Read Dagbani Kahigibu 3 Bible Online

Kahigibu 3 - Dagbani bible

Kahigibu 3

¹Sabimi n-ti Saadis Cheechi malaika n-yɛl’ o ni ŋun mali Naawuni shih’ ayopɔin mini saŋmaris’ ayopɔin la ni yɛli shɛm m-bɔŋɔ: “M mi yi tuma ni nyɛ shɛm. Yi mali yuli din wuhiri ni yi ne, amaa yi kpimi.

²Neemiya n-kpaŋsi din kpalim be yi ni n-yɛn kpi maa, dama n nya ka yi tuma bi be dɛde n Duuma Naawuni sani.

³ Teemiya yi ni daa wum shɛli mini yi ni daa deei shɛl’ la yɛla, ka niŋya tuuba ka gbib’ li. Yi yi ku neei, n ni ka yi sanna kaman tayiɣa la, ka yi ku baŋ n kandina saha.

⁴Amaa niriba biɛla be yinim’ Saadisinim’ ni n-na bi gabisi bɛ binyɛra. M mini ba ni ye binyɛr’ piɛla n-laɣim dol’ taba, dama bɛ simdi lala.

⁵ Ŋun di nasara ni ti ye binyɛr’ piɛla ŋɔ tatabo, ka n ku kpihim o yuli nyɛvili litaafi ni; amaa ka ni ti zan’ o nyaaŋa m-bol’ o yuli m Ba Naawuni min’ o malaikanim’ sani.

⁶Ŋun mali tibili, ŋun’ wummi Naawuni Shia Kasi ni yɛli cheechinim’ shɛm!”

⁷ “Sabimi ti Filadɛlfia Cheechi malaika n-yɛl’ o ni ŋun be kasi ka nyɛ yɛlimaŋlilana, ka mali Naa Dauda saafɛbia, ka nyɛ ŋun ni yooi ka so ku tooi daai yo, ka ni yo ka so ku tooi yoo’ la ni yɛli shɛm m-bɔŋɔ:

⁸M mi yi tuma ni nyɛ shɛm. Nyamiya, n yoola dunoli n-tin ya, ka so ku tooi daa’ li yo. M mi ni yi yiko bi yaɣ’ lala, amaa di zaa yoli yi kul gbibi n yɛligu ka bi chihi n yuli.

⁹ Nyamiya, Sintani jɛmdiba bɛn yɛli ni bɛ nyɛla Yɛhudianima amaa ka pa Yɛhudianim’ la nyɛla ʒiŋmariba. N ni chɛ ka bɛ kana nti gbani yi tooni m-baŋ ni n yuri ya.

¹⁰Yi ni zaŋ suɣilo n-niŋ ania gbibi n yɛligu maa zuɣu, n ni ti yihi ya muɣisigu shɛli din yɛn paai dunia ŋɔ nim’ zaa la ni.

¹¹Di ku yuui ka n kana; gbib’ a ni mali shɛli kirikiri ka so ti ku fa a nam zuɣupiligu.

¹² Ŋun di nasara, n ni zaŋ o leei n Duuma Naawuni jɛmbu duu daantaliga, ka o ku lan yi di ni yaha. Ka n ni sabi n Duuma Naawuni yuli min’ o tiŋa din nyɛ Jɛrusalɛm palli n-yi ŋun’ Naawuni sani alizanda ni na la yuli ni mmaŋmaŋ’ yu’ palli tabil’ o.

¹³Ŋun mali tibili, ŋun’ wummi Naawuni Shia Kasi ni yɛli cheechinim’ shɛm!”

¹⁴ “Sabimi n-ti Laodisia Cheechi malaika n-yɛl’ o ni ŋun nyɛ Ami, ka be tibi, ka nyɛ yɛlimaŋli shɛhiralana ni ŋun daa tab’ Naawuni binshɛɣukam nambu ni la ni yɛli shɛm m-bɔŋɔ:

¹⁵M mi yi tuma ni nyɛ shɛm. Yi bi maha, yi mi bi tula. N di bɔri ka yi mahimi bee n-tula!

¹⁶Dinzuɣu yi ni tulila zaliŋ, ka bi tuli viɛnyɛliŋga ka mi bi mahi la zuɣu, n ni tuhi ya n nol’ ni bahi.

¹⁷Dama yi yɛliya, ‘Ti tɔŋya; ti nyɛla azichilaannima ka bi lan bɔri shɛli.’ Amaa ka bi mi ni yi nyɛla nandahimanim’ mini nambɔ’ niriba ni faranima ni zoomba ni bɛn chani bɛ zaɣim.

¹⁸Dinzuɣu n kpamdi ya jaande ni yi dam’ salima n sani, salin’ shɛŋa din she buɣim ni m-paɣ’ neei, ka di chɛ ka yi shiri niŋ azichinima. Ka danya binyɛr’ piɛla n sani ye n-yi yi zaɣimtali maa vi ni, ka danya nina tim din nyɛ kpam ʒe yi nina, ka di chɛ ka yi ne.

¹⁹ N ni yuri shɛba, bɛna ka n saɣisiri ka darigiri bɛ tiba; dinzuɣu moomiya yi nini niŋ tuuba.

²⁰Nyamiya, n ʒiɛla dunol’ ni n-niŋdi gaafara, ka ŋun wum n kukoli ka yooi, n ni kpe dilan’ sani ka m min’ o ti laɣim di.

²¹“Ŋun di nasara, n ni chɛ ka m min’ o laɣim ʒini n nam ʒiishee kaman n gba ni daa di nasara ka m mini m Ba Naawuni laɣim ʒi o nam ʒiishee shɛm la.

²²“Ŋun mali tibili, ŋun’ wummi Naawuni Shia Kasi ni yɛli cheechinim’ shɛm!”