Read Dagbani Kahigibu 19 Bible Online

Kahigibu 19 - Dagbani bible

Kahigibu 19

¹Dimbɔŋɔ nyaaŋa ka n daa wum kukol’ shɛli damli kaman salo pam kukoya la ka di yi alizanda ni na yɛra, “Haliluya! Ti Duuma Naawuni n-su tiliginsim mini yiko, ka simdi tibigibu!

² O saria dibu dolila yɛlimaŋli soli ni din tuhi. O kari pagɔr’ biɛɣu ŋun zaŋ o zina niŋbu n-saɣim dunia la saria, ka bɔh’ o biɛri ti o ni daa yihi ŋun’ Naawuni dab’ shɛb’ ʒim la.”

³ Ka bɛ daa lan kuhi yɛli, “Haliluya! Tin’ titali maa buɣim dibu nyɔhi kul ni tuɣiri hal ni saha din ka bahigu!”

⁴Ka kpamba pisinaanahi la mini binnɛma anahi la gbani n-jɛmdi Naawuni ŋun ʒi nam ʒiishee la ka yɛra, “Ami! Haliluya!”

⁵ Ka kukol’ shɛli daa yi nam ʒiishee maa gbin’ na yɛra, “Yinim’ bɛn zaa nyɛ wɔɣira mini tarimba, ka nyɛ Naawuni daba bɛn zɔr’ o ŋɔ paɣimiya Naawuni!”

⁶ Di saha ka n daa wum kukol’ shɛli damli kaman salo pam kukoya la, ka di vuri kaman kokpɛɣu ni saa tahibu la yɛra, “Haliluya! Ti Duuma Naawuni, Zallakudura Naa n-su nam!

⁷Chɛliya ka ti suhuri piɛla, ka ti duh’ o ka tibig’ o, dama Piɛbil’ la amiliya lɔbu saha paaya, ka o daamiliya paɣ’ maa pun mali shili.

⁸Ka Naawuni ti o binyɛr’ piɛlli din nyɛlisiri ka be nyam ni o ye. Binyɛr’ piɛlli maa nyɛla wuntizɔriba wuntia tuma.”

⁹ Ka malaika maa yɛli ma, “Sabimi dimbɔŋɔ sɔŋ: Ninvuɣ’ shɛb’ bɛ ni boli ni bɛ ka Piɛbil’ maa amiliya lɔbu chuɣu bindirigu dibu ni na mal’ alibarika!” Ka lan yɛli ma, “Dimbɔŋɔnim’ shiri nyɛla Naawuni yɛligu maŋli.”

¹⁰Di saha ka n gban’ o tooni ni n jɛm o, ka o yɛli ma, “Di niŋ lala! N nyɛla a dab’ kpee ni a mabihi bɛn gbibi Yisa shɛhira la ni yino. Jɛmmila Naawuni!” Dama bɛn gbibi Yisa shɛhira nina neerimi kaman anabinim’ nina ni neeri shɛm.

¹¹ Di saha ka n daa nya ka zuɣusaa bɔɣi, ka n nya wɔr’ piɛli. Ŋun daa ʒi o zuɣu yuli daa boonila Ʒiɛyim mini Yɛlimaŋli. Ka o daa mali wuntitali n-kariti saria ka tuhiri tɔbu.

¹² O nina daa ŋmanila buɣim zilinli, ka nam zuɣupila pam pil’ o zuɣu ni; ka yu shɛli sabi tab’ o, ka so ʒi li pah’ o zuɣu.

¹³Ka o ye binyɛr’ shɛl’ din ŋam ʒim, ka o yuli daa booni Naawuni Yɛligu.

¹⁴Ka alizanda ni tɔbbihi ye binyɛr’ piɛla din piɛli ka be kasikasi m-bari wɔr’ piɛla dol’ o.

¹⁵ Ka takɔb’ dirili yir’ o nol’ ni na, ka o zaŋ li n-zabi nyaŋ zuliya kam, ka zaŋ kurigu jaaŋgbee n-su ba; ka siɣi Naawuni Zallakudura Naa suhuyiɣisili wain tɔɣiri adaka puuni nɔri ginda.

¹⁶Ka yu’ shɛli sabi pa o binyɛrigu min’ o gbalipini zuɣu. Di ni daa sab’ shɛm m-bɔŋɔ: “Nanim’ zaa Naa ni duumanim’ zaa Duuma.”

¹⁷Di saha ka n daa nya malaika so ka o ʒe wuntaŋa n-kuhiri pampam booni noonsi bɛn yiɣiri zuɣusaa ha yɛra: “Laɣimmiya na nti di Naawuni ni tin ya bindir’ shɛli ŋɔ!

¹⁸ Kamiyana nti dinya nanim’ mini sapashinnim’ ni kpiɔŋlaannim’ ni yuri mini bɛn bari ba zaŋ tabili daadam kam bɛn nyɛ bilichinnim’ mini daba ni wɔɣira mini tarimba nimdi!”

¹⁹Ka n daa nya ka biŋkɔbigu la mini dunia nanima ni bɛ tɔbbihi laɣim lo tɔbu ni bɛ tuhi ŋun ʒi wɔhu zuɣu maa min’ o tɔbbihi.

²⁰ Ka bɛ daa gbaai biŋkɔbigu maa min’ anabi ʒirilaan’ so ŋun daa be o sani n-wuhiri shihira n-yɔhindi ninvuɣ’ shɛb’ bɛn daa mali ŋun’ biŋkɔbigu maa dalinli mini bɛn jɛmd’ o binnan’ la. Ka bɛ daa zaŋ biŋkɔbigu maa min’ o daanabi maa zaɣ’ nɛma m-bahi buɣim teeku din buɣim nyɛ chilibi buɣim n-diri la ni.

²¹Ka ŋun daa ʒi wɔhu zuɣu maa zaŋ takɔbi din yir’ o nol’ ni na ku bɛn kpalim, ka noonsi zaa daa di nimdi tiɣi.