Read Dagbani Zuɣulaannima 8 Bible Online

Zuɣulaannima 8 - Dagbani bible

Zuɣulaannima 8

¹Di nyaaŋa ka Ifriim zuliya niriba daa kana ti bɔhi Gidiɔn, “Bɔ n-niŋ ka a daa yɛn chaŋ ti tuhi Midiannim’ ka bi bol’ ti? Bɔzuɣu ka a niŋ ti lala?” Ka bɛ daa galim’ o pam di zuɣu.

²Ka o daa yɛli ba, “N ku tooi zaŋ n ni tum shɛm buɣisi yi ni tum shɛm. Hal yinim’ Ifriim zuliya niriba ni tum biɛla shɛli maa gari tinim’ Abiɛza daŋ niriba ni tum shɛm zaa.

³Naawuni daa zaŋ Midiannim’ nanim’ niŋ yi nuu ni. Bɛna n-nyɛ: Orɛb mini Ziib. Ka n ni tum shɛli lee nyɛla dini, ka n-ni tooi zaŋ li buɣisi yi dini?” Ka o ni daa yɛli shɛm ŋɔ zuɣu chɛ ka bɛ suhuyiɣisili zaŋ chaŋ o sani maa kpi.

⁴Ka Gidiɔn mini ninvuɣ’ kɔbisita bɛn daa be o sani maa daa kana ti gbaai Jɔɔdɛn Mɔɣili du m-biɛhiri bɛ dimnim’ maa naba, ka di daa wum ba pam.

⁵ Dinzuɣu ka o daa yɛli Sukɔtinima, “N suhiri ya, niŋmiya bɔrɔbɔro ti n niriba bɛn doli ma ŋɔ; dama di wum ba pam, ka m mi na kariti dolila Midian nanim’ Zɛba mini Zalimuna.”

⁶Amaa ka Sukɔt kpamba daa bɔh’ o, “A na bi gbahi Zɛba mini Zalimuna, ka bɔzuɣu ka ti lee yɛn ti a bindirigu?”

⁷Ka Gidiɔn yɛli ba, “To, di pa taali! Amaa Yawɛ yi zaŋ Zɛba mini Zalimuna niŋ n nuu ni, n ni zaŋ ya pa mɔɣu ni gɔhi zuɣu n du n-tam yi zuɣu nɔn ya.”

⁸Ka Gidiɔn daa yi nimaani chaŋ Pɛnuɛl nti lan suhi bɛ gba bindirigu. Ka Pɛnuɛluɛlnim’ daa garigi yɛl’ o kaman Sukɔtinim’ ni daa yɛl’ o shɛm maa.

⁹Ka o daa yɛli Pɛnuɛluɛlnim’ maa, “N yi ti labina ni alaafee, n ni daai yi pii ŋɔ luhi.”

¹⁰Di saha Zɛba mini Zalimuna ni bɛ tɔbbihi daa bela Karikɔr. Wulimpuhili polɔnim’ maa tɔbbihi bɛn daa kpalim kalinli daa nyɛla kaman tuhi’ pinaanu, dama bɛ daa pun ku bɛ ni ninvuɣ’ tuhi’ kɔbiga ni tuhi’ pisi bɛn daa gbib’ takɔbiri la.

¹¹Ka Gidiɔn daa baɣisi mɔɣu maa tariga zaŋ kpa Nɔba mini Jɔgbɛha wulimpuhili polo nti lu bɛ tɔbbihi maa zuɣu, dama tɔbbihi maa daa bi mali shili gu.

¹²Ka Midian nanima ayi bɛn nyɛ: Zɛba mini Zalimuna daa guui, ka Gidiɔn kari doli ti gbahi ba, ka chɛ ka bɛ tɔbbihi zaa suhuri chihi.

¹³Ka Jɔash bia Gidiɔn maa daa yi tɔb’ maa ni kuni ka zaŋ doli yi Hɛrɛs kunkuni polo.

¹⁴Ka o daa gbaai Sukɔt nachimbil’ so m-bɔh’ o bɔhigu. Ka nachimbil’ maa daa kali Sukɔt kpamba pisopɔinnaayopɔin wuhi Gidiɔn.

¹⁵Ka Gidiɔn daa chaŋ Sukɔt ti yɛli ba, “N-nyɛ Zɛba mini Zalimuna. Yi daa mɔŋ m mini n tɔbbi’ shɛb’ di ni daa wum pam la bindirigu, ka maani ma ansarisi yɛra, ‘A na bi gbahi Zɛba mini Zalimuna n-kpɛh’ a nuu ni, ka bɔzuɣu ka ti lee yɛn ti a bindirigu?’ ”

¹⁶Ka o daa gbahi Sukɔt kpamba n-zaŋ ba pa mɔɣu ni gɔhi zuɣu n-du n-tam bɛ zuɣu n-no ba. O daa niŋla lala ni o wuhi Sukɔtinim’ maa yɛm.

¹⁷Ka o daa lan daai Pɛnuɛluɛlnim’ pii la luhi, ka ku tiŋ’ maa ni dɔbba.

