Read Dagbani Kahigibu 10 Bible Online

Kahigibu 10 - Dagbani bible

Kahigibu 10

¹Di saha ka n daa lan nya malaika so ŋun mali yiko pam ka o yi zuɣusaa siɣirina ka zaŋ sagbani n-ye kaman chinchin’ la, ka sagani booi gil’ o zuɣu, ka o ninni be kaman wuntaŋa, ka o biɛhi mi be kaman buɣim zilima la.

²Ka o daa mal’ litaafi bil’ shɛli ka di kpabigi be o nuu ni, ka o zaŋ o nudirigu napɔŋ zali teeku ni, ka zaŋ o nuzaa napɔŋ mi zali duli

³ka kuhi pam kaman gbuɣinli ni yi ŋum shɛm la. O ni daa kuhi maa, ka satahins’ ayopɔin tahi.

⁴Satahins’ ayopɔin maa ni daa tahi saha shɛli maa ka n niŋ shili ni n sabi, amaa ka daa wum kukol’ shɛli ka di yi zuɣusaa na n-yɛra, “Gbib’ satahins’ ayopɔin maa ni yɛli shɛm maa ashilɔni, ka di sab’ li sɔŋ!”

⁵ Ka n ni daa nya malaika so ka o tam teeku kom zuɣu mini dul’ la daa kpuɣ’ o nudirigu zuɣusaa,

⁶ka po Naawuni ŋun ni be hal ni saha din ka bahigu, ka nyɛ ŋun nam zuɣusaa mini binshɛɣukam din be di ni ni dunia ŋɔ mini binshɛɣukam din be di ni ni teeku mini binshɛɣukam din be di ni ŋɔ n-yɛli ni guhibu lan kani.

⁷Amaa ni malaika ŋun pah’ ayopɔin ni ti yɛn piɛb’ o kikaa dahin shɛl’ la ka Naawuni daashili yɛl’ shɛŋa o ni daa yɛl’ o daanabinim’ la ni ti niŋ pali.

⁸Di saha ka n ni daa pun wum kukol’ shɛli ka di yi zuɣusaa na la lan yɛli ma yaha, “Cham’ ti deei litaafi bil’ shɛli din bɔɣi be malaika so ŋun tam teeku kom zuɣu mini duli zuɣu ŋɔ nuu ni.”

⁹Ka n daa chaŋ malaika maa sani nti yɛl’ o ni o zaŋm’ litaafi bila maa ti ma. Ka o yɛli ma, “Zaŋm’ li ŋubi; di ni malis’ a nol’ ni kaman shir’ la, amaa ka lee to a puuni.”

¹⁰ Ka n daa deei litaafi bila maa malaika maa nuu ni n-zaŋ ŋubi; ka di shiri malisi n nol’ ni kaman shir’ la, ka n ni daa ti ŋub’ li naai, ka di shiri to m puuni.

¹¹Ka bɛ daa yɛli ma, “A na ni tɔɣisi anabitali yɛtɔɣa zaŋ chaŋ niriba balibu pam mini zuliya pam ni tinzun yɛligu pam nima ni nanim’ pam polo.”