Read Dagbani Zuɣulaannima 14 Bible Online

Zuɣulaannima 14 - Dagbani bible

Zuɣulaannima 14

¹Dahin shɛli ka Samsin daa ti chaŋ Timna ti nya Filistia do’ so bipuɣiŋga;

²ka o daa kuli ti yɛl’ o ba min’ o ma, “N nyala Filistia do’ so bipuɣiŋga Timna, dinzuɣu bomiy’ o ti ma ka n niŋ m paɣa.”

³Amaa ka o ba min’ o ma bɔh’ o, “Paɣa n-ka a dɔɣiriba bipuɣinsi ni bee ti zuliya ŋɔ zaa ni ka a ni bɔ, ka ti chaŋ ti bɔrila Filistianim’ bɛn bi gundi ŋɔ bipuɣiŋga ni a niŋ a paɣa?” Amaa ka Samsin yɛl’ o ba, “Bom’ o ti ma, dama n suhu yu’ o pam.”

⁴Samsin ba min’ o ma daa bi mi ni Yawɛ n-wuhi Samsin lala, dama Yawɛ daa bɔrila so’ shɛli o ni yɛn doli tuhi Filistianima. Di saha maa, Filistianima n-daa su Izraɛlnima.

⁵Ka Samsin min’ o ba ni o ma daa yiɣisi chani Timna, ka Samsin daa ti kpe bɛ wain tihi puu ni; ka gbuɣim’ polli nya o ŋumda.

⁶Ka Yawɛ Shia daa siɣi Samsin zuɣu na pam, ka o zaŋ o nuzaŋa gbaai gbuɣinli maa n-darigi pirig’ o kaman nir’ ni darigiri pirigiri bubil’ shɛm la. Amaa o daa bi saɣi yɛl’ o ba bee o ma o ni niŋ shɛm maa.

⁷Ka Samsin daa chaŋ ka o mini paɣisarili maa ti nya taba, ka Samsin suhu daa yu’ o pam.

⁸Ka di daa niŋ daba ayi ha ka Samsin ti labiri ni o ti niŋ paɣisarili maa amiliya, ka o daa ti ŋmaligi birigi ni o lihi nya o ni daa ku gbuɣin’ so sɔŋ la, ka nya ka shihi n-kpe m-pal’ o zaɣ’ woliŋ ni niŋ kpam.

⁹Ka o daa tim ŋmaai shikpam maa niŋ o nuu ni diri chana; ka daa zaŋ di shɛli nti ti o ba min’ o ma, ka bɛ di. Amaa ka Samsin daa bi yɛli ba ni gbuɣin’ kpiɔŋ ni ka o yihi shiri maa na.

¹⁰Ka Samsin ba daa chaŋ paɣisarili maa yiŋa, ka Samsin ti chɛ ka bɛ puhi chuɣu nimaani; dama lala ka nachimba daa yi niŋda.

¹¹Ka niriba daa nya o, ka bo nachimba pihita n-chɛ ka bɛ kana ti be o sani.

¹²Ka Samsin daa ti yɛli ba, “M bɔri ni n ŋahi ya la ŋahili, ka yi yi ni tooi wuhi ma di gbinni zaŋ chaŋ amiliya chuɣu daba ayopɔin ŋɔ dali, n ni tin ya silinchi kpar’ suma pihita mini binyɛr’ sun’ shɛŋa din nyɛ chuɣu dali binyɛra.

¹³Amaa yi yi ku tooi wuhi ma di gbinni, dindina yi mi ni ti ma silinchi kpar’ suma pihita mini binyɛr’ sun’ shɛŋa din nyɛ chuɣu dali binyɛra” Ka bɛ yɛl’ o, “yɛlim’ ti a ŋahili maa ka ti wum.”

¹⁴Ka o yɛli ba, “Ŋun diri ni ka bɛ ni diri shɛli yina; Ŋum mali kpiɔŋ ni ka din nyaɣisi yina.” Ka di daa mali ti paai daba ata, ka bɛ na bi tooi baŋ ŋahili maa gbinni.

¹⁵Di daba anahi dali ka bɛ daa ti yɛli Samsin paɣa, “Doli yɛŋkiŋkabina soli n-chɛ ka a yidana wuhi ti o ŋahili maa, di yi pa lala, ti ni nyo a ba yiŋ’ buɣim ka di di li tabili amaŋmaŋa. Yi bol’ ti mi na ni yi ti ti ti samli?”

¹⁶Ka Samsin paɣ’ maa daa chaŋ Samsin sani ti kumdi niŋd’ o yɛra, “A bi yuri ma. A ŋahi n niriba ŋahili, ka bi wuhi ma ŋahili maa gbinni.” Ka Samsin yɛl’ o, “Nyama, hal m bi wuhi m ba bee m ma di gbinni, ka ti wuhiri nyini?”

¹⁷Ka o paɣ’ maa daa kum niŋ o bɛ daamiliya chuɣu daba ayopɔin maa ni zaa. Ka paɣ’ maa daa muɣisi Samsin hal ka o ti bahi wuh’ o ŋahili maa gbinni di daba ayopɔin maa dali. Ka paɣ’ maa daa zaŋ li chaŋ ti yɛl’ o niriba maa.

¹⁸Ka tiŋ’ maa ni niriba maa daa ka Samsin sanna daba ayopɔin maa dali, saha shɛli wuntaŋ’ ni daa na bi lu nti yɛl’ o, “Bɔ n-lee beni n-nyaɣisi gari shiri? Ka bɔ n-lee beni m-mali kpiɔŋ gari gbuɣinli?” Ka Samsin yɛli ba, “Yi yi di bi mali n naɣ’ kɔro kɔra, yi naan ku tooi baŋ n ŋahili maa gbinni.

¹⁹Ka Yawɛ Shia daa siɣi Samsin zuɣu na pam, ka o yiɣisi chaŋ Ashikɛlɔn ti ku ninvuɣ’ pihita, ka di bɛ nɛma na nti zaŋ bɛ chuɣu dali binyɛra ti ninvuɣ’ shɛb’ bɛn daa baŋ ŋahili maa gbinni maa; ka daa je suli pam ŋ-ŋmaligi kul’ o ba yiŋa.

²⁰Ka bɛ daa zaŋ Samsin paɣ’ maa ti do’ so ŋun daa nyɛ Samsin aŋgo zo.