Read Dagbani Zuɣulaannima 6 Bible Online

Zuɣulaannima 6 - Dagbani bible

Zuɣulaannima 6

¹Ka Izraɛlnim’ daa ti tum alahichi Yawɛ sani, ka Yawɛ daa zaŋ ba niŋ Midiannim’ nuu ni yuma ayopɔin.

²Ka Midiannim’ daa nyaŋ Izraɛlnima; ka Izraɛlnim’ maa zo nti sɔɣi bɔɣa din daa be zoya zuɣu puuni mini tampima voya ni ni luɣ’ shɛŋa bɛ n-ni tooi sɔɣi zani tuhi tɔbu.

³Ka Izraɛlnim’ daa yi ti kul biri bimbirili kam, Midiannim’ maa mini Amalɛknim’ ni wulimpuhili polo nim’ kanimina ti lu bɛ zuɣu.

⁴Bɛ daa yi kamina nti kpa tanti suɣa do Izraɛlnim’ tiŋgbɔŋ maa ni n-saɣindi bɛ bindira zaŋ hal ti paai Gaza, hal ka binshɛli zaŋ tabili piɛri mini niɣi ni bunsi gba bi kpalim.

⁵Dama bɛ daa yi zaŋdila bɛ tantinim’ mini bɛ niɣi ni bɛ laakumnim’ kanna ti luri bɛ zuɣu, ka bɛ galisim ŋmanila toli. Ka bɛ mini laakumnim’ maa daa ka kalinli. Dinzuɣu bɛ daa yi ti kana bɛ saɣindila bɛ tiŋgbɔŋ maa ni binshɛɣukam.

⁶Ka Izraɛlnim’ daa nya filiŋ pam Midiannim’ maa zuɣu, ka daa naɣ’ ti kummi niŋ Yawɛ ni o sɔŋ ba.

⁷Izraɛlnim’ ni daa kum niŋ Yawɛ Midiannim’ zuɣu maa,

⁸ka Yawɛ daa tim anab’ so Izraɛlnim’ sanna ka o ti yɛli ba, Yawɛ ŋun nyɛ Izraɛl Naawuni ŋɔ ni yɛli shɛm m-bɔŋɔ: “Mani n-daa yihi ya Ijipti na, ka yihi ya dabitim ni.

⁹N daa tiligi ya Ijiptinim’ mini bɛnkam zaa daa nahindi ya nuu ni, ka kari ba ka zaŋ bɛ tiŋgbɔŋ ŋɔ tin ya.

¹⁰N daa yɛli ya, ‘Man’ Yawɛ n-nyɛ yi Naawuni, dinzuɣu miriya ka yi jɛm Amɔrinim’ shɛb’ tiŋgbɔŋ ni yi ni be ŋɔ wuna la.’ Amaa ka yi zaɣisi n noli.”

¹¹Ka Yawɛ malaika daa ti kana ti ʒi oki tia din daa be Ofira ka nyɛ Jɔash ŋun daa nyɛ Abiɛza zuliya ni nir’ ni su shɛl’ la gbini. Ka o bia Gidiɔn daa sɔɣi be nimaani wain tɔɣiri bɔɣili ni buri alikama ka bi bɔri ni Midiannim’ nya o.

¹²Ka Yawɛ malaika maa daa ka o sanna ti yɛl’ o, “Nyin’ ŋun nyɛ suhukpeendana ni kpiɔŋlan’ ŋɔ, Yawɛ be a sani.”

¹³Ka Gidiɔn yɛl’ o, “Ndana, n suhir’ a, Yawɛ yi be ti sani, di chaŋ wula ka yɛla ŋɔ zaa paai ti? Ti yaannim’ ni yɛl’ ti ni Yawɛ daa tum alahiziba tuun’ shɛŋa la zaa lee bela ya? Bɛ daa kul bɔhira, ‘Pa Yawɛ n-daa yihi ti Ijipti na la?’ Amaa pumpɔŋɔ o chɛ ti mi bahi, ka zaŋ ti niŋ Midiannim’ nuu ni.”

¹⁴Ka Yawɛ ŋmaligi yɛl’ o, “Mani n-tim a, zaŋm’ a kpiɔŋ ŋɔ chaŋ ti fa Izraɛlnim’ Midiannim’ nuu ni bahi.”

