Read Dagbani Kahigibu 8 Bible Online

Kahigibu 8 - Dagbani bible

Kahigibu 8

¹Piɛbil’ maa ni daa ti tabigi bintabinda maa ni din pah’ ayopɔin saha shɛli, di daa niŋ kaman awa pirigili ka alizanda ni binshɛɣukam kul fomi chichi.

²Di saha ka n daa nya ka bɛ zaŋ kikahi ayopɔin ti malaikanima ayopɔin bɛn ʒe Naawuni tooni.

³ Ka n daa nya malaika so mi ka o gbibi salima laa n-chaŋ ti zani bimbin’ gbini. Ka bɛ daa zaŋ tulaale zim pam ti o ni o zaŋ pahi Naawuni ninvuɣ’ gahinda zaa wunsuhigu ni n-zaŋ pa salima bimbin’ shɛli din be nam ʒiishee maa tooni zuɣu n-zaŋ li garigari taba.

⁴Ka tulaale zim maa nyɔhi mini Naawuni ninvuɣ’ gahinda wunsuhigu maa yi malaika ŋun daa ʒe Naawuni tooni maa nuu ni n-kpuɣ’ du zuɣusaa.

⁵ Di saha ka malaika maa daa zaŋ tulaale laa maa m-mooi bimbini maa zuɣu buɣim m-pal’ li n-zaŋ kpaai bahi dunia ni, ka saa daa gbaai nyaɣisibu ni tahibu, ka vuri yiɣisi mɔni ka tiŋgbani damda.

⁶Di saha ka malaikanima ayopɔin shɛb’ bɛn daa mali kikah’ ayopɔin la niŋ shili ni bɛ piɛb’ bɛ kikahi maa.

⁷ Ka tuuli malaika daa piɛb’ o kikaa, ka sakuɣa mini buɣim ni ʒim daa gari taba luri dunia ni, ka dunia tiŋgbani pirigibu ʒii buta puuni yim di buɣim, ka tihi pirigibu ʒii buta puuni yim di buɣim, ka momaha zaa di buɣim.

⁸Ka malaika ŋun pah’ ayi daa piɛb’ o kikaa, ka binshɛɣu din be kaman zo’ titali ka buɣim diri di zuɣu la yiɣ’ ti lu teeku ni.

⁹Ka teeku maa kom pirigibu ʒii buta puuni yim leei ʒim, ka teeku maa ni binnɛma zaa pirigibu ʒii buta puuni yim kpi, ka ŋarima din daa pa teeku maa kom zuɣu diba ata kam puuni zaɣ’ yini saɣim.

¹⁰ Ka malaika ŋun pah’ ata daa piɛb’ o kikaa, ka saŋmar’ titali ŋun ne kaman buɣim mokpalli la yi zuɣusaa n-lu mɔɣa ata kam zaɣ’ yin’ ni mini kɔbilisi ni.

¹¹ Saŋmariga maa yuli daa boonila “Yabiga.” Ka kom pirigibu ʒii buta puuni yim leei kɔtɔɣu yabiga maa zuɣu, ka niriba pam daa nyu li ka kpi, kom maa ni daa to maa zuɣu.

¹² Ka malaika ŋun pah’ anahi daa piɛb’ o kikaa, ka wuntaŋ’ pirigibu ʒii buta puuni yim sabigi, ka goli pirigibu ʒii buta puuni yim sabigi, ka saŋmarisi pirigibu ʒii buta puuni yim sabigi, ka bɛ neesim pirigibu ʒii buta puuni yim sabigi, ka wuntaŋ’ ni neesim pirigibu ʒii buta puuni yim zibigi, ka di daa niŋ lala yuŋ gba.

¹³Di saha ka n daa lihi ka wum ka tɔrili be zuɣusaa yiɣiri ka kuhiri pampam yɛra, “Mbusim, mbusim, mbusim be dunianim’ zuɣu, malaikanima ata shɛb’ bɛn kpalim n-na yɛn piɛb’ bɛ kikahi la zuɣu!”