¹⁸Dimbɔŋɔ nyaaŋa ka Gidiɔn daa bɔhi Zɛba mini Zalimuna, “Ninvuɣ’ banim’ ka yi daa lee ku Tabo la?” Ka bɛ garigi yɛl’ o, “Bɛ zaa daa bela a ni be shɛm ŋɔ, bɛ daa ŋmanila nabihi.”

¹⁹Ka Gidiɔn yɛli ba, “M mabihi n-daa bala. M mini ba zaa nyɛla ma pu’ yin’ ni bihi. Yawɛ zuɣu, yi yi di daa chɛ ba, n naan ku kun ya.”

²⁰Di saha ka o daa ŋmaligi yɛl’ o bidib’ tuuli Jɛta, “Yiɣisim’ ku ba.” Amaa ka bia maa daa bi saɣi ŋ-ŋoog’ o takɔbi. O daa zɔrila dabiɛm, o ni daa na nyɛ bipolli la zuɣu.

²¹Ka Zɛba mini Zalimuna daa yɛli Gidiɔn, Amaŋmaŋ’ yiɣisim’ ku ti. Dama doo ni be shɛm lala n-nyɛ o kpiɔŋ gba!.” Ka Gidiɔn daa yiɣisi ku Zɛba mini Zalimuna, ka yihi bɛ laakumnim’ nyiŋgoya ni nachiinsi binyara.

²²Dimbɔŋɔ nyaaŋa ka Izraɛlnim’ daa yɛli Gidiɔn, “Leemi ti naa su ti; ka a bidibiga min’ a nyaaŋa gba ti nyɛ ti nanim’ su ti, a ni fa ti Midiannim’ nuu ni bahi ŋɔ zuɣu.”

²³Ka Gidiɔn yɛli ba, “N ku leei yi naa; ka m bidibiga gba ku leei yi naa sun ya; Yawɛ n-nyɛ yi naa ŋun sun ya.”

²⁴Amaa ka o daa lee yɛli ba, “Bin’ shɛli ka n naɣ’ bɔri ni n suhi ya, Yi zaa piim’ tibikpara yi ni ŋme n-di neen’ shɛŋa la ni ti ma.” (Dama bɛ ni daa ŋme ninvuɣ’ shɛb’ ka di nɛma maa daa nyɛla Ishimail zuliya bɛn daa kpari salima tibikpara).

²⁵Ka niriba maa garigi yɛli Gidiɔn, “Ti ni zaŋ li ti a ni ti suhuri zaa.” Ka bɛ daa teei binyɛrigu sɔŋ, ka sokam zaa zaŋd’ o ni ŋme n-di tibikpar’ shɛŋa na ti pari di zuɣu.

²⁶Gidiɔn ni daa deei salima tibikpar’ shɛŋa maa tibisim daa nyɛla kaman kilɔgiram pisi. Dimbɔŋɔ daa bela di ko ka naanyi chɛ nachiinsi binyara mini nyiŋgokɔriti ni kpar’ ʒe’ shɛŋa Midian nanim’ ni daa yɛra ni nyiŋgokɔr’ shɛŋa din daa be bɛ laakumnim’ nyiŋgoya ni la.

²⁷Ka Gidiɔn daa zaŋ salima maa dooi mali binnan’ shɛli n-zaŋ li zal’ o ya Ofira, ka Izraɛlnim’ zaa daa chani ti jɛmdi li. Ka di daa leei zana Gidiɔn min’ o malibu sani.

²⁸Ka Izraɛlnim’ daa nyaŋ Midiannima, ka bɛ ku lan tooi niŋ ba shɛli yaha. Ka Izraɛlnim’ daa nya vuhim bɛ tiŋgbɔŋ maa ni yuun’ pihinahi Gidiɔn ʒiɛman’ ni.

²⁹Ka Jɛrubaal Jɔash bia maa daa kul’ omaŋmaŋ’ yiŋ’ ti ʒini.

³⁰Gidiɔn maŋmaŋ’ bidibisi daa nyɛla pisopɔin, dama o daa malila paɣ’ bɔbili.

³¹Ka o mam ŋun daa be Shɛkɛm gba daa dɔɣ’ o bidib’ yino, ka o bol’ o yuli Abimilɛk.

³²Ka Jɔash bia Gidiɔn maa daa mali hal ti kurigi ka naanyi kpi, ka bɛ daa zaŋ o sɔɣ’ o ba Jɔash siliga ni Abiɛza daŋ niriba ya Ofira.

³³Gidiɔn kum nyaaŋa, di daa bi yuui ka Izraɛlnim’ lan ŋmaligi jɛmdila Baalnima. Bɛ daa zaŋla alikauli lɔbu Baal n-leei bɛ wuni.

³⁴Izraɛlnim’ daa tam Yawɛ ŋun nyɛ bɛ Naawuni ŋun daa tiligi ba bɛ dimnim’ bɛn gili bɛ luɣilikam zaa nuu ni la yɛla.

³⁵Ka bɛ daa bi lan ʒe Jɛrubaal (Gidiɔn) malibu yim, o ni daa tum tuun’ sun’ shɛli ti Izraɛlnim’ la gba zuɣu.