Read Dagbani 3 Jɔn 1 Bible Online

3 Jɔn 1 - Dagbani bible

3 Jɔn 1

¹ Man’ ŋun nyɛ kpɛm’ la n-sabiri gbaŋ ŋɔ tiri n zo Gaiɔs ŋun nyɛ n ni yuri so ni yɛlimaŋli la.

²M biyurigu, n suhiri Naawuni ni o chɛ ka shɛlikam be viɛnyɛla a sani, ka a lan mal’ alaafee a niŋgbuŋ ni gba kaman n ni mi ni a shia mal’ alaafee shɛm.

³Ti mabi’ shɛb’ ni daa ti paana nti yɛl’ a ni doli yɛlimaŋli shɛm min’ a ni shiri kul be yɛlimaŋli maa ni sahakam shɛm, di daa niŋ ma suhupiɛlli pam.

⁴Shɛli kani din ni lan ti ma suhupiɛlli gari n yi ti wum ni m bihi doli yɛlimaŋli.

⁵M biyurigu, a ʒe yim a ni tumdi tuun’ shɛŋa tiri ti mabihi la puuni, di bahi bamdi bɛn nyɛ saamba la.

⁶Bɛ zaŋ a yurilim yɛla yɛli cheechi din be kpe ŋɔ. Niŋmi ania sɔŋ ba ka bɛ bahi chaŋ bɛ chandi maa, dama lala niŋbu nyɛla din tiɣiri Naawuni nini.

⁷Bɛ daa yi n-chaŋ ti tumdi Masia tuma, ka bi deei sɔŋsim shɛli bɛn pa yɛdaniŋdib’ la sani.

⁸Dinzuɣu di niŋ kamaata ni ti sɔŋdi niriba lala tatabo, ka di chɛ ka ti leei bɛn mini ba laɣindi tumdi yɛlimaŋli la puuni.

⁹N daa sabi gbaŋ ti cheechi na; amaa ka Diɔtrifiiz ŋun bɔri ni o nyɛ bɛ toondan’ la bi lihi ma ni m mali yiko zaŋ chaŋ n ni yɛli shɛm maa polo.

¹⁰Dinzuɣu n yi ti kana, n ni yih’ o ni niŋ shɛlikam tɔɣisi yɛtɔɣ’ biɛ’ shɛŋa dalindi ti la palɔni. Amaa o nini na bi tiɣi o ni niŋ shɛm maa. Ti mabihi yi kul kana sahakam, o zaɣisiri ba la deebu, ka kariti ninvuɣ’ shɛb’ bɛn bɔri ni bɛ deei ba, hal ka kul kpaŋd’ omaŋa ni o kari ba yihi cheechi ni gba.

¹¹M biyurigu, di chɛ ka a bebu doli din nyɛ zaɣ’ biɛɣu, amaa chɛ ka a bebu dolila din nyɛ zaɣ’ viɛlli. Ninvuɣ’ so ŋun tumdi din nyɛ zaɣ’ viɛlli nyɛla ŋun mi Naawuni, ka ninvuɣ’ so ŋun mi tumdi din nyɛ zaɣ’ biɛɣu nyɛla ŋun ʒi Naawuni.

¹²Sokam diri Dimitirius shɛhira suŋ, hal yɛlimaŋli maŋmaŋ’ gba dir’ o shɛhira suŋ. Ka timaŋmaŋ’ gba dir’ o shɛhira pahi; ka a mi ni ti ni yɛli shɛm maa nyɛla yɛlimaŋli.

¹³M mali yɛla pam ni n yɛl’ a, amaa m bi bɔri ni n zaŋ alikalimi mini tadabo -sab’ li ti a.

¹⁴M mali tahima ni di ku yuui ka n nya a, ka ti nini nya taba ka ti tɔɣisi.

¹⁵Naawuni tim’ a suhudoo! A zɔnim’ la zaa puhir’ a. Puhimi ti zɔnim’ la zaa ti ma.