Read Dagbani Kahigibu 1 Bible Online

Kahigibu 1 - Dagbani bible

Kahigibu 1

¹Sabbu din be litaafi ŋɔ ni nyɛla yɛl’ shɛŋa Naawuni ni daa zaŋ ti Yisa Masia ni o kahigi binshɛŋa din yɛn niŋ wuh’ o daba. O daa timla o malaika o dabili Jɔn sani ka o ti kahigi li n-wuh’ o.

²Ka Jɔn daa niŋ Naawuni yɛligu maa mini Yisa Masia shɛhira ni omaŋmaŋ’ nini ni daa nya shɛlikam zaa shɛhiralana.

³Ninvuɣ’ so ŋun karindi anabitali yɛtɔɣa ŋɔ mini ninvuɣ’ shɛb’ bɛn wumdi li ka doli din sabi litaafi ŋɔ puuni mal’ alibarika, dama saha maa miriya.

⁴ Man’ ŋun n-sabiri gbaŋ ŋɔ tiri cheechinima ayopɔin din be Ɛsha: Naawuni ŋun be, ka daa pun be, ka ni ti kana mini shih’ ayopɔin bɛn be o nam ʒiishee tooni la ni Yisa Masia ŋun nyɛ shɛhiralana ŋun be tibi, ka nyɛ ŋun daŋ tooni n-neei kum ni, ka lan nyɛ dunia ŋɔ nanim’ toondan’ la niŋm’ alibarika niŋ yi ni, ka tin ya suhudoo din nyɛ bɛ dini. Ŋuna n-yuri ti ka daa zaŋ o ʒim fa ti ti daalahichi ni bahi,

⁶ ka dihi ti nam n-zaŋ ti leei maligumaaniba ni ti jɛmd’ o Ba Naawuni. Ŋuna n-simdi tibigibu, ka simdi ni o su yiko hal ni saha din ka bahigu! Ami!

⁷ Nyamiya, o ni ti be sagbana ni kanna, ka sokam nina ni ti nya o, hal bɛn daa zaŋ kpani kuh’ o luɣili la gba ni ti nya o, ka dunia ŋɔ zuliya kam ti fabili bɛ ni daa niŋ o shɛm zuɣu. Lala nti shiri yɛn niŋ. Ami.

⁸ Ti Duuma Zallakudura Naa ŋun be, ka daa pun be, ka ni ti kana la yɛliya: “N nyɛla Alfa mini Omega.” “Di gbinni nyɛla ŋun nyɛ piligu ni bahigu.”

⁹Man’ Jɔn nyɛla yi mabi’ so ŋun mini ya pahi ti Duuma Yisa zuɣu n-laɣim di suɣilo ti nahiŋgu puuni o nam ni la. N daa ti bela teeku puuni tiŋgban’ bil’ shɛli din yuli booni Patmɔs la ni. Naawuni yɛligu mini Yisa shɛhira la zuɣu ka bɛ daa zaŋ ma ti niŋ nimaani.

¹⁰Ti Duuma dabisili dali ka Naawuni Shia Kasi daa ti pali ma, ka n wum kukol’ shɛli n nyaaŋa polo ka di tahiri kaman kikaa vur’ la

¹¹yɛra, “Sabimi a ni yɛn nya shɛli maa niŋ litaafi ni n-zaŋ tim ti ti cheechinima ayopɔin (din be Ɛsha) la. Di tinsi n-nyɛ: Ɛfɛsus mini Smɛɛna ni Pɛɛgamum ni Taiatira ni Saadis ni Filadɛlfia ni Laodisia.”

¹²Di saha ka n daa ŋmaligi lihi ni n nya ŋun yɛli ma lala maa. N ni daa lihi maa, ka n nya salima firilatamdis’ ayopɔin,

¹³ ka nya so ka o ʒe di sunsuuni ŋ-ŋmani daadam. O daa yɛla binyɛr’ wɔɣinli din chaŋ ti lim o napɔnvari, ka salima nyolɔrigu lo o nyɔɣu.

¹⁴ Ka o zabiri piɛli kaman piɛ’ piɛlli kɔbiri bee gumbɔrigu; ka o nina be kaman buɣim zilinli la.

¹⁵ Ka o napɔnvari be kaman daanya sun shɛli bɛ ni zaŋ she zuɣiri buɣim ni m-paɣi ka di yi viɛnyɛliŋga la. Ka o kukoli mi vuri kaman kɔzɔrim vubu la.

¹⁶Ka o gbibi saŋmaris’ ayopɔin o nudirigu ni, ka takɔb’ dirili din mali naŋgbana ayi yir’ o nol’ ni na, ka o ninni ne kaman wuntaŋ’ ni yi neei ni o kpiɔŋ zaa shɛm la.

¹⁷ N ni daa nya o maa, ka n lu n-dɔni o tooni m-be kaman kpim’ la. Amaa ka o zaŋ o nudirigu m-pa n zuɣu ka yɛli ma, “Di chɛ ka dabiɛm mal’ a; mani n-nyɛ piligu ni bahigu,

¹⁸ka lan nyɛ ŋun be nyɛvili ni; nyama, n daa pun kpimi ka neei, ka mi ku lan kpi hal abada. Mani n-su kum mini kpiimba biɛhigu shee saafɛbihi fukumsi.

¹⁹Sabimi binshɛŋa a nini ni nya maa: Binshɛŋa din be mini binshɛŋa din ti yɛn niŋ dimbɔŋɔnim’ nyaaŋa.

²⁰A ni nya saŋmaris’ ayopɔin shɛba n nudirigu ni la mini salima firilatamdis’ ayopɔin shɛŋa la gbinni m-bɔŋɔ: Saŋmaris’ ayopɔin maa nyɛla cheechinima ayopɔin la malaikanima, ka salima firilatamdis’ ayopɔin la mi nyɛ cheechinima ayopɔin la.”