Read Dagbani Kahigibu 20 Bible Online

Kahigibu 20 - Dagbani bible

Kahigibu 20

¹Ka n daa nya malaika so ka o yi alizanda ni na n-gbib’ bɔɣ’ zilinli din ziliŋ ka tariga la saafɛbia mini zoligo titali o nuu ni.

² Ka o daa gbaai waɣ’ biɛ’ titali ŋun nyɛ kurimbuni ha waɣ’ so bɛ ni booni Fiɣisira ni Sintani la n-lo o ni o sɔŋ yuun’ tuhili,

³ka daa zaŋ o niŋ bɔɣ’ zilinli din ziliŋ ka tariga la ni, ka yo li n-kpar’ o niŋ di ni ni o di lan yɔhim zuliya kam hal ti paai yuun’ tuhili maa tariga. Dimbɔŋɔ nyaaŋa di nyɛla talahi ni bɛ ti lan yoog’ o bahi biɛla.

⁴ Di saha ka n daa nya nam ʒiishɛhi, ka bɛ daa zaŋ saria dibu fukumsi n-niŋ bɛn ʒi nimaani nuu ni. Ka n daa lan nya bɛ ni daa ŋma ninvuɣ’ shɛb’ zuɣuri Yisa shɛhira niŋbu mini Naawuni yɛligu zuɣu ni bɛn daa bi jɛm biŋkɔbigu la bee o binnan’ la, ka mi daa bi saɣi deeg’ o dalinli la bɛ gbiɛri zuɣu bee bɛ nuhi ni la; ka bɛ neei kum ni ni bɛ mini Masia laɣim di nam yuun’ tuhili.

⁵Ka kpiin’ shɛb’ bɛn kpalim bɛn’ bi neei kum ni hal ti paai yuun’ tuhili maa tariga. Dimbɔŋɔ n-nyɛ kum ni neebu din daŋ tooni la.

⁶Ninvuɣ’ shɛb’ bɛn ti yɛn neei kum ni tuuli kpiimba kum ni neebu la saha nyɛla Naawuni ni niŋ alibarika niŋ shɛb’ ni ka bɛ be kasi. Ka kum din pahi buyi la lan ka bɛ yiko, ka bɛ ni leei Naawuni mini Masia maligumaaniba, ka bɛ min’ o ni ti laɣim di nam yuun’ tuhili.

⁷Yuun’ tuhili maa tariga yi ti paai, Naawuni ni chɛ ka bɛ yooi Sintani o sarika maa ni bahi

⁸ ka o yina nti yɔhim zuliya kam bɛn be dunia luɣ’ anahi ŋɔ ni. Bɛna n-nyɛ bɛ ni booni shɛb’ Gɔg mini Magɔg. O ni ti laɣim ba lo tɔbu; ka bɛ kalinli ni ŋmanila mɔɣ’ bihigu.

⁹Ka bɛ yiɣisi zani n-yɛrigi luɣilikam chaŋ ti teei gili Naawuni ninvuɣ’ gahinda biɛhigu shee mini Naawuni tin’ yurigu la; ka buɣim ti yi zuɣusaa na ti di ba.

¹⁰Ka Naawuni ni chɛ ka bɛ gbaai Sintani ŋun yɔhindi ba maa n-zaŋ o bahi buɣim teeku din nyɛ chilibi buɣim ni, luɣ’ shɛli biŋkɔbigu la min’ o daanabi ʒirilan’ la ni pun be, ka bɛ ni nyari nahiŋgu yuŋ ni wuntaŋ’ ni hal ni saha din ka bahigu.

¹¹Di saha ka n daa nya nam ʒiishe’ titali din nyɛ zaɣ’ piɛlli ka lan nya ŋun ʒi nimaani, ka tiŋgbani mini sagbana daa laligi ka chɛ o, ka so bi lan nya li yaha.

¹² Ka n daa nya kpiimba bɛn nyɛ wɔɣira mini tarimba ka bɛ ʒe nam ʒiishee maa tooni, ka litaafinim’ bɔɣi doya. Ka litaafi shɛli din nyɛ nyɛvili litaafi la gba bɔɣi doya. Ka o daa mali sabbu din be litaafinim’ maa puuni n-kariti kpiimba maa saria zaŋ chaŋ bɛ ni daa tum tuun’ shɛŋa polo.

¹³Ka teeku daa yihi kpiimba bɛn be di ni na, ka Kum mini Kpiimba Biɛhigu Shee yihi kpiimba bɛn be di ni na, ka o daa zaŋ bɛ zaa ni tum tuun’ shɛŋa n-kari ba saria.

¹⁴Ka daa zaŋ Kum mini Kpiimba Biɛhigu Shee maa bahi buɣim teeku ni. Buɣim teeku maa ni kpɛbu n-nyɛ kum din pahi buyi la.

¹⁵Ka o daa zaŋ ŋunkam yuli bi sabi nyɛvili litaafi la ni gba bahi buɣim teeku maa ni.