Read Dagbani Zuɣulaannima 18 Bible Online

Zuɣulaannima 18 - Dagbani bible

Zuɣulaannima 18

¹Di ʒiɛmani maa ni naa daa ka Izraɛl tiŋgbɔŋ ni. Di saha maa ka Dan zuliya niriba daa lihiri bɔri luɣ’ shɛli ni bɛ ʒini, dama Izraɛlnim’ ni daa pirigi tiŋgbɔŋ maa ti tab’ la, bɛ daa na bi ti ba bɛ tiŋgbani.

²Ka Dan zuliya niriba maa daa pii bɛ ni niriba anu bɛn mali suhukpeeni n-tim ba ka bɛ yi Zɔra mini Ɛshitaol chaŋ ni bɛ ti sɔɣ’ kaai tiŋgbɔŋ maa n-zahim li nya. Bɛ daa yɛli ba mi, “Chamiya ti sɔɣ’ kaai tiŋgbɔŋ maa nya.” Ka bɛ daa ka Ifriim zuliya niriba zoya zuɣu tiŋ’ maa ni na ti kpe Maika yiŋa.

³Bɛ ni daa be Maika yiŋ’ maa, ka bɛ nya nachimbil’ ŋun nyɛ Lɛvi zuliya nir’ maa m-baŋ o o yɛtɔɣa puuni, ka bɔh’ o, “Ŋuni n-lee tah’ a kpe na? Ka bɔ ka a lee niŋdi kpe? Bee tuun’ bɔ ka a lee tumdi kpe?”

⁴Ka o yɛli ba, “Maika ni chɛ ka n niŋdi shɛm m-bɔŋɔ: O bu ma la paa ka n nyɛ o maligumaana.”

⁵Ka bɛ yɛl’ o, “Ti suhir’ a, bɔhim’ Naawuni nya ti ni di nasara ti chandi ŋɔ ni.”

⁶Ka maligumaana maa daa yɛli ba, “Chamiya ni suhudoo. Yawɛ nuu pa yi zuɣu yi chandi maa ni.”

⁷Ka niriba anu maa daa ŋmaligi chaŋ Laishi ti nya ka nimaani niriba bela alaafee biɛhigu. Bɛ daa bemi kaman Sidɔnnima. Bɛ daa nyɛla ninvuɣ’ shɛb’ bɛn be baalim ka ka zilisigu. Bɛ daa mali buni, ka dunia ŋɔ ni binshɛli bi pooi ba. Bɛ mini Sidɔnnim’ shee daa wɔɣa, ka bɛ mini so daa ka jina.

⁸Niriba anu maa ni daa lab’ Zɔra mini Ɛshitaol bɛ mabihi maa sani, bɛ daa bɔhi ba mi, “Ka lahibal’ bɔ ka yi lee ʒina?”

⁹Ka bɛ garigi yɛli ba, “Yiɣisimiya ka ti chaŋ ti liri ba. Ti nya bɛ tiŋgbani maa ka di vuhiri pam. Di ʒin ya kpe yoli. Niŋmiya yomyom chaŋ ti deei bɛ tiŋgbani maa.

¹⁰Yi yi chaŋ, yi ni nya ka niriba maa nyɛla bɛn ka zilisigu. Di nyɛla tiŋgban’ titali, ka nir’ ni bɔri binshɛlikam dunia ŋɔ ni be di ni; yɛlimaŋli, Naawuni mi zaŋ li tin ya.”

¹¹Ka Dan zuliya niriba maa ninvuɣ’ kɔbisiyɔbu daa lo tɔbu yi Zɔra mini Ɛshitaol

¹²n-chaŋ ti dɔni sansani Kiriatijiarim Juda tiŋgbɔŋ ni. Ka di zuɣu daa chɛ ka bɛ boli nimaani yuli, Mahanɛdan[8] hal ni zuŋɔ. Di mi bela Kiriatijiarim wulinluhili polo.

¹³Ka bɛ daa yi nimaani chaŋ Ifriim tiŋgban’ ni zoya zuɣu tiŋ’ maa ni ti kpe Maika yiŋa.

¹⁴Di saha ka niriba anu shɛb’ bɛn daa pun chaŋ ti sɔɣ’ kaai Laishi tiŋgbani maa la daa yɛli bɛ tab’ maa, “Yi mi ni duri ŋɔ ni tan’ shɛli din ŋmani mukuru mini binnan’ bihi ni anzinfa binnani ni dari binnan’ shɛli beni? Dinzuɣu pumpɔŋɔ, baŋmiya yi ni yɛn niŋ shɛm.”

¹⁵Ka bɛ daa ŋmaligi nimaani ka Lɛvi zuliya nachimbil’ ŋun daa be Maika yiŋ’ maa sanna nti bɔh’ o o daalaafee yɛla.

