Read Dagbani 1 Samuɛl 1 Bible Online

1 Samuɛl 1 - Dagbani bible

1 Samuɛl 1

¹Ifriim zuliya ni do’ so daa beni ka o yuli booni Ɛlikana, ka o daa be zoya ni tin’ shɛli din yuli booni Rama, ka di be Ifriim tiŋgban’ ni la. O daa nyɛla Jɛrɔham bia, ka Jɛrɔham daa nyɛ Ɛlihu bia, ka Ɛlihu daa nyɛ Tɔhu bia, ka Tɔhu mi nyɛ Zuf ŋun daa nyɛ Ifriim zuliya ni nir’ la bia.

²Ɛlikana daa malila paɣiba ayi, yino yuli daa boonila Hanna, ka ŋun’ la mi yuli booni Pɛnina. Pɛnina n-daa nyɛ ŋun dɔɣi bihi, amaa ka Hanna ŋun’ daa bi dɔɣi bia.

³Yuuni kam Ɛlikana daa yi yirila o ya n-chani Shilo ti jɛmdi Yawɛ ŋun nyɛ Tɔbbihi Naa ŋɔ, ka maani sara nimaani. Ɛli bihi ayi bɛn yuya daa booni Hofini ni Finɛhas la n-daa nyɛ Yawɛ maligumaaniba nimaani.

⁴Ɛlikana daa yi kɔrigi binshɛli m-mali sara dahin’ shɛli o ŋmahirila nimdi tar’ o paɣ’ Pɛnina min’ o bidibisi ni o bipuɣinsi zaa.

⁵Hal o ni daa kul yur’ o paɣ’ Hanna maa zaa yoli, o daa kul ŋmaarila ninvuɣ’ yino kɔŋko tarili tir’ o, dama Yawɛ daa na bi ti o bia.

⁶Ka o nyintaa daa yi kur’ o suli pam n-chɛ ka o suhu yiɣisira, Yawɛ ni daa bi ti o bia maa zuɣu.

⁷O daa kul niŋd’ o la lala yuuni kam. Bɛn dee daa yi kul chaŋ Yawɛ jɛmbu duu maa ni, o ni bahi miligi Hanna suhu ka o kum hal ti bi di bindirigu.

⁸Ka o yidan’ Ɛlikana daa bɔh’ o “Hanna, bɔ n-niŋ ka a mali suhugarigu, ka kumdi hal ti zaɣisi bindirigu? M bi gari bihi pia a sani?”

⁹Bɛ ni daa di bindirigu ka nyu n-naai Shilo maa nyaaŋa, ka Hanna suhu daa saɣim pam ka o yiɣisi chaŋ Yawɛ tooni ti suh’ o, ka kum pam. Di saha Ɛli ŋun daa nyɛ maligumaana la daa ʒila kuɣ’ zuɣu Yawɛ jɛmbu duu maa ni tab’ dunoli.

¹¹ Ka Hanna daa po pɔri yɛli, “Yawɛ ŋun nyɛ Tɔbbihi Naa ŋɔ, a yi nya mani ŋun nyɛ a dab’ paɣ’ ŋɔ muɣisigu ŋɔ ka teei n yɛla, ka bi tam mani ŋun nyɛ a dab’ paɣ’ ŋɔ yɛla, amaa ka ti ma bidibiga, n ni zaŋ o n-labisi ti a hal ni o nyɛvili tariga, ka n ku chɛ ka piliŋ shih’ o zuɣu ni.”[1]

¹²O ni daa kul suhiri Yawɛ maa, ka Ɛli lihir’ o noli.

¹³Hanna daa suhiri Naawuni la o suhu ni, amaa ka o naŋgbampiba lee damda, ka so daa bi wumd’ o kukoli. Dinzuɣu ka Ɛli daa tɛhi ni o nyula dam kuli,

¹⁴ka bɔh’ o, “Bɔ saha ka dam ŋɔ yɛn yi a ninni?” Ka yɛl’ o, “Chɛli wain nyubu.”

