Read Dagbani Zuɣulaannima 16 Bible Online

Zuɣulaannima 16 - Dagbani bible

Zuɣulaannima 16

¹Dahin shɛli ka Samsin daa ti chaŋ Gaza ti nya pagɔr’ so nimaani ka o kɔre kpe o ni, ka o zaŋ o dɔni.

²Ka bɛ daa yɛli Gazanim’ ni Samsin be nimaani, ka bɛ laɣimna ti teei gil’ o ni be shɛli maa, ka chaŋ ti gu o tiŋ’ maa gooni dunol’ ni yuŋ zaa. Bɛ daa kul fomi chichi dindali maa yuŋ maa, ka yɛra “Ti ni do n-gul’ o hal ka biɛɣu ti neei ka ti ku o.”

³Amaa ka Samsin daa shini ka doya hal ka di ti surigi. Ka o daa yiɣisi yuntisuɣu saha n-chaŋ ti darigi sibigi tiŋ’ maa gooni dunoli mini di dunɔpaɣiri dar’ ayi mini di dunokparita zaa n-zaŋ buɣ’ o bɔɣusapima zuɣu chaŋ ti sɔŋ zo’ shɛli din do Hiburɔn tooni zuɣu.

⁴Dimbɔŋɔ nyaaŋa ka Samsin daa ti bɔri paɣ’ so ŋun be Sɔrɛk Vinvamli ni ka o yuli booni Dilaila.

⁵Di saha ka Filistianim’ nanim’ daa ka Dilaila sanna ti yɛl’ o, “Lom’ ania doli yɛŋkiŋkabina soli n-chɛ ka o wuh’ a din chɛ ka o mali kpiɔŋ pam maa, ka wuh’ a ti ni yɛn niŋ shɛm nyaŋ o, ka di chɛ ka ti tooi gbaag’ o n-lo o mihi nyaŋ o. Ka ti zaa yinoyino ni ti a anzinfa laɣibaligu tuhili ni kɔbigakɔbiga.”

⁶Ka Dilaila daa ti yɛli Samsin, “Niŋm’ ania wuhi ma din chɛ ka a mali kpiɔŋ pam maa, ka wuhi ma nir’ ni yɛn niŋ shɛm lo a mihi nyaŋ a.”

⁷Ka Samsin yɛl’ o, “Bɛ yi zaŋ tɔbimi’ pala zaɣ’ maha diba ayopɔin lo ma, di ni chɛ ka n gbarigi, ka be kaman sokam ni be shɛm.”

⁸Ka Filistianim’ nanim’ maa daa bo tɔbimi’ pala zaɣ’ maha diba ayopɔin ti Dilaila na, ka o zaŋ li lo Samsin.

⁹Di saha maa o daa chɛ ka ninvuɣ’ shɛb’ sɔɣ’ bela yil’ maa ni du’ shɛli ni. Ka o daa kuhi yɛl’ o, “Samsin, Filistianim’ kana ni bɛ ti lir’ a.” Ka Samsin daa darigi chihi tɔbimi’ maha maa kaman gali ni yi shihi buɣim di n-chihi shɛm la. Dinzuɣu bɛ daa na bi jɛndi baŋ o kpiɔŋ maa daashili.

¹⁰Ka Dilaila yɛl’ o, “A boli ma la jɛrigu, ka ŋma ma ʒiri. Niŋm’ ania, yɛlim’ ma nir’ ni yɛn niŋ shɛm lo a mihi.”

¹¹Ka Samsin yɛl’ o, “Bɛ yi zaŋ mi’ pal’ shɛŋa bɛ ni na bi zaŋ lo binshɛli lo ma, n ni gbarigi, ka be kaman sokam ni be shɛm.”

¹²Ka Dilaila daa bo mi’ pala lo o, ka kuhi yɛl’ o, “Samsin Filistianim’ kana ni bɛ ti lir’ a.” Ka ninvuɣ’ shɛb’ bɛn daa sɔɣi do n-gu’ o maa be yil’ maa ni du’ shɛl’ ni. Ka Samsin daa darigi chihi mihi maa kaman gal’ la.

¹³Ka Dilaila daa lan yɛli Samsin, “A na kul boli ma la jɛrigu, ka ŋmari ma ʒiri hal ni pɔŋɔ. Wuhim’ ma nir’ ni yɛn niŋ shɛm lo a mihi.” Ka o yɛl’ o, “Nir’ yi zaŋ n zab’ kpil’ ayopɔin ŋɔ niŋ kpalu’ dari ni n-wuɣi li, ka bo kpaa shɛbisi di ni vooi li ka di kpaŋ, dindina n ni gbarigi, ka be kaman sokam ni be shɛm.”

¹⁴Ka o daa ti gbihiri ka Dilaila gbaag’ o zab’ kpil’ ayopɔin maa niŋ kpalu’ dari ni n-wuɣi li, ka bo kpaa shɛbisi di ni vooi li ka di kpaŋ, ka kuhi yɛl’ o, “Samsin, Filistianim’ kana ni bɛ ti lir’ a.” Ka Samsin daa neei gom ni n-darigi vuɣi kpalu’ dari maa mini kpaa maa ni di wuɣibu maa zaa.

¹⁵Di saha ka Dilaila daa bɔhi Samsin, “Wula ka a yɛri ni a yuri ma ka a suhu ka n ni? Siɣimsiɣim buta zaa ka a boli ma jɛrigu, ka bi saɣi yɛli ma a kpiɔŋ din galisi pam maa ni be a luɣ’ shɛli.”

