Read Dagbani Rut 3 Bible Online

Rut 3 - Dagbani bible

Rut 3

¹Dahin shɛli ka Rut yidan’ ma Naomi daa ti yɛl’ o, “Di simdi ni m bo soli n-sɔŋ a ka a nya doo kuli, ka di chɛ ka a gba mal’ a dintoli biɛhigu shee.

²Teemi ni a ni daa doli Bɔaz so paɣisara yihiri kayiha la nyɛla ti dɔɣira. Wumma, yuŋ ŋɔ o ni be kabɔɣili ni m-buri chi.

³Dinzuɣu sum’ kom n-niŋ tulaale niŋ a ni, ka zaŋ a situr’ suma so n-chaŋ o ni be luɣ’ shɛli yeeni o chi maa. Amaa di chɛ ka o baŋ ni a be nimaani hal ka o ti di ka nyu n-naai.

⁴O yi ti dɔni, nyin’ kpahimmi baŋ o ni dɔni luɣ’ shɛli maa, ka o ti ʒeei gom bahi ka a chaŋ o naba polo ti viig’ o chinchini baalim ka dɔni o naba tiŋli. O ni ti wuh’ a a ni yɛn niŋ shɛm.”

⁵Ka Rut yɛli, “N ni niŋ a ni yɛl’ shɛlikam maa zaa.”

⁶Ka Rut daa chaŋ kabɔɣili maa ni nti shiri niŋ kaman o yidan’ ma maa ni daa wuh’ o ni o niŋ shɛm maa.

⁷Ka Bɔaz daa ti di ka nyu n-naai, ka o suhu dɔni luɣ’ yini, ka o chaŋ kaʒee gbini ti dɔni ni o gbihi. Ka di daa tooi biɛla ha, ka Rut ti puɣisi chaŋ o naba polo ti viig’ o chinchini baalim ka dɔni o naba tiŋli.

⁸Ka Bɔaz daa ti neei kaman yuntisuɣu saha n-lɛbig’ omaŋ’ tuug’ o ka di gar’ o, o ni nya ka paɣ’ do o naba tiŋli maa zuɣu.

⁹Ka o bɔhi, “Ŋuni n-lee bala?” Ka o garigi yɛli, “N dana, man’ Rut m-bala. Kpuɣim’ ma leeg’ a paɣa, dama a nyɛla n dɔɣira ŋun ni tooi gbib’ ma.”

¹⁰Ka Bɔaz yɛl’ o, “Yawɛ niŋm’ alibarika niŋ a ni. Hal a ni niŋ nirilim shɛli pumpɔŋɔ ŋɔ gar’ a ni pun niŋ a yidan’ ma nirilim shɛl’ la. A naan tooi chaŋ ti bo nachimbil’ so ŋun nyɛ bundana bee faralana, amaa a bi niŋ lala.

¹¹M bia, di chɛ ka a suhu zɔhira. N ni niŋ a ni yɛli shɛlikam maa zaa, dama ŋunkam be ya ŋɔ mi ni a nyɛla paɣ’ so ŋun mali biɛrisuŋ.

¹² Di nyɛla yɛlimaŋli ni n nyɛla a dɔɣim puuni ninvuɣ’ so ŋun su a gbibbu fukumsi, amaa ninvuɣ’ so ŋun nyɛ dɔɣim maa puuni nira ka miri dɔɣim maa gari ma gba beni.

¹³Gbɛm’ kpe yuŋ ŋɔ, ka di sa neei ka ti nya dilan’ ni saɣi tum di tuma bee o ku saɣi. O yi saɣi ni o ni niŋ li, di viɛla, ka o yi bi saɣi, dindina m-po Yawɛ ŋun be ŋɔ ni n ni tum di tuma maa. Dinzuɣu dɔnimi ka biɛɣ’ neei.”

¹⁴Ka o daa dɔni o naba tiŋli maa, amaa ka daa ti daŋ yiɣisibu asibaasi ŋaraŋara saha shɛli so ni ku tooi nya o baŋ o, dama Bɔaz daa bi bɔri ni so baŋ ni o ka nimaani na.

¹⁵Ka Bɔaz daa yɛli Rut, “Pirigim’ a ni ye binyɛr’ shɛli pa zuɣusaa ŋɔ n-teei li sɔŋ.” Ka o daa pirigi li na, ka o tooi chi ka di ni paai kaman kilɔgiram pisi n-kpaai niŋ o di ni, ka kpuɣi li sɔŋ o ka o ʒi li kuli.

¹⁶O ni daa mali ti paai yiŋa, ka o yidan’ ma bɔh’ o, “M bia, ka di nyɛ wula zaŋ chaŋ a polo?” Ka Rut daa yɛl’ o Bɔaz ni yɛl’ o shɛlikam zaa.

¹⁷Ka lan yɛli, “O yɛli ma ni di bi simdi ni n lab’ kuna ni nuzaŋa, ka zaŋ chi ŋɔ zaa ti ma.”

¹⁸Ka Naomi yɛli Rut, “M bia, guhimi nya yɛla maa zaa ni yɛn bahindi shɛm. Doo maa ku vuhi ka pa ni o nyala yɛla maa kpaa shee zuŋɔ.”