Read Dagbani Zuɣulaannima 19 Bible Online

Zuɣulaannima 19 - Dagbani bible

Zuɣulaannima 19

¹Saha shɛli naa ni daa ka Izraɛl tiŋgbɔŋ ni la, ka Lɛvi zuliya do’ so daa zaŋ o mam ŋun yi Bɛtilihɛm Juda tiŋgbɔŋ ni n-kuli Ifriim tiŋgban’ ni zoya zuɣu tinshee din be katiŋa.

²Ka paɣ’ maa daa ti je suli niŋ o, ka zo n-kul’ o ba yiŋ’ Bɛtilihɛm Juda tiŋgbɔŋ ni ti niŋ chira anahi nimaani.

³Ka doo maa daa ti yiɣisi ni o kar’ o naba ti balim o zaŋ o lab’ o yiŋa. Lɛvi zuliya doo maa daa zaŋla o tumtumda pah’ omaŋ’ zuɣu ka bɛ zaŋ buns’ ayi chaŋ. Ka o daa mali ti paari paɣ’ maa ba yiŋa, ka paɣ’ maa ba maa nya o ka chaŋ ti tuh’ o soli ni suhupiɛlli.

⁴Ka o deemba ŋun daa nyɛ paɣ’ maa ba yɛli Lɛvi zuliya doo maa ni o kpalimmi gbe, ka o daa kpalim gbe daba ata. Ka bɛ daa laɣindi diri ka nyura, ka o gbɛri nimaani.

⁵Di daba anahi dali ka bɛ daa daŋ yibu asibaasi m-mali shili ni bɛ kuli, amaa ka paɣ’ maa ba maa yɛl’ o deemba maa, “Ʒinimi suug’ a noli n-nya kpiɔŋ ka naanyi chaŋ.”

⁶Di saha ka bɛ niriba ayi maa daa laɣim ʒini di ka nyu. Ka paɣ’ maa ba maa daa yɛli doo maa, “Niŋm’ ania kpalim gbe m-pahi, ka chɛ ka a suhu piɛla.”

⁷Ka doo maa daa ti lan yiɣisi ni o kuli, ka o deemba maa lan balim o hal ka o ti lan gbe yaha.

⁸Di daba anu dali ka o daa ti daŋ yiɣisibu asibaasi ni o kuli, ka paɣ’ maa ba maa lan yɛl’ o, “Niŋm’ suɣilo suug’ a noli, ka chɛ ka di bii na pɔi ka a naanyi chaŋ.” Ka bɛ niriba ayi maa daa laɣim ʒini di.

⁹Ka doo maa min’ o mam maa ni o tumtumda la daa ti yiɣisi ni bɛ kuli, ka o deemba ŋun nyɛ paɣ’ maa ba maa yɛl’ o, “Nyama wuntaŋ’ dalimya pam, ka di ku lan yuui ka yuŋ zibi, n suhir’ a, kpalimmi gbe, ka chɛ ka a suhu piɛla. Biɛɣuni ka yi sa daŋ yiɣisibu asibaasi kuli.”

¹⁰Amaa ka doo maa daa bi lan bɔri ni o gbe nimaani, ka daa yiɣisi chaŋ luɣ’ shɛli din be Jɛbusi tooni la (Jɛrusalɛm). Ka bun’ shɛb’ bɛ ni daa pa gaya min’ o mam la daa be o sani. Bɛ ni daa ti miri Jɛbusi ka yuŋ yɛn zibi, ka o tumtumda la daa yɛl’ o dan’ maa, “Chɛ ka ti ŋmaligi chaŋ Jɛbusinim’ tiŋ’ ŋɔ ni ti gbe nimaani.”

¹²Ka o dan’ maa yɛl’ o, “Ti ku zani tinzunnim’ bɛn pa Izraɛlnim’ ŋɔ tiŋ’ ŋɔ ni, amaa ti ni gari paala Gibia.” Ka o daa lan yɛl’ o tumtumda maa, “Chɛ ka ti tirisi chaŋ luɣ’ shɛŋa dimbɔŋɔ ha nti gbe Gibia bee Rama.”

¹⁴Ka bɛ daa gari nimaani n-lan gbaai chandi, zaŋ chaŋ wuntaŋ’ ti yɛn lu ka bɛ paai Gibia din daa be Bɛnjamin zuliya niriba tiŋgban’ ni la.

¹⁵Ka bɛ daa ŋmaligi nimaani n-nya luɣ’ shɛli ʒini ni bɛ gbe Gibia, dama so daa bi zaŋ ba ti kpɛh’ o yiŋa ni bɛ gbe.

