Read Dagbani Zuɣulaannima 7 Bible Online

Zuɣulaannima 7 - Dagbani bible

Zuɣulaannima 7

¹Di saha ka Jɛrubaal (Gidiɔn m-bala) mini ninvuɣ’ shɛb’ bɛn be o sani zaa daa daŋ yibu chaŋ ti dɔni baɣili Harɔd kulibɔŋ. Ka Midiannim’ mi daa do vinvamli ni zaŋ lab’ nuzaa polo miri Mɔre daboli.

²Ka Yawɛ daa yɛli Gidiɔn, “A niriba maa galisiya pam ni n zaŋ Midiannim’ niŋ bɛ nuu ni. Di yi niŋ lala Izraɛlnim’ ni nyu bara niŋ ma ka yɛli, ‘Tinima n-tuhi fa timaŋa.’

³ Dinzuɣu yɛlim’ niriba maa ni ŋunkam zɔri dabiɛm ka o ni sɔhira, ŋun’ lab’ kuli.” Ka Gidiɔn daa buɣisi ba lala, ka ninvuɣ’ tuhi’ pisinaayi daa lab’ kuli; ka chɛ ninvuɣ’ tuhi’ pia kɔŋko.

⁴Ka Yawɛ daa yɛli Gidiɔn, “niriba maa na kul galisiya. Zaŋm’ ba chaŋ kuliga ni ka n ti buɣisi ba nimaani ti a; ka n yi yɛl’ a ni so ni dol’ a chaŋ, dilana n-ni dol’ a chaŋ; ka m mi yi ti yɛl’ a ni so ku dol’ a chaŋ, dilan’ shiri ku dol’ a chaŋ”

⁵Ka Gidiɔn daa zaŋ niriba maa chaŋ kuliga ni, ka Yawɛ ti yɛli Gidiɔn, “Ŋunkam mal’ o zilinli nyuri kom kaman baa la, nyin’ woligim’ o zal’ o ko; ka ŋunkam mi ti gban’ tiŋ’ nyura, nyin’ woligim’ o gba zal’ o ko.”

⁶Ka ninvuɣ’ shɛb’ bɛn daa zaŋ bɛ nuhi tooi kom maa m-mali bɛ zilima nyur’ li kalinli daa yiɣisi kɔbisita, amaa ka bɛn kpalim la bɛn’ zaa daa gbanila tiŋ’ nyura.

⁷Ka Yawɛ daa yɛli Gidiɔn, “Ninvuɣ’ kɔbisita shɛb’ bɛn mali bɛ zilima nyuri kom ŋɔ ka n ni zaŋ fan ya bahi, ka zaŋ Midiannim’ maa niŋ yi nuu ni. Dinzuɣu chɛ ka ninvuɣ’ shɛb’ bɛn kpalim maa zaa lab’ kuli.”

⁸Ka Gidiɔn daa diɛhi duɣubihi mini kikahi Izraɛlnim’ shɛb’ bɛn kpalim la sani, ka chɛ ka bɛ zaa lab’ kuli ka chɛla ninvuɣ’ kɔbisita maa. Ka Midiannim’ daa zaŋ bɛ tantinim’ kpa n-do bɛ ni daa be zo’ shɛli zuɣu maa vinvamli ni.

⁹Dindali maa yuŋ ka Yawɛ daa yɛli Gidiɔn, “Yiɣisim’ chaŋ ti liri Midiannim’ maa, dama n zaŋ ba niŋ a nuu ni.

¹⁰Amaa a yi zɔri dabiɛm ni a chaŋ, nyin’ zaŋm’ a tumtumda Pura pah’ amaŋ’ zuɣu chaŋ.

¹¹A ni ti wum bɛ ni yɛn yɛli shɛm. Ka di nyaaŋa a ni nya kpiɔŋ chaŋ ti liri ba.” Ka o min’ o tumtumda Pura daa chaŋ ti zani miri bɛ dimnim’ maa tɔbbi’ shɛb’ bɛn lo kpara do sansan’ maa tariga.

¹²Ka Midiannim’ mini Amalɛknim’ ni Wulimpuhili polo nim’ la zaa daa laɣim do vinvamli maa ni, ka bɛ galisim ŋmanila toli. Bɛ laakumnim’ daa ka kalinli; bɛ galisim daa ŋmanila teeku noli bihigu.