¹⁵Amaa ka Hanna yɛl’ o, “N dana, Aai, n nyɛla paɣ’ so ŋun be muɣisigu ni pam. M bi nyu wain bee binnyur’ kpiɔŋ, amaa n zaŋdila n suhu ni yɛlimuɣisira zaa wuhiri Yawɛ.

¹⁶Dinzuɣu di zaŋ mani ŋun nyɛ a dabili ŋɔ ŋmahindi paɣ’ yoli, dama n ni kul be kpe saha shɛli maa zaa, n yɛlimuɣisira mini n suhugarigu yɛla ka n yɛri maa.”

¹⁷Di saha ka Ɛli garigi yɛl’ o, “Cham’ ni suhudoo. Izraɛl Naawuni ŋɔ ni deeg’ a suhigu maa, ka ti a a ni suh’ o shɛli maa.”

¹⁸Ka Hanna daa yɛli “Chɛ ka mani ŋun nyɛ a dabipaɣ’ ŋɔ nya zuɣusuŋ a sani.” Di saha ka Hanna daa kuli ti di ka nyu, ka daa bi lan mali suhugarigu.

¹⁹Ka Ɛlikana min’ o yiŋnim’ maa daa daŋ yiɣisibu asiba n-jɛm Yawɛ ka lab kuli bɛ ya Rama. Ka Ɛlikana min’ o paɣ’ Hanna daa ti dɔni, ka Yawɛ teei Hanna yɛla.

²⁰Ka o daa niŋ pua n-dɔɣi bidibiga bol’ o yuli Samuɛl,[2] dama Hanna daa yɛlimi, “N suh’ o la Yawɛ sani.”

²¹Ka Ɛlikana min’ o yiŋnim’ zaa daa ti chaŋ Naawuni sani ni bɛ yaa ti mali yuuniyuuni sara la Yawɛ sani, ka pal’ o ni daa lo alikauli shɛl’ la.

²²Amaa Hanna ŋun’ daa bi chaŋ, dama o daa yɛlila o yidana, “Faashee bia maa ti ŋmaai bihili ka n zaŋ o tahi Yawɛ sani ka o ti kpalim be nimaani hal ni o nyɛvili tariga.”

²³Ka o yidan’ Ɛlikana daa yɛl’ o, “Niŋm’ a ni tɛhi ni shɛli viɛl’ a sani, kul guhim’ hal ka bia maa ti ŋmaai bihili. Yawɛ chɛ ka o yɛligu niŋ pali.” Ka Hanna daa kpalim yiŋa m-mal’ o bia maa hal ka o ti ŋmaai bihili.

²⁴Bia maa ni daa ti ŋmaai bihili, ka o bo yuma ata naɣilaa mini zim din tibisim nyɛ kilɔgiram pia ni wain gaɣili pali m-pahi bia maa zuɣu chaŋ Shilo Yawɛ jɛmbu duu, ka bia maa daa na nyɛla ŋun pɔra.

²⁵Ka bɛ daa kɔrigi naɣilaa maa, ka zaŋ bia maa mi chaŋ ti ti Ɛli.

²⁶Ka Hanna daa yɛli, “N dana, Naawuni dolim’ a nyɛvili.” Ka lan yɛli, “N dana, mani n-nyɛ paɣ’ so ŋun daa ʒe a tooni kpe n-suhiri Yawɛ la.

²⁷Bia ŋɔ ka n daa suhi maa, ka Yawɛ daa deei n suhigu ka shiri ti ma n ni daa suh’ o bɔri shɛli maa.

²⁸Dinzuɣu n zaŋ o ti Yawɛ. O nyɛla Yawɛ ni yɛn su so hal ni o nyɛvili tariga.” Ka o daa chɛ o ti Yawɛ nimaani.