Read Dagbani Zuɣulaannima 3 Bible Online

Zuɣulaannima 3 - Dagbani bible

Zuɣulaannima 3

¹Zuliya shɛb’ Yawɛ ni daa chɛ ni o zaŋ ba buɣisi Izraɛlnim’ shɛb’ bɛn zaa nini daa bi nya tɔb’ shɛŋa din tuhi Keenan tiŋgbɔŋ maa ni la m-bɔŋɔ.

²O daa niŋ lala ni o wuhila Izraɛl ʒiɛmani kam niriba tɔbu tuhibu yɛla, di bahi bamdi bɛ ni shɛb’ bɛn nini daa na ʒi n-nya tɔbu tuhibu la.

³Zuliya shɛb’ bɛn daa kpalim maa n-nyɛ: Filistia nanima anu mini Keenannim’ zaa ni Sidɔnnim’ ni Hivinim’ bɛn be Lɛbanɔn Zoli zuɣu n-zaŋ Baalihɛrimɔn Zoli zuɣu hal ti paai Lɛbohamat dunoli shee la.

⁴Bɛ daa nyɛla Yawɛ ni zaŋ shɛb’ ni o buɣisi Izraɛlnim’ nya bɛ ni dol’ o zaligu shɛŋa o ni daa zaŋ ti Musa ka o ti bɛ yaannim’ la bee bɛ ku dol’ li.

⁵Dinzuɣu ka Izraɛlnim’ maa daa kul be Keenannim’ mini Hitinim’ ni Amɔrinim’ ni Pɛrizinim’ ni Hivinim’ ni Jɛbusinim’ maa ni.

⁶Bɛ daa kpuɣi bɛ bipuɣinsi niŋ bɛ paɣiba, ka zaŋ bɛmaŋmaŋ’ bipuɣinsi ti bɛ bidibisi; ka jɛmdi bɛ wuna.

⁷Izraɛlnim’ daa tum alahichi Yawɛ sani. Bɛ daa tam Yawɛ ŋun nyɛ bɛ Naawuni maa yɛla, ka ŋmaligi jɛmdila Baalnim’ mini Ashɛranima.

⁸Dinzuɣu ka Yawɛ suhu daa yiɣisi bahi Izraɛlnim’ zuɣu ka o zaŋ ba niŋ Mɛsopoteemia naa Kushanrishataim nuu ni ka Izraɛlnim’ daa jɛm o yuma anii.

⁹Amaa ka Izraɛlnim’ daa ti kum niŋ Yawɛ, ka Yawɛ ti ba ninvuɣ’ so ŋun ni fa ba bahi, ka o daa fa ba bahi. Dilana n-nyɛ Otiniɛl ŋun daa nyɛ Kalɛb tizo Kɛnaz bia la.

¹⁰Ka Yawɛ Shia daa ka o sanna, ka o leei Izraɛlnim’ zuɣulana. Ka Otiniɛl daa ti lo tɔbu chaŋ ti tuhi Mɛsopoteemia naa Kushanrishataim, ka Yawɛ daa chɛ ka Otiniɛl nyaŋ o. Ka Izraɛlnim’ daa nya vuhim bɛ tiŋgbɔŋ maa ni yuun’ pihinahi.

¹¹Di nyaaŋa ka Otiniɛl Kɛnaz bia maa daa kpi.

¹²Ka Izraɛlnim’ daa lan tum alahichi zaŋ chaŋ Yawɛ sani yaha. Ka Yawɛ daa ti Mɔab Naa Ɛgilɔn kpiɔŋ ka o lu Izraɛlnim’ zuɣu, bɛ ni daa tum alahichi shɛli zaŋ chaŋ ŋun’ Yawɛ sani maa zuɣu.

¹³Ka Naa Ɛgilɔn daa laɣim Ammɔnnim’ mini Amalɛknima m-pah’ o min’ o niriba zuɣu chaŋ ti tuhi nyaŋ Izraɛlnima, ka fa dɔbino tihi tiŋ’ la[4] bɛ sani.

¹⁴Ka Izraɛlnim’ daa jɛm Mɔab Naa Ɛgilɔn maa yuun’ pisaayika.

¹⁵Amaa ka Izraɛlnim’ daa ti kum niŋ Yawɛ, ka Yawɛ ti ba ninvuɣ’ so ŋun ni fa ba bahi. Dilana n-nyɛ Gɛra bia Ɛhud ŋun daa yi Bɛnjamin zuliya ni na, ka nyɛ gɔbigalan’ la. Ŋuna ka Izraɛlnim’ daa timdi ka o zaŋdi bɛ farigu ti yɔri Mɔab Naa Ɛgilɔn.

