Read Dagbani Rut 1 Bible Online

Rut 1 - Dagbani bible

Rut 1

¹Izraɛlnim’ ni daa na ka naa ka sariakaritiba n-gbib’ ba saha shɛl’ la, ka kum daa ti lu bɛ tiŋgbɔŋ maa ni. Ka do’ so ŋun daa yi Ɛfirat zuliya ni na, ka be Bɛtilihɛm Juda tiŋgbɔŋ ni ka o yuli booni Ɛlimɛlɛk la min’ o paɣ’ Naomi ni o bidibis’ ayi Malɔn mini Kiliɔn daa yiɣisi chaŋ ti ʒini Mɔab tiŋgbɔŋ ni. Bɛ ni daa be nimaani saha shɛli maa,

³ka Ɛlimɛlɛk daa ti kpi ka chɛ Naomi min’ o bidibis’ ayi maa kɔŋko.

⁴Ka o bidibis’ ayi maa daa kpuɣi Mɔab paɣiba. Paɣiba maa yuya n-daa booni: Opa ni Rut.

⁵Bɛ daa bela nimaani kaman yuun’ pia, ka Malɔn mini Kiliɔn gba daa ti kpi ka chɛ Naomi ka o kpalim’ o kɔŋko ka lan ka yidana bee bihi.

⁶Ka Naomi daa ti wum ni Naawuni niŋ alibarika niŋ ŋun’ Naawuni niriba ni, ka chɛ ka bɛ puri atam niŋ pam, ka o daa mali shili ni o min’ o bihi paɣiba la yiɣisi Mɔab tiŋgbɔŋ maa ni kul’ o ya.

⁷Ka bɛ daa yiɣisi n-laɣim gbaai soli kuni Juda tiŋgbɔŋ ni. Amaa ka bɛ daa ti yi soli ha,

⁸ka Naomi yɛli ba, “Labimiya kuli yi manim’ sani. Yawɛ ŋɔ niŋmi ya nirilim kaman yi ni niŋ m mini yi yidaannim’ bɛn kpi la nirilim shɛm la.

⁹Yawɛ chɛ ka yi zaa yinoyino nya biɛhigu shee yi yidaannim’ yinsi.” Ka Naomi daa chɛbisi ba ka ŋmaligi. Ka paɣiba ayi maa zaa dii kuhiri

¹⁰ka yɛl’ o, “Aai! Ti ni dol’ a kul’ a niriba sani.”

¹¹Amaa ka Naomi yɛli ba, “M bihi, labimiya kuli.” Ka bɔhi ba, “Bɔzuɣu ka yi bɔri ni yi doli ma kuli? Yi tɛhiya ni n ni lan tooi dɔɣi bidibisi yaha ka yi kuli ba?

¹²Labimiya kuli, dama n kurigiya pam ni doo kulibu. Ka hal n yi tɛhi ni tahima na ni beni, ka kul’ doo yuŋ ŋɔ gba n-dɔɣi bidibisi,

¹³yi ni guhi hal ni bɛ ti zooi bi dɔbba? Ka dimbɔŋɔ zuɣu ni chɛ ka yi ku kuli dɔb’ shɛba? Aai, m bihi, yi mi ni dimbɔŋɔ ku tooi nani. Yawɛ ni niŋ ma shɛm maa biɛri ma pam yi zuɣu.”

¹⁴Di saha ka paɣiba maa daa lan kum pam. Ka Opa ŋun’ daa chɛbisi Naomi ka ŋmaligi kuli, amaa ka Rut ŋun’ zaɣisi ka kul doli Naomi.

¹⁵Ka Naomi daa yɛl’ o, “Rut, nyama, a kpee maa lab’ o niriba min’ o wuna sani, dinzuɣu a gba dol’ o labi.”

¹⁶Amaa ka Rut daa yɛli Naomi, “Di yɛri ma ni n labimi ka chɛ a, dama a ni kuni shɛli, nimaani ka n kuna, ka a ni kpɛri shɛli, nimaani ka n gba yɛn kpe. A niriba ni leei n niriba, ka a Naawuni leei n Naawuni.

¹⁷A ni yɛn kpi shɛli, nimaani ka n gba yɛn kpi ka bɛ sɔɣi ma. N yi chɛ ka binshɛli woligi m min’ a ka pa ni kum, Yawɛ ŋun’ darigim’ n tibili!”

¹⁸Naomi ni daa nya ka Rut shiri bɔri ni o dol’ o kuli ni o suhu zaa maa zuɣu, ka o daa shini ka bi lan yɛli shɛli.

¹⁹Ka bɛ niriba ayi maa daa gbaai chandi hal ti paai Bɛtilihɛm. Bɛ ni daa paai maa, di daa garila tiŋ’ maa nim’ zaa ka bɛ damna, ka paɣiba ti bɔhira, “Naomi m-bala?”

²⁰Ka o yɛli ba, “Di lan booni ya ma Naomi, amaa bolimiya ma la Mara,[1] dama Kpiɔŋlan’ Naa chɛ ka n nya naŋgbantom.

²¹N daa ʒila niriba pam yi kpe chaŋ, amaa ka Yawɛ ti chɛ ka n labimina ni nuzaŋa. Ŋun’ Yawɛ n-chɛ ka yɛla ŋɔ zaa paai ma, ka wula ka yi lan booni ma Naomi?”

²²Naomi min’ o bia paɣ’ Rut ŋun daa nyɛ Mɔab paɣ’ la ni daa yi Mɔab tiŋgbɔŋ ni n-kuli Bɛtilihɛm na shɛm m-bala. Chi mi chɛbu piligibu saha ka bɛ daa paai Bɛtilihɛm maa.