Read Dagbani Zuɣulaannima 10 Bible Online

Zuɣulaannima 10 - Dagbani bible

Zuɣulaannima 10

¹Abimilɛk kum nyaaŋa ka ninvuɣ’ so ŋun daa yɛn fa Izraɛlnim’ bahi yi palo. Lala nir’ maa n-daa nyɛ Pua bia Tola ŋun daa nyɛ Dɔdo yaaŋa la. O daa yila Isaka zuliya ni na, ka be Shamir din be Ifriim tiŋgban’ ni zoya zuɣu la.

²O daa niŋ Izraɛlnim’ zuɣulana la yuun’ pisinaata. Ka o daa ti kpi, ka bɛ sɔɣ’ o Shamir.

³Tola kum nyaaŋa, ka Jair ŋun daa nyɛ Giliad nir’ la gba daa leei Izraɛlnim’ sariakarita yuun’ pisinaayi.

⁴Jair daa malila bidibisi pihita, ka bɛ nyɛ bɛn bari bunsi pihita. Ka o bihi maa daa mali tinsi pihita Giliad tiŋgban’ ni; ka bɛ na kul booni li Havɔtijairi hal ni zuŋɔ.

⁵Ka Jair daa ti kpi ka bɛ sɔɣ’ o Kamɔn.

⁶Dimbɔŋɔ nyaaŋa ka Izraɛlnim’ daa lan tum alahichi Yawɛ sani. Bɛ daa lan ŋmaligi jɛmdila Baal mini Ashitarɔt din nyɛ Sirianim’ mini Sidɔnnim’ ni Mɔabnim’ ni Ammɔnnim’ ni Filistianim’ buɣa la, ka zaɣisi Yawɛ, ka chɛ o jɛmbu.

⁷Ka Yawɛ suhu daa yiɣisi pam bahi bɛ zuɣu, ka o chɛ ka Filistianim’ mini Ammɔnnim’ kana ti tuhi nyaŋ ba.

⁸Ka bɛ daa nahim Izraɛlnim’ ka niŋ ba alaka pam di yuuni maa ni. Yuun’ pisaayika ka bɛ daa nahim Izraɛlnim’ zaa bɛn daa be Jɔɔdɛn Mɔɣili duli Amɔrinim’ tiŋgban’ shɛli din be Giliad tiŋgbɔŋ ni la.

⁹Ka Ammɔnnim’ daa ti gbaai Jɔɔdɛn Mɔɣili du ni bɛ ti tuhi Juda zuliya niriba mini Bɛnjamin zuliya niriba ni Ifriim zuliya niriba, ka di zuɣu chɛ ka nandahima daa mal’ Izraɛlnim’ pam.

¹⁰Ka Izraɛlnim’ daa kum niŋ Yawɛ yɛli, “Ti tum alahichi a sani, dama ti chɛ nyini ŋun nyɛ ti Naawuni ŋɔ jɛmbu, ka jɛmdila buɣa Baalnima.”

¹¹Ka Yawɛ daa bɔhi Izraɛlnim’ maa, “Ijiptinim’ mini Amɔrinim’ ni Ammɔnnim’ ni Filistianim’

¹²ni Sidɔnnim’ ni Amalɛknim’ ni Maɔnim’ ni daa nahindi ya, ka yi kum niŋ ma la, n daa bi fan ya bɛ nuu ni bahi?

¹³Dimbɔŋɔ zaa yoli, ka yi zaɣisi ma ka jɛmdila buɣa, dinzuɣu n ku lan fan ya bahi yaha.

¹⁴Chamiya ti kum niŋ yi ni pii buɣ’ shɛŋa jɛmdi maa, ka bɛ fan ya bahi yi muɣisigu ŋɔ saha.”

¹⁵Ka Izraɛlnim’ daa yɛli Naawuni, “Ti tum alahichi, amaa ti suhir’ a zuŋɔ dabisili ŋɔ, fam’ ti bahi; ka niŋ ti a ni bɔri ni a niŋ ti shɛm.”

¹⁶Di saha ka bɛ daa yihi tinzun buɣa maa bɛ kɔbili ni, ka ŋmaligi jɛmdi Yawɛ, ka Izraɛlnim’ nandahima yɛlli maa daa muɣis’ o pam.

¹⁷Di saha ka Ammɔnnim’ tɔbbihi daa lo tɔbu kana ti do Giliad. Ka Izraɛlnim’ gba daa laɣim ti do Mizipa.

¹⁸Ka Giliad sapashinnim’ daa bɔhi taba, “Ka ŋuni n-lee nyɛ ŋun ni chaŋ ti piligi Ammɔnnim’ ŋɔ tuhibu? Dilan’ ni leei Giliadnim’ zaa zuɣulana.”