Read Dagbani Kahigibu 2 Bible Online

Kahigibu 2 - Dagbani bible

Kahigibu 2

¹“Sabimi n-ti Ɛfɛsus Cheechi malaika n-yɛl’ o ni ŋun gbibi saŋmaris’ ayopɔin o nudirigu ni m-be salima firilatamdis’ ayopɔin sunsuuni n-chani gindi la ni yɛli shɛm m-bɔŋɔ:

²M mi yi tuma ni nyɛ shɛm, ka mi yi ni nahindi shɛm yɛla mini yi daania niŋbu ni yi ni je tuumbiɛrinim’ shɛm yɛla. N lan mi yi ni kpahim ninvuɣ’ shɛb’ bɛn zaŋ bɛmaŋa m-boli Yisa tuumba, amaa ka pa o tuumba la ni yi ni nya ka bɛ nyɛla ʒirinim’ la.

³M mi ni yi niŋ ania n-saɣi nahiŋgu n yuli zuɣu, ka na bi tiri gbini.

⁴Amaa yɛl’ yini zuɣu ka n naɣ’ galim ya: Yi bahi yi tuuli yurilim la.

⁵Kpahimmiya m-baŋ yi galimi ni yi shɛl’ na, ka niŋ tuuba n-lan lab’ yi tuuli yurilim la ni yaha. Di yi pa lala n ni kana nti kpuɣi yi firilatamdigu la di zaashee.

⁶Amaa yi ni naɣ’ niŋdi zaɣ’ viɛl’ shɛli m-bɔŋɔ: Yi je Nikolaus nyaanzaaniba tuma kaman man’ gba ni je li shɛm.

⁷ “Ŋun mali tibili, ŋun’ wummi Naawuni Shia Kasi ni yɛli cheechinim’ shɛm! “Ŋun di nasara, n ni ti chɛ ka o di nyɛvili ti’ shɛli din be Naawuni yil’ la wala.

⁸ “Sabimi n-ti Smɛɛna Cheechi malaika n-yɛl’ o ni ŋun nyɛ piligu ni bahigu ka nyɛ ŋun daa kpi ka lan nee’ la ni yɛli shɛm m-bɔŋɔ:

⁹M mi yi wahala dibu ni yi fara yɛla, amaa yinima n-lee nyɛ azichinima. Ka lan mi ninvuɣ’ shɛb’ bɛn tɔɣisiri yɛtɔɣ’ biɛri n-jɛndiri ya, ka yɛri ni bɛ nyɛla Yɛhudianim’ la gba yɛla. Bɛ pala Yɛhudianima, amaa bɛ nyɛla Sintani jɛmdiba.

¹⁰Di zɔriya yi ni yɛn nya nahiŋgu shɛli. Nyamiya, Sintani ni ti kpɛhi yi ni shɛb’ sarika n-zahim ya, ka yi ni nya nahiŋgu biɛɣ’ pia. Ka ŋun ʒe yim hal ti paai kum, n ni ti o nyɛvili nam zuɣupiligu.

¹¹ “Ŋun mali tibili, ŋun’ wummi Naawuni Shia Kasi ni yɛli cheechinim’ shɛm! “Ŋun di nasara ti ku lan kpi kum din pahi buyi la yaha.

¹²“Sabimi n-ti Pɛɛgamum Cheechi malaika n-yɛl’ o ni ŋun mali takɔb’ dirili din mali naŋgbana ayi la ni yɛli shɛm m-bɔŋɔ:

¹³M mi ni yi ni be luɣ’ shɛli nimaani ka Sintani nam ʒiishee be. Hal ka bɛ daa ti gbaai n shɛhiralana Antipas ŋun daa ʒe ma yim yi ni la n-ku o Sintani biɛhigu shee, amaa ka yi na kul ʒe ma yim ka bi chɛ ma dolibu.

