Read Dagbani Zuɣulaannima 20 Bible Online

Zuɣulaannima 20 - Dagbani bible

Zuɣulaannima 20

¹Di saha ka Izraɛlnim’ zaa daa yina naŋgban’ yini. Dan zuliya niriba tiŋgban’ ni zaŋ hal ni Bɛrishiiba zaŋ tabili Giliad. Ka salo maa daa laɣim naŋgban’ yini Yawɛ tooni Mizipa.

²Ka Izraɛl zuliya maa zaa dɔɣirikpamba zaa daa laɣimna ti pahi Naawuni niriba laɣiŋgu maa ni, ka bɛ dɔbba bɛn daa nyɛ tinchandiba ka gbibi takɔbiri kalinli daa yiɣisi ninvuɣ’ tuhi’ kɔbisinahi.

³Ka Bɛnjamin zuliya niriba maa daa wum ni Izraɛlnim’ laɣim chaŋ Mizipa. Di saha ka Izraɛlnim’ maa daa yɛli Lɛvi zuliya doo maa, “Yɛlim’ ti bɛ ni daa tum tuumbiɛɣu maa shɛm”

⁴Ka Lɛvi zuliya doo ŋun nyɛ bɛ ni daa ku so mam maa yɛli ba, “M mini m mam n-daa chaŋ Gibia din nyɛ Bɛnjamin zuliya niriba tiŋ’ la ni ni ti ti gbe.

⁵Ka Gibianim’ daa ti kana ti liri ma yuŋ n-teei gili n yilikpɛrili. Bɛ daa lo ma la kubu; ka daa gbaai m mam maa chaŋ ti goli ku o.

⁶Ka n daa ŋmahiŋmahi m mam maa jilajila n-zaŋ tari Izraɛlnim’ ni su luɣ’ shɛlikam zaa, dama bɛna n-tum din chihiri ŋɔ mini biŋkɔb’ tuuni ŋɔ Izraɛl tiŋgbɔŋ ŋɔ ni maa.

⁷Nyama, yinim’ Izraɛlnim’ zaa bɛn be kpe ŋɔ, zahimmiya yɛlli maa nya ka wuhi ti ni yɛn gbaai li shɛm.”

⁸Ka niriba maa zaa daa yiɣisi zani naŋgban’ yini yɛli, “Ti ni so ku lab’ kul’ o tanti ni bee o yiŋa.

⁹Ti ni yɛn niŋ Gibianim’ shɛm m-bɔŋɔ: Ti ni pihi kuɣa sɔŋ lihi nya, ka chaŋ ti liri ba.

¹⁰Ka Izraɛl daŋ niriba zaa puuni, ti ni yihi ninvuɣ’ pii ninvuɣ’ kɔbiga kam puuni, ka yihi ninvuɣ’ kɔbiga ninvuɣ’ tuhili kam puuni, ka yihi ninvuɣ’ tuhili ninvuɣ’ tuhi’ pia kam puuni n-chɛ ka bɛ ʒiri bindira ti tiri tɔbbihi; ka bɛ chaŋ ti liri Gibianim’ bɛn nyɛ Bɛnjamin zuliya niriba la bɛ ni tum tuumbiɛ’ shɛŋa zaa Izraɛl tiŋgbɔŋ ŋɔ ni maa zuɣu”

¹¹Dinzuɣu ka Izraɛlnim’ zaa daa laɣim naŋgban’ yini ni bɛ chaŋ ti liri Gibianima.

¹²Ka Izraɛlnim’ daa tim tuumba Bɛnjamin zuliya niriba maa zaa sani nti bɔhi ba, “Tuumbiɛ’ bɔ ka yi lee tum la?

¹³Dinzuɣu pumpɔŋɔ yihimiya Gibia ninvuɣ’ galima bɛn tum lala maa na ka ti ku ba, ka lala tuuni maa vuui ka chɛ Izraɛlnima.” Amaa ka Bɛnjamin zuliya niriba maa daa zaɣisi ni bɛ ku wum bɛ mabihi Izraɛlnim’ maa ni yɛli shɛm maa.

¹⁴Di saha ka Bɛnjamin zuliya niriba maa daa yi bɛ tinsi ni n-laɣim Gibia na ni bɛ ti lo tɔbu chaŋ ti tuhi Izraɛlnima.

¹⁵Ka Bɛnjamin zuliya niriba maa daa laɣim tɔbbihi tuhi’ pisinaayɔbu bɛ tinsi maa ni na nti pahi Gibianim’ zuɣu.

¹⁶Niriba maa zaa ni, ninvuɣ’ kɔbisiyopɔin bɛn daa nyɛ tɔbutuhiri’ biinsi ka nyɛ gɔbisinima daa be bɛ ni. Bɛ ni ninvuɣ’ yino kam daa nyɛla ŋun ni tooi zaŋ kuɣili niŋ kuɣilɔŋ ni n-lab’ ninsal’ zabigu gba ka ku nyahigi li.