¹⁶Di saha maa Dan zuliya niriba maa ninvuɣ’ kɔbisiyɔbu la daa gbibila bɛ tɔbutuhiri’ bidibbina ʒe dunol’ ni.

¹⁷Ka niriba anu bɛn daa daŋ chaŋ ti sɔɣ’ kaai tiŋgbani maa la daa chaŋ ti kpe n-kpuɣi dari binnani mini tan’ shɛli din ŋmani mukuru ni binnan’ bihi ni anzinfa binnani ni wuna la, ka maligumaana maa daa kpalim ʒe ninvuɣ’ kɔbisiyɔbu bɛn daa gbib’ tɔbutuhiri’ bidibbina ʒe dunol’ ni maa sani.

¹⁸Niriba maa ni daa kpe Maika yiŋ’ ti kpuɣi dari binnani mini tan’ shɛli din ŋmani mukuru ni binnan’ bihi ni anzinfa binnani maa, ka maligumaana maa bɔhi ba, “Tuun’ bɔ ka yi lee tumdi maa?”

¹⁹Ka bɛ yɛl’ o, “Kul shini a noli. Zaŋm’ a nuu pɔb’ a noli, ka dol’ ti ti leei ti ba ni ti maligumaana. A yi nyɛ ninvuɣ’ yino maligumaana ni a yi nyɛ Izraɛl daŋ yini maligumaana, dini n-lee so?”

²⁰Ka di daa niŋ maligumaana maa suhupiɛlli, ka o kpuɣi tan’ shɛli din ŋmani mukuru maa mini binnan’ bihi ni dari binnani maa n-kpe m-be niriba maa sunsuuni ka bɛ chana.

²¹Ka bɛ daa chɛ ka bɛ bihi mini bɛ niɣi ni bɛn ʒiri bɛ nɛma be tooni, ka bɛ ŋmaligi doli.

²²Bɛ ni daa yi Maika yiŋ’ maa chaŋ ha, ka Maika daa kuhi bol’ o ʒiʒiinitaba n-chɛ ka bɛ pah’ o zuɣu ka bɛ kari Dan zuliya niriba maa naba.

²³Ka bɛ daa kuhi boli Dan zuliya niriba maa, ka bɛ ŋmaligina bɔhi Maika, “Bɔ n-chɛ ka a zaŋ salo ŋɔ tatabo pa amaŋ’ zuɣu na?”

²⁴Ka Maika bɔhi ba, “Bɔzuɣu ka yi bɔhi ma ni bɔ n-chɛ ka n zaŋ niriba ŋɔ pa mmaŋ’ zuɣu na? Yi kpuɣila n wuna, ka zaŋ m maligumaana pahi, ka bɔ ka yi lee chɛ n-ti mani?”

²⁵Ka Dan zuliya niriba maa yɛl’ o, “Miri ka a chɛ ka ti niriba ŋɔ wum a damli, ka bɛ puuni suhuyiɣisilinim’ lu a zuɣu n-ku a min’ a yiŋnima.”

²⁶Ka Dan zuliya niriba maa daa ŋmaligi chaŋ. Maika ni daa nya ka bɛ mali kpiɔŋ gar’ o maa, ka o ŋmaligi lab’ kuli.

²⁷Ka Dan zuliya niriba maa daa zaŋ Maika ni daa mali binshɛŋa maa min’ o maligumaana la ti liri Laishinim’ bɛn daa be baalim, ka ka zilisigu la n-zaŋ takɔbiri ku ba, ka nyo bɛ tiŋ’ maa buɣim.

²⁸Ka so daa kani n-ni fa ba bahi, dama bɛ ya maa mini Sidɔn daa wɔɣ’ pam. Ka bɛ mi mini so daa ka jina ni taba. Bɛ tiŋ’ maa daa bela Bɛtirɛhɔb vinvamli ni. Ka Dan zuliya niriba maa daa lab’ mali tiŋ’ maa me n-ʒini.

²⁹Ka bɛ daa zaŋ bɛ yabidoo Dan ŋun daa nyɛ Izraɛl bia la yuli m-boli tiŋ’ maa. Amaa tiŋ’ maa yuli daa tuui boonila Laishi.

³⁰Ka Dan zuliya niriba maa daa zaŋ dari binnani zali ni bɛ jɛmdi li. Ka Jɔnatan ŋun daa nyɛ Gɛrishom bia ni Musa yaaŋa la min’ o bidibisi daa nyɛ bɛ maligumaaniba di saha maa zaŋ hal ti paai dahin’ shɛli bɛ ni daa kana ti gbahi ba chaŋ ti leei daba la.

³¹Ka bɛ daa zaŋ Maika ni daa mali dari binnan’ shɛl’ la n-leei bɛ dini zali nimaani, ka Naawuni jɛmbu duu la mi daa kul ʒe Shilo di saha maa zaa.