¹⁵Ka Gidiɔn garigi yɛl’ o, “Ndana, wula ka n lee yɛn niŋ n-tooi fa Izraɛlnim’ bahi? Nyama, n daŋ niriba nyɛla bɛn ka yaa Manaasa zuliya ni, ka m mi nyɛ ŋun pɔri n yiŋnim’ ni.”

¹⁶Ka Yawɛ yɛl’ o, “N ni be a sani, ka chɛ ka a ŋme n-ku Midiannim’ kaman ninvuɣ’ yino n-nyɛ ba la.”

¹⁷Ka Gidiɔn daa yɛli, “A nini yi tiɣi ma, nyin’ wuhim’ ma shihirili din wuhiri ni nyin’ Yawɛ n-tɔɣisiri ma yɛtɔɣa ŋɔ.

¹⁸N suhir’ a, ni a di chaŋ, ka m bo pin’ na ti ti a.” Ka o yɛl’ o, “N ni guh’ a hal ka a ti labina.”

¹⁹Ka Gidiɔn daa kuli ti gbaai bubil’ kɔrigi, ka tooi zim kilɔgiram pia m-mali bɔrɔbɔro din ka dabindi. Ka daa zaŋ nimdi maa n-niŋ piɛɣu ni, ka zaŋ ʒiɛri mi niŋ ʒɛduɣu ni n-zaŋ li ka oki tia maa gbinna ti ti o.

²⁰Ka Yawɛ malaika maa daa yɛl’ o, “Zaŋm’ nimdi maa mini bɔrɔbɔro din ka dabindi maa pa tampiŋ ŋɔ zuɣu, ka kpaai ʒiɛri maa pol’ li.” Ka Gidiɔn daa niŋ lala.

²¹Ka Yawɛ malaika maa daa zaŋ o ni gbib’ jaaŋgbe’ shɛli o nuu ni nyol’ ni shihi nimdi maa mini bɔrɔbɔro maa. Ka buɣim daa yi tampiŋ maa ni na taai nimdi maa mini bɔrɔbɔro din ka dabindi maa n-di li zaa. Ka Yawɛ malaika maa daa ŋmaligi chaŋ, ka Gidiɔn bi lan nya o.

²²Di saha maa ka Gidiɔn daa baŋ ni Yawɛ malaika m-bala; ka kuhi yɛli, “Mbaye! Yaa n Duuma NAAWUNI, dama n nini nya Yawɛ malaika!”

²³Amaa ka Yawɛ yɛl’ o, “Di chɛ ka dabiɛm mal’ a. Chɛ ka a suhu doya, a ku kpi.”

²⁴Ka Gidiɔn daa me sara maligu bimbini ti Yawɛ nimaani, ka bol’ li, “Yawɛ nyɛla suhudoo.” Ka di na kul ʒe Ofira Abiɛzanim’ ni su luɣ’ shɛl’ la hal ni zuŋɔ.

²⁵Ka Yawɛ daa yɛli Gidiɔn dindali maa yuŋ, Gbaam’ a ba naɣilaa, ka bo naɣila’ so ŋun pah’ ayi ka nyɛ yuma ayopɔin ka daag’ a ba ni me Baal bimbin’ shɛl’ la luhi, ka ŋmaai Ashɛra ŋmahinli binwɔɣinli din ʒe m-baɣ’ li la luhi;

²⁶ka me bimbini n-chɛ ka di kuɣa do m-pa tab’ zuɣu viɛnyɛliŋga tam zoli ŋɔ zuɣu n-ti Yawɛ ŋun nyɛ yi Naawuni ŋɔ; ka zaŋ naɣila’ so ŋun pah’ ayi la mali sara zaŋ o pa Ashɛra ŋmahinli binwɔɣinli shɛli a ni daai luhi la dari zuɣu n-nyo li buɣim.

²⁷Ka Gidiɔn daa zaŋ o tumtumdiba ninvuɣ’ pia pa omaŋ’ zuɣu chaŋ ti niŋ Yawɛ ni yɛl’ o ni o niŋ shɛm maa. O daa zɔrila o yiŋnim’ min’ o yanim’ ni o niŋ li wuntaŋ’ ni, dinzuɣu ka o daa niŋ li la yuŋ.