¹⁶Ka Dilaila daa kul zaŋ di yɛla kaɣili Samsin biɛɣukam, ka kul mal’ li dol’ o hal ka o nyee ti nyɔni pam di zuɣu.

¹⁷Ka o daa kahig’ o daashili zaa wuh’ o ka yɛl’ o, “N nyɛla Nazari nir’ Naawuni sani hal n ni daa na be m ma pul’ ni saha shɛli, ka piliŋ na ʒi n-shihi n zuɣu ni. Ka n yi pini, n kpiɔŋ maa ni yi n ni ka n gbarigi, ka be kaman sokam ni be shɛm.”

¹⁸Dilaila ni daa baŋ ni Samsin yipa yɛl’ o yɛlimaŋli zaa maa, ka o tim ti yɛli Filistianim’ nanim’ la, “O yipa yɛl’ ma yɛlimaŋli zaa, dinzuɣu kamiyana pumpɔŋɔ.” Ka Filistianim’ nanim’ maa daa bɔ liɣiri ka o sanna.

¹⁹Ka Dilaila daa chɛ ka Samsin zaŋ o zuɣu pa o naba zuɣu gbihi, ka o bol’ do’ so na ti chɛ ka o pini Samsin zuɣu ni zab’ kpila ayopɔin maa. Ka o daa piligi damdi Samsin, ka o kpiɔŋ maa daa shiri yi o ni.

²⁰Ka o kuhi yɛl’ o, “Samsin, Filistianim’ kana ni bɛ ti lir’ a!” Ka o yirigi neei ka yɛli, “N yaai ni yi n-chaŋ kaman n ni yi pun chani shɛm la, ka dam mmaŋa ka shɛli ku gu ma soli.” O daa bi baŋ ni Yawɛ lan ka o sani.

²¹Ka Filistianim’ maa daa gbaag’ o n-kpaɣ’ o nina, ka zaŋ o tahi Gaza ti zaŋ daanya bandi baŋ o, ka chɛ ka o niɛmdi chi sarika ni.

²²Amaa ka Samsin zabiri maa daa ti lan bilina gbaai zoobu o pinibu maa nyaaŋa.

²³Ka Filistianim’ nanim’ daa ti laɣim ni bɛ mali bɛ buɣili Dagɔn; ka diɛm suhupiɛlli diɛma; dama bɛ daa yɛlimi, “Ti buɣili n-zaŋ ti dim’ Samsin niŋ ti nuu ni maa.”

²⁴Filistianim’ maa ni daa ti nya Samsin, bɛ daa dii gbaala bɛ buɣili maa paɣibu, ka yɛra, “Ti buɣili maa n-zaŋ ti dim’ ŋun bahi ti tiŋgbɔŋ ŋɔ yoli, ka ku ti niriba la niŋ ti nuu ni maa.”

²⁵Ka bɛ suhuri daa ti paligi pam ka bɛ yɛli, “Bolimiya Samsin na ka o ti diɛm wuhi ti.” Ka bɛ daa chaŋ sarika ni ti zaŋ Samsin na, ka o daa kana ti diɛm wuhi ba. Bɛ daa chɛ ka o ʒiɛla daantalisi sunsuuni.

²⁶Ka Samsin daa ti yɛli ninvuɣ’ so ŋun gbib’ o nuu vɔr’ o, “Chɛ ka m bɔbili gbaai duu ŋɔ ni tam daantal’ shɛŋa zuɣu n-zaŋ mmaŋ’ dalim li.”

²⁷Dɔbba mini paɣiba n-daa kul pali duu maa ni, ka Filistianim’ nanim’ zaa gba be nimaani. Ka dɔbba mini paɣiba bɛn kalinli daa nyɛ kaman tusaata daa be duu maa dufahirili zuɣusaa lihiri Samsin ni diɛmdi maa.

²⁸Di saha maa ka Samsin daa suhi Yawɛ yɛli, “Yaa n Duuma Naawuni, n suhir’ a, teemi n yɛla, ka lan ti ma kpiɔŋ yim kɔŋko pahi, yaa n Duuma Naawuni, ka m bɔhi Filistianim’ ŋɔ biɛri labisi n nina ayi ŋɔ zuɣu.”

²⁹Ka Samsin daa zaŋ o nudirigu min’ o nuzaa n-gbaai sunsuuni daantalis’ ayi shɛŋa zuɣu duu maa ni tamya maa;

³⁰ka yɛli, “N Duuma, chɛ ka m mini Filistianim’ ŋɔ laɣim kpi;” ka daai daantalisi maa ni o kpiɔŋ zaa; ka duu maa kab’ lu o mini nanim’ maa ni ninvuɣ’ shɛb’ bɛn zaa daa be di ni zuɣu. Dinzuɣu Samsin ni daa ku ninvuɣ’ shɛba o kum dali daa gar’ o ni daa be o nyɛvil’ ni ka ku ninvuɣ’ shɛba.

³¹Di nyaaŋa ka Samsin mabihi min’ o dɔɣiriba zaa daa chaŋ ti kpuɣ’ o ti sɔɣ’ o ba Manɔa siliga shɛli din daa be Zɔra mini Ɛshitaol sunsuuni la ni. O daa niŋ Izraɛlnim’ zuɣulan’ la yuun’ pisi.