’ Nɛgɛb polo m-miri Arad la. Bɛ daa ʒini pahila nimaani nim’ zuɣu.

¹⁷Ka Juda zuliya niriba mini bɛ mabia Simiɔn zuliya niriba daa chaŋ ti tuhi nyaŋ Keenannim’ bɛn be Zɛfat la n-ku ba zaa. Dinzuɣu ka bɛ daa boli tiŋ’ maa yuli Hɔrima.[2]

¹⁸Ka Juda zuliya niriba daa lan tuhi deei Gaza ni di tintarisi mini Ashikɛlɔn ni di tintarisi ni Ɛkurɔn ni di gba tintarisi.

¹⁹Ka Yawɛ daa sɔŋ Judanima ka bɛ tuhi deei zoya ni tinsi la, amaa ka lee bi tooi kari bɛn daa be bɔpiɛligu ni la, bɛ ni daa mali kuriti chɛchɛbunsi la zuɣu.

²⁰ Ka bɛ daa zaŋ Hiburɔn ti Kalɛb kaman Musa ni daa pun yɛli shɛm la; ka o daa kari Anaki bidibis’ ata la nimaani.

²¹ Amaa ka Bɛnjamin zuliya niriba daa bi kari Jɛbusinim’ bɛn daa be Jɛrusalɛm la, dina n-chɛ ka Jɛbusinim’ mini Bɛnjamin zuliya niriba maa na kul laɣim be Jɛrusalɛm hal ni zuŋɔ.

²²Ka Yisifu zuliya niriba gba daa chaŋ ni bɛ ti tuhi Bɛtɛlnima, ka Yawɛ daa sɔŋ ba.

²³Ka Yisifu zuliya niriba maa daa tim ni bɛ chaŋ ti puɣisi kaai Bɛtɛl nya di ni be shɛm. (Bɛtɛl yuli daa tuui boonila Luz).

²⁴Ka ninvuɣ’ shɛb’ bɛn daa chaŋ ni bɛ ti puɣisi kaai tiŋ’ maa daa ti chirigi do’ so ka o yi tiŋ’ maa ni na, ka bɛ yɛl’ o, “Ti suhir’ a, wuhim’ ti so’ shɛli din kuni tiŋ’ ŋɔ ni, ka ti niŋ a nirilim.”

²⁵Ka doo maa daa wuhi ba so’ shɛli din kuni tiŋ’ maa ni, ka Yisifu zuliya niriba maa daa kpe tiŋ’ maa ni ti zaŋ takɔbi ku tiŋ’ maa nima. Amaa ka daa chɛ do’ so ŋun wuhi ba tiŋ’ maa soli maa min’ o malibu ka bɛ chaŋ.

²⁶Ka doo maa daa zo n-kuli Hitinim’ tiŋgban’ ni n-daa ti me omaŋmaŋ’ tiŋa m-boli di yuli Luz; ka di yuli n-na kul bala hal ni zuŋɔ.

²⁷Manaasa zuliya niriba daa bi kari Bɛtishɛannim’ mini bɛ tiŋkpannim’ bee n-kari Taanaknim’ mini bɛ tiŋkpannim’ bee n-kari Dɔrinim’ mini bɛ tiŋkpannim’ bahi. Bɛ mi daa bi kari Ibiliamnim’ mini bɛ tiŋkpannim’ bee n-kari Mɛgidɔnim’ mini bɛ tiŋkpannima. Dinzuɣu ka Keenannim’ maa daa kul kpalim be bɛ tiŋgbani maa ni.

²⁸ Ka Izraɛlnim’ daa ti nya kpiɔŋ, ka muɣisi Keenannim’ maa ka bɛ tumdi tuma tiri ba, amaa ka lee bi kari ba.

²⁹ Ka Ifriim zuliya niriba daa bi kari Keenannim’ bɛn be Gɛza, ka Keenannim’ maa daa kpalim be nimaani pahi bɛ zuɣu.

³⁰Ka Zɛbulɔn zuliya niriba daa bi kari ninvuɣ’ shɛb’ bɛn be Kitirɔn bee ninvuɣ’ shɛb’ bɛn be Nahalol, ka Keenannim’ maa daa kpalim be nimaani pahi bɛ zuɣu; amaa ka bɛ daa lee muɣisiri ba ka bɛ tumdi tuma tiri ba.

³¹Ka Asha zuliya niriba daa bi kari ninvuɣ’ shɛb’ bɛn be Ako bee bɛn be Sidɔn bee bɛn be Ahilab bee bɛn be Akizib bee bɛn be Hɛliba bee bɛn be Afik bee bɛn be Rɛhɔb.

³²Ka Asha zuliya niriba maa mini Keenannim’ bɛn daa pun be tiŋgbani maa ni la kul laɣim be, bɛ ni daa bi kari ba maa zuɣu.

³³Ka Naftali zuliya niriba daa bi kari ninvuɣ’ shɛb bɛn be Bɛtishɛmɛshi bee bɛn be Bɛtanat, ka daa naɣ’ chɛ ka bɛ mini Keenannim’ bɛn daa pun be tiŋgbani maa ni la laɣim be, amaa ka bɛ lee muɣisiri Bɛtishɛmɛshinim’ mini Bɛtanatinim’ maa ka bɛ tumdi tuma tiri ba.

³⁴Ka Amɔrinim’ daa muɣisi Dan zuliya niriba n-kari ba labisi zoya ni tinsi la ni, ka daa bi saɣi ni bɛ siɣi tintan’ ni na.

³⁵Ka Amɔrinim’ maa daa kul kpalim be Harihɛrɛs mini Aijalɔn ni Shaalibim, amaa ka Yisifu zuliya niriba daa muɣisi ba hal ka bɛ ti tumdi tuma tiri ba.

³⁶Ka Amɔrinim’ maa tintariga daa kpuɣi Akirabim hal ni Sɛla n-yi nimaani zaŋ du ha.