²⁸Ka biɛɣu daa neei ka tiŋ’ maa nim’ yina ti nya ka bɛ wurimla Baal bimbini maa, ka daai Ashɛra ŋmahinli binwɔɣinli din ʒe m-baɣ’ li la luhi, ka me bimbin’ shɛli zali di zaashee maa, ka zaŋ naɣila’ so ŋun pah’ ayi mali sara pa di zuɣu n-nyo o buɣim.

²⁹Ka bɛ bɔhiri taba, “Ka ŋuni n-lee tum tuuni ŋɔ?” Ka bɛ daa vihi di zuɣu hal ka so ti yɛli ba ni Gidiɔn Jɔash bia la n-tum tuuni maa.

³⁰Di saha ka tiŋ’ maa nim’ daa yɛli Jɔash, “Yihim’ a bia maa na ka ti ku o. O ni wurim Baal bimbini, ka ŋmaai Ashɛra ŋmahinli binwɔɣinli din ʒe m-baɣ’ li la luhi la zuɣu.”

³¹Amaa ka Jɔash daa bɔhi bɛn zaa kana ti lir’ o maa, “Yi zanila Baal zaani? Yi zabirila o zuɣu? Ŋunkam zabir’ o zuɣu, zaŋ chaŋ biɛɣ’ asiba bɛ ni ku dilana. O yi nyɛla wuni, yin’ chɛliy’ o ka o zab’ omaŋ’ zuɣu, dama o bimbini ka bɛ wurim maa.”

³²Dindali maa zaŋ chana, bɛ daa booni Gidiɔn la Jɛrubaal,[5] Di gbinni nyɛla, “Chɛliya ka buɣili Baal min’ o va; dama o bimbini ka o wurim maa.”

³³Di saha maa ka Midiannim’ mini Amalɛknim’ ni wulimpuhili polo nim’ zaa daa laɣim kana ti gbaai Jɔɔdɛn Mɔɣili du n-zaŋ bɛ tantinim’ ti kpa Jɛziriil Vinvamli ni.

³⁴Amaa ka Yawɛ Shia daa siɣi Gidiɔn zuɣu na, ka o zaŋ kikaa piɛb’ boli Abiɛza daŋ niriba ni bɛ kana ti dol’ o.

³⁵Ka o daa tim tuumba Manaasa zuliya niriba zaa sani nti boli ba ka bɛ kana ti dol’ o. Ka o daa lan tim ti boli Asha mini Zɛbulɔn ni Naftali zuliya niriba, ka bɛ gba daa kana ti pahi bɛ zuɣu.

³⁶Di saha ka Gidiɔn daa yɛli Yawɛ. “A yɛliya ni a ni zaŋ ma tuhi fa Izraɛlnim’ bahi.

³⁷Nyama, n yɛn zaŋla piɛ’ gbaŋ sɔŋ kabɔɣili ni, maligim yi lula piɛ’ gbaŋ maa kɔŋko zuɣu, ka bi lu m-mahigi tiŋgbani gil’ li, dindina m baŋya ni a shiri ni chɛ ka n fa Izraɛlnim’ bahi kaman a ni yɛli shɛm.”

³⁸Ka di daa shiri niŋ lala. Biɛɣu ni daa neei, ka Gidiɔn yiɣisi asiba, o daa kahim piɛ’ gbaŋ maa zuɣu maligim palila pipia.

³⁹Ka Gidiɔn daa lan yɛli Naawuni, “N suhir’ a, di chɛ ka a suhu yiɣisi bahi n zuɣu, m bɔrimi ni n lan zaŋ piɛ’ gbaŋ maa sɔŋ buɣisi bin’ yini pahi. N suhir’ a, chɛ ka maligim lu m-mahigi tiŋgbani gili piɛ’ gbaŋ maa, amaa ka chɛ ka piɛ’ gbaŋ maa zuɣu kuma.”

⁴⁰Ka Naawuni daa shiri niŋ lala dindali maa yuŋ. O daa chɛ ka piɛ’ gbaŋ maa zuɣu kummi, amaa ka chɛ ka maligim lu m-mahigi tiŋgbani din gil’ li zaa.