¹⁷Ka Izraɛlnim’ bɛn daa pa Bɛnjamin zuliya niriba la daa laɣim tɔbbihi tuhi’ kɔbisinahi bɛn nyɛ tɔbutuhiri’ biinsi.

¹⁸Ka Izraɛlnim’ daa chaŋ Bɛtɛl ti bɔhi Naawuni, “Ti ni daŋ dini niriba n-simdi ni bɛ daŋ chaŋ ti tuhi Bɛnjamin zuliya niriba maa?” Ka Yawɛ garigi yɛli ba, “Juda zuliya niriba n-ni daŋ chaŋ ti tuhi ba.”

¹⁹Ka Izraɛlnim’ daa yiɣisi asibaasi n-chaŋ ti dɔni sansani miri Gibia.

²⁰Ka Izraɛlnim’ daa zaŋ bɛ tɔbbihi chaŋ ti zani Gibia ni bɛ liri Bɛnjamin zuliya niriba maa.

²¹Ka Bɛnjamin zuliya niriba maa daa yi Gibia na ti tuhi ku Izraɛlnim’ tɔbbihi tuhi’ pisinaayi dindali maa.

²²Ka Izraɛlnim’ daa chaŋ ti kum niŋ Yawɛ hal ni zaawuni; ka bɔh’ o, “Ti cham’ ti tuhi ti mabihi Bɛnjamin zuliya niriba maa bee ti di chaŋ?” Ka Yawɛ garigi yɛli ba, Chamiya ti tuhi ba. Ka Izraɛlnim’ daa niŋ suhukpeeni n-lan zaŋ bɛ tɔbbihi ti zali bɛ ni daa pun zali ba luɣ’ shɛl’ la.

²³

²⁴Ka Izraɛlnim’ daa chaŋ ti liri Bɛnjamin zuliya niriba maa dabisili din pah’ ayi dali.

²⁵Ka Bɛnjamin zuliya niriba maa daa yina dabisili din pah’ ayi maa dali ti lu Izraɛlnim’ maa zuɣu n-ku bɛ ninvuɣ’ tuhi’ pisaayika; ka bɛ zaa nyɛla takɔbichɛriba.

²⁶Di saha ka Izraɛl tɔbbihi zaa daa chaŋ Bɛtɛl ti teei ʒini Yawɛ tooni n-kum niŋ o, ka lo noli hal ni zaawuni; ka mali sara shɛli bɛ ni zaŋdi nyɔri buɣim la mini suhudoo sara Yawɛ sani.

²⁷Di saha maa, Naawuni Daalikauli Adaka la daa bela nimaani, ka Ɛliɛza bia Finɛhas ŋun daa nyɛ Aduna yaaŋa la daa su di tuma fukumsi, ka niriba maa daa bɔhi Yawɛ, “Ti cham’ ti lan tuhi ti mabihi bɛn nyɛ Bɛnjamin zuliya niriba la bee ti di chaŋ?” Ka Yawɛ garigi yɛli ba, “Chamiya; dama biɛɣuni n sa ni chɛ ka yi nyaŋ ba.”

²⁸

²⁹Ka Izraɛlnim’ daa chɛ ka bɛ tɔbbihi chaŋ ti sɔɣ’ dɔni gili Gibia.

³⁰Ka Izraɛlnim’ daa chaŋ ti liri Bɛnjamin zuliya niriba maa n-chɛ ka bɛ tɔbbihi zani Gibia kaman bɛ ni daa pun niŋdi shɛm la.

³¹Ka Bɛnjamin zuliya niriba maa daa yina ti lu Izraɛlnim’ maa zuɣu, ka bɛ ŋmaligi n-zaŋdi ba yiri kpaŋa, ka bɛ yaa doli Izraɛlnim’ maa n-kuri bɛ ni shɛb’ sɔŋdi palɔni Bɛtɛl mini Gibia solɔri zuɣu. Ka Izraɛl tɔbbihi pihita daa kpi di ni.

³²Ka Bɛnjamin zuliya niriba maa daa yɛli, “Ti yaa nyaŋ ba kaman ti ni pun nyandi ba shɛm la.” Amaa ka Izraɛlnim’ maa daa lo nia yɛli, “Chɛliya ka ti ŋmaligi zɔri ka bɛ dol’ ti, ka ti zaŋ ba yi kpaŋa solɔri zuɣu ha.”

³³Ka Izraɛlnim’ maa zaa daa ti bari zani bɛ zaashɛhi Balitama n-zaŋ bɛ nyɔri yo ba; ka Izraɛlnim’ shɛb’ bɛn daa sɔɣ’ doya la yi bɛ sɔɣibu shee din be Gɛba wulinluhili polo na.