¹⁶Bɛ ni daa be nimaani maa ka ninkur’ so ti yi o puuni na zaawuni. Doo maa daa yila Ifriim zuliya niriba tiŋgban’ ni zoya ni tiŋ’ ni na ti be Gibia maa. Amaa nimaaninim’ daa nyɛla Bɛnjamin zuliya niriba.

¹⁷Ka o daa ti kpuɣ’ o zuɣu lihi nya sochanda ka o ʒi tiŋ’ maa sokpaŋa; ka ninkurigu maa bɔh’ o, “Ya ka a yina? Bee ya ka a lee chana?”

¹⁸Ka Lɛvi zuliya doo maa yɛl’ o, “Ti yila Bɛtilihɛm din be Juda tiŋgbɔŋ ni n-gariti kuni Ifriim zuliya niriba tiŋgban’ ni zoya ni tiŋ’ din be katiŋa ka nyɛ n ni yi luɣ’ shɛl’ na la. N daa chaŋla Bɛtilihɛm Juda tiŋgbɔŋ ni, ka labiri kuna, ka so mi bi zaŋ ma ti kpɛh’ o yiŋa.

¹⁹Ti mali mɔri mini difu din ni ti ti bunsi ŋɔ, ka mali m min’ a bipuɣiŋga ŋɔ ni nachimbil’ so ŋun be tinim’ a daba ŋɔ sani ŋɔ bindirigu mini wain. Ti mali ti ni bɔri binshɛlikam.”

²⁰Ka ninkurigu maa daa yɛl’ o, “Naawuni chɛ ka yi suhuri doya. N ni tin ya yi ni bɔri shɛlikam, amaa lee di gbɛnya palo ŋɔ ni.”

²¹Ka o daa zaŋ ba kul o yiŋa nti chɛ ka bɛ paɣi bɛ naba, ka di ka nyu. Ka o daa bo difu ti bɛ bunsi la gba.

²²Bɛ ni daa ti diri bindirigu saha shɛli, bɛ nini nyabu yim ka tiŋ’ maa ni ninvuɣ’ galima shɛb’ daa ti kana ti teei gili yili maa kpahiri di dunoli ka yɛri ninkurigu ŋun nyɛ yil’ maa lan’ maa, “Zaŋm’ do’ so ŋun kpe a yili ŋɔ na la ti ti ka ti gol’ o!”

²³Ka yil’ maa lana daa yi bɛ sani ti yɛli ba, “M mabihi, doo maa nyɛla n sana, dinzuɣu di tumiya tuun’ biɛɣu ŋɔ bee n-tum vi tuuni ŋɔ.

²⁴ Nyamiya, m bipuɣiŋga ŋun na ʒi doo mini doo maa mam m-bɔŋɔ; chɛliya ka n zaŋ ba tin ya na pumpɔŋɔ; ka yi niŋ ba yi ni bɔri shɛm, amaa di tumiya doo ŋɔ ŋun’ vi tuun’ shɛli.”

²⁵Amaa ka niriba maa zaɣisi ni bɛ ku wum o ni yɛli shɛm maa. Ka Lɛvi zuliya doo maa daa zaŋ o mam maa yihi ti ti ba; ka bɛ daa zaŋ o goli yuŋ maa zaa hal ti neei biɛɣu. Ka biɛɣu daa ti neerina ka bɛ zaŋ o bahi ka o chaŋ.

²⁶Ka paɣ’ maa daa kana ti lu n-dɔni ninkurigu maa yiŋ’ dunol’ ni Lɛvi zuliya doo maa ni daa kpe shɛl’ la biɛkaali saha n-do nimaani hal ka di ti neei.

²⁷Ka doo maa daa ti yiɣisi asibaasi n-yooi dunoli ni o yina chaŋ, ka nya ka o mam maa dola yil’ maa samban’ dunol’ ni, ka o nuhi teei tiri dunoli polo.

²⁸Ka o yɛli paɣ’ maa, “yiɣisim’ ka ti chaŋ.” Amaa ka o bi garigi. Ka o daa kpuɣi paɣ’ maa pa o buŋ’ zuɣu n-zaŋ o kul’ o ya.

²⁹ Ka o daa mal’ ti paai yiŋa m-bo sua pa o mam maa zuɣu ŋ-ŋmah’ o niŋkpil’ pinaayi n-zaŋ o niŋkpil’ yini kam tim ti ti Izraɛl tiŋgbɔŋ maa yaɣili kam nim’ zaa.

³⁰Ka ŋunkam daa nya li yɛli, “yɛlli ŋɔ tatabo na ʒi n-niŋ bee ti nini na ʒi n-nya lala Izraɛlnim’ ni daa yi Ijipti na dahin shɛl’ la hal ni zuŋɔ. Ti tɛhimi di yɛla. Ti gbaamiya saawara baŋ ti ni yɛn yɛli di yɛla shɛm.”