¹³Gidiɔn ni daa mali ti paai nimaani saha shɛli, ka o wum ka Midiannim’ maa ni so yɛr’ o kpee o ni zahim zahindi shɛm. O daa yɛlimi, “Nyama, n zahimla zahindi nya ka bɔrɔbɔro kpilli bilim na ti kpe Midiannim’ sunsuuni n-kana ti kpe tanti shɛl’ ni ŋ-ŋme li, ka di lu n-lɛb’ pil’ tiŋa n-dɔni talisi tiŋ’ zaa.”

¹⁴Ka o kpee maa garigi yɛl’ o, “Dimbɔŋɔ nyɛla Jɔash bia Gidiɔn ŋun nyɛ Izraɛl nir’ la takɔbi. Naawuni pun zaŋ Midiannim’ mini bɛ tɔbbihi ŋɔ zaa niŋ o nuu ni.”

¹⁵Gidiɔn ni daa wum doo maa zahindi maa mini di gbinni ni wuhi shɛm maa, ka o daa paɣi Naawuni pam, ka ŋmaligi lab’ Izraɛlnim’ sani ti yɛli ba, “Yiɣisimiya ka ti chaŋ, Yawɛ zaŋ Midiannim’ maa zaa niŋ yi nuu ni.”

¹⁶Ka o daa pirigi ninvuɣ’ kɔbisita maa ʒii buta, ka zaŋ kikahi mini firilanim’ ni be duɣubihi shɛŋa ni ti bɛ zaa

¹⁷ka yɛli ba, “N yi ti paai sansani maa shee, yin’ lihimiya ma ka niŋ n ni niŋdi shɛm.

¹⁸M mini bɛn be n sani yi ti kul piɛb’ ti kikahi; yi gba yin’ piɛbimiya yi kikahi bɛ sansani maa luɣilikam zaa ka kuhi yɛli, “Tuhimiya ti Yawɛ mini Gidiɔn.”

¹⁹Ka Gidiɔn mini ninvuɣ’ kɔbiga bɛn daa be o sani maa daa mali ti paai sansani maa shee yuntisuɣu saha tiŋguliba ni deeri tab’ tuma saha shɛli n-dii piɛb’ bɛ kikahi ka ŋme ŋ-ŋma bɛ ni gbib’ duɣubihi shɛŋa maa.

²⁰Ka bɛ ninvuɣ’ kɔbisita maa zaa daa niŋ lala, ka chɛ bɛ firilanim’ gbib’ bɛ nuzahi ni, ka gbib’ kikahi mi bɛ nudiriti ni m-piɛbiri ka kuhiri yɛra, “Yawɛ mini Gidiɔn takɔbi!”

²¹Ka Gidiɔn min’ o tɔbbihi maa zaa daa kul ba n-ʒe bɛ zaashɛhi ni gili Midiannim’ sansani maa, ka Midiannim’ maa daa kuhi ka yiɣisi guui.

²²Gidiɔn min’ o tɔbbihi maa ni daa kul piɛb’ bɛ kikahi kɔbisita maa saha shɛli, ka Yawɛ daa chɛ ka bɛ dimnim’ maa zaŋ bɛ takɔbiri ŋmaligi lu tab’ zuɣu n-kari tab’ kpa Zɛrɛra[6] polo m-mali hal ti paai Bɛtishita n-zaŋ hal ni Ɛbɛlimɛhola tintariga din baɣi Tabat la.

²³Ka bɛ daa ŋme kuŋ’ boli Izraɛlnim’ zaa bɛn nyɛ Naftali mini Asha ni Manaasa zuliya niriba zaa, ka bɛ kana ti doli Midiannim’ maa.

²⁴Ka Gidiɔn daa lan tim Ifriim tiŋgban’ ni zoya zuɣu tinsi ni ti boli niriba n-yɛli ba, “Kamiyana ti tuhi Midiannima. Chamiya ti gu ba kulibɔna ni hal ti paai Bɛtibara zaŋ hal ni Jɔɔdɛn Mɔɣili ni.” Ka Ifriim zuliya niriba zaa daa yina n-chaŋ ti gu kulibɔna maa ni hal ti paai Bɛtibara n-zaŋ hal ni Jɔɔdɛn Mɔɣili ni.

²⁵Ka bɛ daa gbahi Midian nabih’ ayi. Bɛ yuya m-booni Orɛb mini Ziib. Ka bɛ daa ku Orɛb bɛ ni daa booni tampin’ shɛli Orɛb la gbini; ka daa ku Ziib mi Ziib wain tɔɣibo shee. Bɛ ni daa kariti doli Midiannim’ maa, ka bɛ daa ti zaŋ Orɛb mini Ziib zuɣuri na ti ti Gidiɔn Jɔɔdɛn Mɔɣili duli.