¹⁴ Amaa yɛl’ shɛŋa zuɣu ka n naɣ’ galim ya: Yi ni shɛb’ dolila Balaam wuhibu. Ŋuna n-daa wuhi Balak ka o bo kuɣituurili sɔŋ Izraɛlnim’ sol’ zuɣu ni bɛ di buɣa maligu nimdi ka tum zina la.

¹⁵Ka yi ni shɛb’ mi doli Nikolaus nyaanzaaniba wuhibu din nyɛ n ni je shɛl’ la.

¹⁶Dinzuɣu niŋmiya tuuba! Di yi pa lala, di ku yuui ka n ka yi sanna nti zaŋ n nol’ ni takɔb’ la tuhi bɛn niŋdi lala maa tɔbu.

¹⁷ “Ŋun mali tibili, ŋun’ wummi Naawuni Shia Kasi ni yɛli cheechinim’ shɛm! “Ŋun di nasara, n ni chɛ ka o di bindir’ sɔɣira la shɛli, ka lan zaŋ kuɣ’ piɛlli ti o, ka yu’ palli sabi pa di zuɣu; ka so ku baŋ yuli maa naɣila ŋun dee’ li maa kɔŋko.”

¹⁸“Sabimi n-ti Taiatira Cheechi malaika n-yɛl’ o ni Naawuni Bia ŋun nina ŋmani buɣim zilinli ka o napɔnvari nyɛlisiri kaman daanya viɛlli la ni yɛli shɛm m-bɔŋɔ:

¹⁹“M mi yi tuma ni nyɛ shɛm. M mi yi yurilim mini yi yɛda niŋbu ni yi ni tumdi shɛlikam n zuɣu zaŋ tabili yi daania niŋbu yɛla, ka lan mi yi pumpɔŋɔ tuma ni gari yi tuuli tuma shɛm la gba yɛla.

²⁰ Amaa yɛl’ yini zuɣu ka n naɣ’ galim ya: Yi ni wum ti paɣ’ so ŋun bol’ omaŋa anabi ka o yuli booni Jɛzibɛl la zuɣu. O nyɛla ŋun yɔhindi n jɛmdiba n-wuhiri ba ka bɛ niŋdi zina, ka diri buɣa maligu nimdi.

²¹N daa ti o dahima ni o niŋ tuuba o zina niŋbu maa zuɣu, amaa ka o zaɣisi tuuba maa niŋbu.

²²Nyamiya, n ni vil’ o bahi o bindoo zuɣu, ka o mini bɛnkam niŋ o zina ni nya wahala pam naɣila bɛ niŋla tuuba bɛ ni tum shɛm o sani maa zuɣu.

²³ Di nyaaŋa n ni ku paɣ’ maa bihi, ka cheechinim’ zaa baŋ ni mani n-nyɛ ŋun vihiri baŋdi din be salinim’ suhuri ni mini bɛ tɛha ni, ka nyɛ ŋun ni ti yi zaa yinoyino yi tuma ni simdi shɛm laara.

²⁴“Amaa yinim’ Taiatiranim’ bɛn kpalim ka bi doli wuhibu maa, ka mi na bi bɔhim bɛ ni shɛb’ ni booni shɛli Sintani ashili yɛl’ kara tuma la, n yɛri ya mi ni n ku zaŋ ʒi’ tibisi’ shɛli n-ʒili ya.

²⁵Dinzuɣu kul gbibiya yi ni pun mali shɛl’ la kirikiri hal ka n ti kana.

²⁶ Ŋun di nasara ka tumdi n yubu hal nti paai di bahigu, n ni ti o yiko ka o su zuliya paai shɛm fukumsi.

²⁷Ka o ni zaŋ kurigu jaaŋgbee n-su ba, ka to n-wurim ba kaman yaɣiri duɣiri ni ŋmari n-wurisiri shɛm la, ka o yiko maa ni be kaman mmaŋmaŋ’ gba ni daa deei yiko shɛli m Ba Naawuni san’ la;

²⁸ka n ni lan ti o biɛŋmariga pahi.

²⁹“Ŋun mali tibili, ŋun’ wummi Naawuni Shia Kasi ni yɛli cheechinim’ shɛm!”