Read Dagbani Kahigibu 22 Bible Online

Kahigibu 22 - Dagbani bible

Kahigibu 22

¹ Di saha ka malaika maa daa wuhi ma nyɛvili kom mɔɣili, ka di zɔri yiri Naawuni mini Piɛbil’ maa nam ʒiishee la gbin’ na n-doya nyaɣisiri kaman diɣi la.

² Di daa zɔri dolila tiŋ’ maa puuni solɔɣu sunsuuni, ka bɛ ni booni ti’ shɛli nyɛvili tia la sa n-doli mɔɣili maa yaɣa ayi zaa, ka wala balibu pinaayi be di zuɣu, ka di wandi goli kam, ka di vari mi nyɛ din tibiri zuliya kam.

³ Naawuni noli ni di binshɛɣukam ti ku be tiŋ’ maa ni. Kulla Naawuni mini Piɛbil’ maa nam ʒiishee la n-yɛn beni, ka o daba ni jɛmd’ o.

⁴Bɛ ni ti nya o ninni, ka o yuli ni ti sab’ pa bɛ gbiɛri zuɣu.

⁵ Yuŋ ti ku lan beni; bɛ mi ti ku bɔri firila bee wuntaŋ’ neesim, dama ti Duuma Naawuni maŋmaŋa nti yɛn nyɛ bɛ neesim, ka bɛ ni ti di nam hal ni saha din ka bahigu.

⁶Ka malaika maa daa yɛli ma, “Yɛligu ŋɔ nyɛla nir’ ni ni ti niŋ shɛli naani ni din nyɛ yɛlimaŋli. Ka ti Duuma Naawuni ŋun zaŋd’ o Shia n-niŋd’ o daanabinim’ ni daa tim o malaika na ni o ti wuh’ o jɛmdiba din yɛn niŋ ka di ku yuui.”

⁷Ti Duuma Yisa yɛliya, “Nyama, di ku yuui ka n kana! Ninvuɣ’ shɛb’ bɛn doli anabitali yɛligu din be litaafi ŋɔ ni mal’ alibarika.”

⁸Man’ Jɔn n-nyɛ ŋun daa wum yɛla ŋɔ, ka nya dimbɔŋɔnima. N ni daa wum li ka nya li maa, ka n daa gbani malaika so ŋun wuhi ma binyara maa tooni ni n jɛm o;

⁹amaa ka o yɛli ma, “Di niŋ lala! N nyɛla a min’ a mabihi bɛn nyɛ anabinima ni bɛn dol’ litaafi ŋɔ puuni yɛligu la dab’ kpee. Jɛmmi la Naawuni!”

¹⁰Ka o daa lan yɛli ma, “Di zaŋ binshɛɣu n-tabili limsi anabitali yɛligu din be litaafi ŋɔ ni, dama saha miriya.

¹¹ Ŋunkam tumdi tuumbiɛri, ŋun’ na kul be tuumbiɛri maa tumbu ni; ka ŋunkam mali tabizahim, ŋun’ na kul be o tabizahim tuma maa ni; ka ŋunkam nyɛ wuntizɔra, ŋun’ na kul be din tuhi tumbu ni; ka ŋunkam mi be kasi, ŋun’ na kul kpalimmi be kasi.”

¹² Ti Duuma Yisa yɛliya, “Nyama, di ku yuui ka n kana, ka mali laara na ni n ti ti sokam kaman o tuma ni simdi shɛm!

¹³ N nyɛla Alfa mini Omega. Di gbinni nyɛla ŋun daŋ tooni ni ŋun bahindi nyaaŋa ni ŋun lan nyɛ piligu ni bahigu.”

¹⁴ Ninvuɣ’ shɛb’ bɛn paɣi bɛ binyɛra ni bɛ ti mali soli din ni chɛ ka bɛ di nyɛvili tia la wala, ka doli tiŋ’ la dunoya kpe di ni la mal’ alibarika.

¹⁵Amaa bɛn ti yɛn be tiŋ’ maa kpaŋa ti yɛn nyɛla bahi mini baɣisi ni zinaniŋdiba ni ninvuɣ’ kuriba ni buɣijɛmdiba ni bɛnkam yuri ʒiri, ka lan nyɛ ʒiŋmariba la.

¹⁶ “Man’ Yisa n-tim m malaika ni o zaŋ yɛligu ŋɔ na nti ti cheechinima. N nyɛla Naa Dauda yaaŋa ni biɛŋmariga ŋun ne.”

¹⁷ Ka Naawuni Shia Kasi mini Amiliya maa yɛli, “Kamina!” Ŋunkam wum dimbɔŋɔ, ŋun’ gba yɛlima, “Kamina!” Ka kɔnyuri ni mali sokam mini ŋun bɔri nyɛvili kom, ŋun’ kamina nti dee’ li yoli.

¹⁸Man’ Jɔn kpahiri ŋunkam wum anabitali yɛligu din be litaafi ŋɔ ni zuɣu ni: Ŋunkam pahi shɛli di ni, Naawuni ni zaŋ alɔbo balibu kam din sab’ litaafi ŋɔ ni la m-pah’ o tibidarigibo zuɣu;

¹⁹ ka so mi yi yihi shɛli anabitali yɛligu din be litaafi ŋɔ ni, Naawuni ni yih’ o tarili nyɛvili tia la mini tiŋ’ kasi shɛli din yɛla sab’ litaafi ŋɔ ni la ni.

²⁰Ŋun di dimbɔŋɔnim’ shɛhira maa yɛliya, “Yɛlimaŋli, di ku yuui ka n shiri kana!” Ami! Chɛ ka di niŋ lala. Kamina, ti Duuma Yisa!

²¹Ti Duuma Yisa daalibarika kpalimmi be yi zaa ha ni! Ami.