Read Dagbani Zuɣulaannima 15 Bible Online

Zuɣulaannima 15 - Dagbani bible

Zuɣulaannima 15

¹Ka di daa niŋ daba ayi ha, ka Samsin chaŋ ni o ti puh’ o paɣ’ maa alikama chɛbu saha, ka ʒi bubil’ polli mali ni o ti ti o paɣ’ maa. Ka Samsin daa ti yɛl’ o paɣ’ maa ba, “N ni kpe m paɣ’ sani.” Amaa ka o paɣ’ ba maa bi saɣi;

²ka yɛli Samsin, “Man’ daa tɛhiya ni a lan je o mi, ka zaŋ o ti a daaŋgo zo la. O tizɔbil’ ŋɔ viɛli gar’ o, dinzuɣu jaande, zaŋm’ o tizɔbil’ maa ka chɛ o.”

³Di saha ka Samsin daa yɛli, “Pumpɔŋɔ dina, n yi lan niŋ Filistianim’ zaɣ’ biɛɣu, di pala n taali.”

⁴Di saha ka Samsin daa chaŋ ti gbahi ŋɔri kɔbisita n-zaŋ bɛ zuya gbin’ taba ka zaŋ buɣim mokpala shɛbisishɛbisi di gbina maa ni.

⁵Di nyaaŋa ka o daa niŋ buɣim dab’ li; ka zaŋ ba bahi ka bɛ zo nti kpe Filistianim’ kawana ni. Ka buɣim maa taai bɛ kawaan’ puri maa n-di bɛ ni pun ŋahi luɣ’ shɛŋa mini bɛ ni na bi ŋahi shɛŋa n-tabili bɛ olivi tihi puri.

⁶Ka Filistianim’ maa daa bɔhi, “To, ninvuɣ’ ŋuni n-lee tum tuuni ŋɔ?” Ka ninvuɣ’ shɛb’ yɛli ba, “Samsin ŋun deemba nyɛ Timna nir’ la n-tum lala maa. O ni deeg’ o paɣa n-zaŋ o ti o daaŋgo zo la zuɣu.” Ka Filistianim’ maa daa chaŋ ti niŋ buɣim nyo paɣ’ maa min’ o ba.

⁷Ka Samsin bɔhi ba, “Yi ni niŋ shɛm ŋɔ zuɣu, M poya ni n ku chɛn ya, faashee ka m bɔhi ya biɛri labisi ka naanyi chɛ.”

⁸Ka o daa lu bɛ zuɣu ŋ-ŋmɛri kabiri bɛ sakpuri mini bɛ gbalipina n-daa niŋ lala ku ba pam. Di nyaaŋa ka o daa chaŋ Ɛtam ti kpe m-be tampiŋ lɔŋni.

⁹Di saha ka Filistianim’ daa kana ti dɔni Juda tiŋgbɔŋ ni n-chaŋ ti liri Lɛhinima.

¹⁰Ka Judanim’ daa bɔhi ba, “Bɔzuɣu ka yi kana ti liri ti?” Ka bɛ yɛli, “Ti kamina ni ti ti lo Samsin mihi n-zaŋ o chaŋ ti niŋ o o ni niŋ ti shɛm labisi.”

¹¹Ka Judanim’ maa ninvuɣ’ tusaata daa chaŋ Ɛtam tampiŋ lɔŋ maa ni ti bɔhi Samsin, “A bi mi ni Filistianima n-su ti? Ka tuun’ bɔ ka a lee tum ti ŋɔ?” Ka Samsin garigi yɛli ba, “N niŋ ba la bɛ ni niŋ ma shɛm labisi.”

¹²Ka bɛ yɛli Samsin, “Ti kamina ni ti ti lo a mihi n-zaŋ a ti ti Filistianim’ maa.” Ka Samsin yɛli ba, “Pomiya ni yimaŋmaŋ’ ku ku ma.”

¹³Ka bɛ yɛl’ o, “Aai, ti ku ku a, ti kul yɛn zaŋ a mi ti ti ba.” Ka bɛ daa zaŋ mi’ pala ayi lo o n-zaŋ o tampiŋ lɔŋ maa ni na ti ti ba.

¹⁴Bɛ ni daa zaŋ o ti paai Lɛhi, ka Filistianim’ kul zɔri kani o sanna, ka tahira. Ka Yawɛ Shia daa siɣ’ o zuɣu na pam, ka mi’ shɛŋa din daa lo o maa zaa dii chihichihi; ka di be kaman buɣim ni di gali shɛm la.

¹⁵Di saha maa ka Samsin daa nya buŋ yɛno kɔbili kpuɣ’ li n-zaŋ li ku ninvuɣ’ tuhili.

¹⁶Ka Samsin daa yɛli, “Buŋ’ yɛno kɔbili ka n zaŋ ku ninvuɣ’ tuhili. Buŋ’ yɛno kɔbili ka n zaŋ ku ba n-laɣim ba sɔŋ gbilligbilli.”

¹⁷O yɛtɔɣa ŋɔ nyaaŋa ka o daa zaŋ buŋ’ yɛno kɔbili maa bahi. Ka bɛ daa bol’ o ni zaŋ li bahi luɣ’ shɛli maa yuli Ramatilɛhi.

¹⁸Ka kɔnyuri daa gbaai Samsin pam, ka o suhi Yawɛ yɛli, “Nyini n-chɛ ka mani ŋun nyɛ a dabili ŋɔ di nasara ŋɔ, ka kɔnyuri ti yɛn ku ma, ka n lu ninvuɣ’ shɛb’ bɛn bi gundi ŋɔ nuu ni?”

¹⁹Ka Naawuni daa chɛ ka Lɛhi tiŋgban’ ni vinvamli tahi bɔɣi, ka kom yi di ni na, ka Samsin nyu ka o ni maai, ka o kpiɔŋ lan labina yaha. Dinzuɣu ka bɛ daa boli kɔbili’ nini maa yuli Ɛnhakɔr. Ka di na kul be Lɛhi hal ni zuŋɔ.

²⁰Samsin daa niŋ Izraɛlnim’ zuɣulana la yuun’ pisi shɛŋa puuni Filistianim’ ni daa su bɛ tiŋgbɔŋ maa la.