³⁴Ka Izraɛlnim’ ni tɔbutuhiri’ biinsi tuhi’ pia daa lu Gibianim’ zuɣu, ka tɔb’ maa daa kpɛm’ pam. Amaa Bɛnjamin zuliya niriba maa daa bi baŋ ni yɛl’ biɛɣu n-yɛn paai ba maa.

³⁵Ka Yawɛ daa nyaŋ Bɛnjamin zuliya niriba maa ti Izraɛlnima. Ka Izraɛlnim’ daa ku Bɛnjamin zuliya niriba maa ninvuɣ’ tuhi’ pisinaanu ni kɔbiga dindali maa; ka bɛ zaa daa nyɛla takɔbichɛriba.

³⁶Di saha ka Bɛnjamin zuliya niriba maa daa baŋ ni bɛ kɔŋ nasara. Izraɛlnim’ maa ni daa niŋ bɛ tɔbbi’ shɛb’ bɛn sɔɣ’ do n-gu Gibia la naani zuɣu ka bɛ daa ŋmaligi Bɛnjamin zuliya niriba maa sani zo.

³⁷Ka ninvuɣ’ shɛb’ bɛn daa sɔɣ’ doya maa yiɣisi yomyom kab’ ti kpe Gibia puuni n-zaŋ takɔbi ku ninvuɣ’ shɛb’ bɛn zaa be tiŋ’ maa ni.

³⁸Izraɛl tɔbbihi maa mini bɛ tab’ bɛn daa sɔɣ’ doya la ni daa wuhi tab’ shihirili shɛli nyɛla ni bɛ yi ti nya ka nyɔhi yiɣisi mɔni tiŋ’ maa puuni,

³⁹bɛn’ Izraɛlnim’ maa bɛn ŋmaligim’ zani ka bɛ mini ba tuhi. Bɛnjamin zuliya niriba maa daa pun daŋ kula Izraɛlnim’ ninvuɣ’ pihita ka yɛra, “Ti yaa nyaŋ ba kaman ti ni daa pun nyaŋ ba shɛm piligu ni la.”

⁴⁰Nyɔhi maa ni daa ti yiɣisi mɔni tiŋ’ maa puuni saha shɛli, ka Bɛnjamin zuliya niriba maa daa ŋmaligi lihi bɛ nyaaŋa nya ka tiŋ’ maa zaa taala buɣim diri ka di nyɔhi yiɣisi mɔni.

⁴¹Di saha ka Izraɛlnim’ daa ŋmaligina, ka di gari Bɛnjamin zuliya niriba maa, dama bɛ daa baŋya ni yɛl’ biɛɣu paai ba mi maa.

⁴²Dinzuɣu ka bɛ daa ŋmaligi Izraɛlnim’ maa tooni guui kpa mɔɣu polo, amaa bɛ daa bi tooi zo n-tiligi. Bɛn daa yi tiŋ’ maa puuni na la daa taɣi ba niŋ sunsuuni n-ku bɛ zaa.

⁴³Ka Izraɛlnim’ daa gili Bɛnjamin zuliya niriba maa niŋ sunsuuni n-kari doli ba kuri ba n-zaŋ Nɔha hal ti paai Gibia wulimpuhili polo.

⁴⁴Ka bɛ daa ku Bɛnjamin zuliya niriba maa ninvuɣ’ tuhi’ pisaayika, ka bɛ zaa daa nyɛla tɔbutuhiri’ biinsi.

⁴⁵Ka bɛ ni bɛn kpalim daa guui tiligi zaŋ kpa mɔɣu polo n-zo hal ni Rimɔn kuɣili la gbini. Ka bɛ daa ŋme n-ku bɛ ninvuɣ’ tusaanu sol’ ni. Ka Izraɛlnim’ maa daa na kul kariti doli ba hal ni Gidom ti lan ku bɛ ninvuɣ’ tusaayi.

⁴⁶Dinzuɣu Bɛnjamin zuliya niriba bɛn daa kpi dindali maa kalinli daa yiɣisila tuhi’ pisinaanu. Ka bɛ zaa daa nyɛla takɔbichɛriba ni tɔbutuhiri’ biinsi.

⁴⁷Amaa ka bɛ ni ninvuɣ’ kɔbisiyɔbu daa guui kpa mɔɣu polo n-zo hal ni Rimɔn tampiŋ la gbini nti kpalim be nimaani chira anahi.

⁴⁸Ka Izraɛlnim’ daa ŋmaligi lu Bɛnjamin zuliya niriba bɛn kpalim zuɣu n-zaŋ takɔbi ku ninsalinim’ mini biŋkɔbiri ni bɛ ni daa nya binneen’ shɛb’ zaa; ka daa niŋ buɣim nyo fɔntin’ shɛŋa din daa kpalim zaa.