¹⁶Ka Ɛhud daa kuri su’ shɛli din mali naŋgbana ayi, ka di wɔɣilim nyɛ kaman sɛntimita pihinu ka o zaŋ li lo n-tabil’ o nudirigu gbalipini n-ye o binyɛrigu limsi li.

¹⁷Ka o daa ti zaŋ bɛ farigu tahi ti yo Mɔab Naa Ɛgilɔn. Naa Ɛgilɔn daa nyɛla ninvuɣ’ karili.

¹⁸Ɛhud ni daa zaŋ bɛ farigu binyara maa yo n-naai, o daa chɛmi ka ninvuɣ’ shɛb’ bɛn ʒi li tahi na kuli.

¹⁹Amaa ka ŋun’ Ɛhud maŋmaŋ’ daa zani kuɣikpɛra shee din miri Giligal la ŋ-ŋmaligi labi ti yɛli, “Naa, m malila ashili yɛtɔɣ’ shɛli ni n yɛl’ a.” Ka naa maa daa yɛl’ o naazɔnim’ ni bɛ yima. Ka bɛ zaa daa yiɣis’ o sani yi.

²⁰Ka naa maa daa ʒi o dufahirili zuɣusaa zɔntu’ mahili ni, ka Ɛhud ka o sanna ti yɛl’ o, “M malila yɛtɔɣ’ shɛli din yi Naawuni sanna ni n-yɛl’ a.” Ka naa maa vaai yiɣis’ o ʒiishee zani.

²¹Ka Ɛhud daa zaŋ o gɔbiga tim o nudirigu gbalipini maa polo darigi ŋoog’ o sua maa n-zaŋ kuhi naa maa puli;

²²ka sua maa mini di sukpali zaa kpe nti lim. Ka o puli maa kpam mum li niŋ, dama o daa bi darigi ŋooi sua maa o puli maa ni, ka o puuni daɣiri daa zɔri yirina.

²³Di nyaaŋa ka Ɛhud daa yi zɔntua maa ni na ka vooi di dunoya yo n-kpari li pa o zuɣu.

²⁴Ɛhud ni daa yina kuli naai, ka naazɔnim’ daa kpe nti nya ka dufahirili zuɣusaa zɔntua maa dunoya yomi kpari, ka bɛ tɛhi ni naa maa kpɛla zɔntua maa ni du’ bil’ ni ni o ti wɔɣis’ omaŋa.

²⁵Ka bɛ daa guhi ka di yuui ha, amaa ka o kul bi yoori zɔntua maa dunoya maa; ka bɛ daa zaŋ saafɛbia yooi li nya ka bɛ naa maa kpimi do tiŋa.

²⁶Bɛ ni daa kpalim guhiri saha shɛli maa, ka Ɛhud daa chaŋ hal ti gari kuɣikpɛra shee la n-zo n-kuli Siɛra tiligi.

²⁷O ni daa paai yiŋa Ifriim zoya ni tinsi maa ni, o daa piɛb’ la kikaa; ka Izraɛlnim’ daa yi zoya tinsi maa ni laɣim’ o sanna, ka o leei bɛ zuɣulana.

²⁸Ka Ɛhud daa yɛli ba, “Doli ya ma, dama Yawɛ zaŋ yi dimnim’ Mɔabnim’ niŋ yi nuu ni.” Ka bɛ daa dol’ o chaŋ ti gu so’ shɛli Mɔabnim’ ni yɛn doli gbaai Jɔɔdɛn Mɔɣili du, ka daa bi saɣi ka so doli nimaani du.

²⁹Ka bɛ daa ku Mɔabnim’ maa ninvuɣ’ tuhi’ pia, ka bɛ zaa nyɛla bɛn mali kpiɔŋ ni tɔbutuhiri’ biinsi, ka bɛ ni so daa bi tiligi.

³⁰Ka Izraɛlnim’ daa nyaŋ Mɔabnim’ dindali maa, ka nya vuhim bɛ tiŋgbɔŋ maa ni yuun’ pihinii.

³¹Ŋun daa pa Ɛhud zuɣu n-daa nyɛ Anat bia Shamga ŋun daa zaŋ naɣikpar’ kpaa ku Filistianim’ ninvuɣ’ kɔbisiyɔbu la. Ŋun’ gba daa fa Izraɛlnim’ bahi.